Эл Ойынды ӧткӱрер јаан арга Ойбокто бар

25.08.2020

Алтай Республиканыҥ башчызы Олег Хорохордин Кан-Оозы аймакта ишмекчи јол-јорыкта бололо, Ойбок ӧзӧктӧ площадканы кӧргӧн.

Келер јылда алтай албатыныҥ тергеелер ортодо Эл Ойын байрамын шак ла бу јерде ӧткӱрери темдектелет. Бу јерди ӧдӱп јаткан јылдыҥ башталганында талдап алгандар. Озолондыра темдектелгениле, байрамды јаан изӱ айдыҥ 2-5 кӱндеринде ӧткӱрер керек болгон. Је коронавирус оору таркаганынаҥ улам ороондо кӧп албаты-јон јуулып, туружып турган бастыра керек-јарактарды ӧткӱрери токтодылган. Оныҥ да учун тергеениҥ башкараачызы байрамды 2021 јылда, Алтай Республика тӧзӧлгӧниниҥ 30 јылдыгы темдектелер тушта ӧткӱрери керегинде јӧп јараткан.

Ойбок ӧзӧк Кан-Оозы јурттыҥ гран-кыйузында турат. Мында культурно-соотошту керек-јарактар ӧткӱрерге кеми 60 гектар јерде «Омбо» деген этно-культурный тӧс јер, спорттыҥ маргаандарын ӧткӱрер јерлӱ ипподром тудулган. Анайда ок саду-соотоштыҥ объекттерине, байкандардыҥ калачагына, кӧлӱктердиҥ турлуларына јерлер бар.

«Этно-культурный тӧс јерде «Устардыҥ калазы» деген кӧргӱзӱ тӧс јер тӧзӧлӧр, мында ла муниципал тӧзӧмӧлдӧрдиҥ айылдарыла таныштыру болор. Ипподромдо «Кӧк-Бӧрӱ» ойын ла командалар ортодо маргыжулар ӧткӱретен јер бастыра некелтелерге келижет, трибуналарда 1,5 муҥнаҥ кӧп улус отурар аргалу. Тӧзӧлгӧн инфраструктура албатыныҥ ойындарын бийик кеминде ӧткӱрер арга берер деп бодоп турум» — деп, тергеениҥ башкараачызы айткан.

Кан-Оозы аймактыҥ јааны Эжер Ялбаковтыҥ темдектегениле, бастыра объекттер электролиния-ларга колболгон ло таҥынаҥ скважиналарлу. Ол тергеениҥ башкараачызына байрам ӧйинде иштейтен объекттердиҥ јурук-схемазын кӧргӱскен.

Эл Ойын јебрен ӧйлӧрдӧҥ бери јарлу, эмдиги ӧйдиҥ бу байрамыныҥ тӱӱкизи 1988 јылда башталган. Ого бастыра республикадаҥ, Россияныҥ ӧскӧ дӧ тергеелеринеҥ, гран да ары јанынаҥ айылчылар јуулыжат.

Фестивальдыҥ ачылтазы тушта сӱрлӱ театрализованный кӧргӱзӱ ачык теҥериниҥ алдында ӧдӧт. Байрам тушта кӱреш, ок-јаадаҥ адары, ат јарыш, таш кӧдӱрери, камчыла согоры, алтай шатра ла спорттыҥ ӧскӧ дӧ бӱдӱмдери аайынча маргыжулар ӧдӧт. Анайда ок башка-башка конкурстар, артисттердиҥ ойын-концерттери, устардыҥ кӧрӱ-јарымказы ла оноҥ до ӧскӧ керек-јарактар болот.

Эл Ойын керек-јарактардыҥ јыл туркунына EventsInRussia национальный календариниҥ эҥ артык дегендериниҥ топ-200 тооломына бир канча катап кийдирилген, анайда ок туризм бӧлӱкте Russian Event Awards национальный сыйдыҥ «Туризмниҥ эҥ артык этно-культурный кереги» номинация аайынча Гран-призин алган.

АР-дыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина