Алтайдын Чолмоны

Ӧйинеҥ озо ӱнбериш

01.09.2020

Ӱнбериштиҥ бирлик кӱнинде, 2020 јылдыҥ сыгын айыныҥ 13-чи кӱнинде, Алтай Республиканыҥ јеринде муниципал тӧзӧлмӧлӧрдиҥ чыгартулу органдарыныҥ депутаттарын талдаары аайынча талдаштар ӧткӱрер 24 кампания ӧдӧр. Бастыра 109 мандат учун регистрация ӧткӧн 272 кандидат тартыжар.

Талдаштар ӧткӱреринде талдаачы 57 участок иштеер, ӱнбериште 40 муҥга јуук ӱнбереечи туружар аргалу. Мынызы тергееде текши ӱнбереечилердиҥ 25 проценти болуп јат.

Коронавирус југуш оору таркаар чочыдуны болдыртпаска, јербойындагы талдаштар ӧткӱрер камыстарга таҥынаҥ коруланыштыҥ эдимдери (медицинский маскалар, перчаткалар), талдаачы камыстыҥ турчыларына ла ӱнбереечилерге антисептический јазалдар, бесконтактный термометрлер табыштырылган. Ӱнбериштеҥ 10 кӱн озо талдаштар ӧткӱрер территориальный ла участковый камыстардыҥ бастыра турчылары коронавирус југуш ооруга шиҥделер.

Анайда ок бастыра участоктордо јондык шиҥжӱчилер јилбиркедилер.

Ӱнбериш 2020 јылдыҥ сыгын айыныҥ 13-чи кӱнинде јербойыныҥ ӧйиле 08.00 сааттаҥ ала 20.00 саатка јетире ӧдӧр, је кезик учуралдарда јасак аайынча ӱнбереечилерге ӧйинеҥ озо ӱнин берер аргалар тӧзӧлӧр.

Јаҥжыкканы аайынча талдаштарда Алтай Республиканыҥ једерге кӱч ле ыраак јерлеринде јаткан улус ӧйинеҥ озо ӱнин берет. Бу талдаштар ӧткӱрер кампания ӧйинде ӧйинеҥ озо ӱнбериш Улаган ла Кош-Агаш аймактардыҥ турлуларында ӧдӧр.

Ӱнбериштиҥ кӱнинде кандый бир шылтактардаҥ улам (отпуск, командировка, ижиниҥ ле ӱредӱзиниҥ режими, государственный ла јондык молјулар бӱдӱрип турза, су-кадыгыныҥ айалгазы ла ӧскӧ дӧ шылтактар) ӧскӧ јерде болуп, талдаачы участокко келип, ӱнин берер аргазы јок граждандар база ӧйинеҥ озо ӱнбериште туружар аргалу. Мындый граждандарга бойыныҥ участогындагы талдаштар ӧткӱрер камыска угузула баштанар керек.

Ӧйинеҥ озо ӱнбериш кажы ла кӱн ӧдӧр:

2020 јылдыҥ сыгын айыныҥ 2-чи кӱнинеҥ ала 8-чи кӱнине јетире – талдаштар ӧткӱрер территориальный камыстыҥ кыбында;

2020 јылдыҥ сыгын айыныҥ 9-чы кӱнинеҥ ала 12-чи кӱнине јетире – талдаштар ӧткӱрер участковый камыстыҥ кыбында, ӱнбереечи ӱнбереечилердиҥ тооломына кийдирилген участокто.

Бу темдектелген ӧйлӧрдӧ талдаштар ӧткӱрер камыстардыҥ ижиниҥ графиги талдаштар ӧткӱрер территориальный камыстарла јӧптӧлгӧн болуп јат.

Ӱнбериште туружатан ӱнбереечилердиҥ су-кадыгын корыырына керектӱ айалгалар тӧзӧӧр амадула, ӧйинеҥ озо ӱнбериштиҥ ээжизи аайынча (Россияныҥ ЦИК-ниҥ 2020 јылдыҥ јаан изӱ айыныҥ 24-чи кӱнинде јӧптӧгӧн 260/1916-7 номерлӱ јакааныла) талдаштар ӧткӱрер 36-чы таҥмалу участковый камыстыҥ (Жана-Аул јурт) ла 224-чи таҥмалу участковый камыстыҥ (Чаргы јурт) кыптарында ӱнбериш јербойыныҥ ӧйиле 08.00 сааттаҥ ала 20.00 саатка јетире јаҥыс ла ӱнбериштиҥ бирлик кӱнинде – 2020 јылдыҥ сыгын айыныҥ 13-чи кӱнинде эмес, је анайда ок ӱнбериштеҥ эки кӱн озо –  сыгын айдыҥ 11-чи  ле 12-чи кӱндеринде ӧдӧр.

Ӱнбериште, ол тоодо ӧйинеҥ озо ӱнбериште ӱнбереечилер бойлоры туружар учурлу. Бойында Российский Федерацияныҥ гражданининиҥ паспорты эмезе ӧскӧ документ болор учурлу.

Кандый бир шылтактаҥ улам талдаштардыҥ бирлик кӱнинде талдаачы участокко келип болбойтон ӱнбереечи 2020 јылдыҥ сыгын айыныҥ 3-чи кӱнинеҥ ала 13-чи кӱниниҥ 14.00 саадына јетире талдаштар ӧткӱрер участковый камыска (ол тоодо ӧскӧ дӧ улус ажыра) айылында ӱн берер арга берери керегинде баштанар аргалу. Андый баштанулу угузуны ол, сыгын айдыҥ 3-чи кӱнинеҥ ала иштеп баштайла, 8-чи кӱниниҥ 24.00 саадына јетире (Москваныҥ ӧйиле) иштейтен ЕПГУ-ныҥ цифровой јеткилдештерин тузаланып берер аргалу.

Ӱнбериште туружар тушта, паспортын эмезе керелеген ӧскӧ дӧ документти берген ӱнбереечиге бюллетень берилет. Ол бюллетеньде регистрацияны ӧдӱп, талдаштарда туружып јаткан кандидаттардыҥ ады-јолдоры алфавит аайынча бичилген болор.

Талдаачы бюллетеньде ӱнбереечи кажы кандидат учун ӱнин берерге турган, ол кандидат керегинде јетирӱлердиҥ оҥ јанында куру квадратка кандый бир темдек тургузар. Кандый да темдек тургузылбаган эмезе темдектелгенинеҥ кӧп темдек тургузылган бюллетеньдер ӱрелген деп чотолор ло ӱндерди тоолоор тушта ајаруга алынбас.

Ӧдӧтӧн талдаштарда, ол тоодо кӧп мандатту талдаачы округтарда депутаттардыҥ талдаштарында ӱнбереечиде бир ле ӱн болор. Јаҥыс Ӱстиги-Апшуйактуныҥ јурт јеезезиниҥ ле Казахский јурт јеезениҥ депутаттарыныҥ талдаштарында ӱнбереечи бир уунда јети эмезе 11 кандидат учун – талдалып јаткан депутаттардыҥ тоозынаҥ камаанду – ӱнин берер аргалу. Ӱнбереечиге берилип јаткан ӱндердиҥ тоозы керегинде јетирӱ талдаштардыҥ бюллетениниҥ оны канайда толтырары керегинде јартамалду бӧлӱкте бар. Керек болзо, ӱнбереечи талдаштар ӧткӱрер участковый камыстыҥ турчыларына баштанып, јартамал алар аргалу.

Алтай Республиканыҥ Талдаштар

ӧткӱрер камызы