Муниципал тӧзӧлмӧлӧрдӧ талдаштар ӧткӧн

18.09.2020

Алтай Республиканыҥ Талдаачы кӱреезиниҥ јетиргениле, муниципал талдаштарда 8877 ӱнбереечи эмезе ӱнбереечилердиҥ тооломдорына кийдирилгендердиҥ текши тоозынаҥ 23,79 проценти турушкан.

109 мандаттаҥ 68 мандат «Единая Россияга» келишкен, 35 мандат — кандидатуразын бойы кӧстӧгӧндӧргӧ, 3 мандат — КПРФ-га (Тондоштогы, Турачактагы, Кырлыктагы јурт јеезелер), 2 мандат — ЛДПР-га (Чибиттеги, Талицадагы јурт јеезелер), 1 мандат — «Партия делага» (Майма аймактыҥ Соведи).

Тергеениҥ эҥ јаан јурты болуп турган Маймада јурт Советтиҥ депутаттарыныҥ талдаштары ӧткӧн. Анайда ок јурт Советтердиҥ депутаттарын Жана-Аул, Тондош, Чибит, Талица, Кырлык, Моты-Оозы, Ӱстиги-Апшыйакту јурттарда туткан. Билӱлӱ, Кызыл-Ӧзӧк, Турачак, Артыбаш, Балыктујул, Каракӧпши јурттарда јурт Советтердиҥ депутаттарыныҥ ӱзеери талдаштары болгон.

Турачак аймакта 6-чы таҥмалу округ аайынча талдаштарда «Родничок» детсадтыҥ директоры Андрей Прокопьев, 8-чи таҥмалу округта — удурумга иштебей турган Станислав Синкин јеҥген. Кан-Оозы аймакта 8-чи таҥмалу округта Кайсындагы школдыҥ директоры Эркемен Муйтуев јеҥерде, Кӧксуу-Оозы аймакта эки мандатту 5-чи таҥмалу округта — отраслевой технологиялардыҥ техникумыныҥ директоры Наталья Суртаева ла аймактыҥ эмчилигиниҥ баш врачы Андрей Рыбаков, Чой аймакта 15-чи таҥмалу округта — ветеринарный специалист Алексей Швецов, Шабалин аймакта 3-чи таҥмалу округта — Улус-Чаргыдаҥ физкультураныҥ ӱредӱчизи Сергей Подосенов, 6-чы округта — аймактыҥ эмчилигиниҥ баш врачы Виктор Убайчин. Олор бастыразы «Единая Россиядаҥ» кӧстӧлгӧн улус.

Јаҥы тудулган депутаттардыҥ тоозында јиит улус болгонын кӧрӧргӧ јарамыкту

Оҥдой аймактыҥ депутаттарыныҥ Совединиҥ 18-чи таҥмалу округ аайынча ӱзеери талдаштарында фермер Николай Епкин јеҥген, оныҥ кандидатуразын 216 ӱнбереечи јӧмӧгӧн. КПРФ-таҥ кӧстӧлгӧн лӧ калганчы јер алган пенсионер Светлана Нанкашева учун беш ӱнбереечи ӱнин берген.

Чамал аймакта 6-чы таҥмалу округта пенсионер, мынаҥ озо «Горно-Алтайавтодордыҥ» башкараачызы болгон Николай Нечаев јеҥген.

Маймадагы јурт Советтиҥ депутаттарына талдаштарда 15 мандаттаҥ 11 мандат «Единая Россияныҥ» улузына келишкен. Јурт Советтиҥ депутаттарына тудулгандардыҥ тоозында: «Жилищная инициатива» фирманыҥ генеральный директоры Алексей Бедеев, пенсионер Владимир Бендриковски (кандидатуразын бойы кӧстӧгӧн), јеезениҥ јааны Александр Берсенев, «Энергосервисный компания» ООО-ныҥ энергетиги Александр Булыгин, јуртээлемдик кооперацияныҥ бӧлӱгинде компетенциялардыҥ Тӧс јериниҥ эксперти Владимир Володин (кандидатуразын бойы кӧстӧгӧн), «Майма ЖКХ» учреждениениҥ јааны Геннадий Гейман, аргачы Игорь Ивлев, аргачы Юсупжан Максутов, пенсионер Сергей Нелидов (кандидатуразын бойы кӧстӧгӧн), Дубровкадагы Культураныҥ туразыныҥ јааны Вячеслав Самороднов, Майма аймактыҥ администрациязыныҥ ижин јеткилдеери аайынча башкартуныҥ директоры Анатолий Санаров, «Майминская» УК-ныҥ электромонтеры Михаил Софронов, Андрей Табакаев, аргачы Олеся Шадрухина, аргачы Светлана Эбель (кандидатуразын бойы кӧстӧгӧн). Јеезениҥ јаанын бу депутаттар бойыныҥ ортозынаҥ тударын темдектеер керек.

«Единая Россиядаҥ» озолондыра талдаштардыҥ уч-турулталары аайынча кӧстӧлгӧн кандидаттардыҥ кӧрӱм-шӱӱлтези ачык болгоны, ӱнбереечилерле иш эрчимдӱ ӧткӧни, партийный активтиҥ јӧмӧлтӧзи Алтай Республикада муниципал талдаштардыҥ уч-турулталарына јарамыкту камаанын јетирген. Ол керегинде «Единая Россияныҥ» тергеелик бӧлӱгиниҥ качызы, сенатор Татьяна Гигель элбек јетирӱлер эдер республикан эп-аргалардыҥ чыгартулу улузыла ӧткӧн туштажу ӧйинде айткан.

«Текши алза, талдаштардыҥ уч-турулталары «Единая Россияга» јарамыкту болгон. Озолондыра уч-турулталарла болзо, 109 мандаттаҥ 68 мандатты бис ойноп алганыс. Озолондыра талдаштар мындый кӧргӱзӱ болорына камаанын јетирген. Конкуренциялу талдаштардыҥ уч-турулталары аайынча бойыныҥ јурттарында, муниципал тӧзӧлмӧлӧрдиҥ албаты-јоны ортодо танылу, эрчимдӱ јӱрӱмдик кӧрӱм-шӱӱлтелӱ улус кандидаттарга кӧстӧлгӧн болгон. Озолондыра ӱнбериште јеҥген улус тӧс ӱнбериш ӧдӧр тушта бойыныҥ баштамы талдаштардагы уч-турулталарын быжу керелеген» — деп, Татьяна Гигель айткан.

Оныҥ угусканыла, јаҥы депутаттардыҥ тоозында јиит улус кӧп. «Јашӧскӱрим эрчимдӱ болуп барааткан, республиканыҥ политикалык јӱрӱминде туружарга кӱӱнзейт ле ол арганы тузаланат — деп, ол темдектеген.—Бис келип, бойыныҥ ӱнин талдап алган кандидаттар учун берген ӱнбереечилерге быйанысты айдадыс. Депутаттарга једимдер ле ӱнбереечилердиҥ јакылталары бӱдерин кӱӱнзейдим. Бу иштиҥ чыҥдыйынаҥ депутаттардыҥ ла тӧс политикалык ийде болуп турган «Единая Россияныҥ» тоомјызы тӧзӧлӧт».

Озолондыра уч-турулталарла болзо, каланыҥ ла аймактардыҥ Советтерине ӱзеери талдаштарда 13 мандаттаҥ 10 мандат «Единая Россияныҥ» адынаҥ кӧстӧлгӧндӧргӧ келишкен. Горно-Алтайск каланыҥ депутаттарыныҥ Соведине 7-чи таҥмалу округ аайынча талдаштарда 8-чи таҥмалу школдыҥ директоры Елена Комиссарова јеҥген. Мынайып, каланыҥ Совединде 21 јердеҥ 16 јер јаҥныҥ партиязына артканча. Бу округ аайынча депутат болгон Петр Попошев АР-дыҥ Эл Курултайыныҥ депутадына тудуларда, вакансия боло берген болгон.

Текши алза, талдаштардыҥ уч-турулталары «Единая Россияга» јарамыкту болгон

«Единая Россияныҥ» исполкомыныҥ башкараачызы Эмиль Тюхтеневтиҥ айтканыла болзо, депутаттыҥ мандады учун јети кандидат тартышкан болгон. «Каланыҥ округы аайынча талдаштар эҥ ле кызу ӧткӧн талаштардыҥ бирӱзи. Елена Комиссарова, арткан кандидаттарга кӧрӧ, чик јок кӧп ӱндер алып јеҥген — деп, ол темдектеген.—Бистиҥ кандидаттарды јӧмӧгӧн ӱнбереечилерге, бистиҥ јербойындагы ла баштамы бӧлӱктердеҥ турган бастыра партийный активке быйан айдып турум. Бу сӱрекей јаан бирлик команда».

«Единая Россияныҥ» Маймадагы баштамы бӧлӱгиниҥ качызы, Майма аймактыҥ јааны Роман Птицынныҥ айтканыла болзо, муниципалитеттеги тӧс талдаштар аймактыҥ тӧс јуртыныҥ депутаттарыныҥ Соведин тӧзӧӧриле колбулу болгон. «Талдаштардыҥ озолондыра уч-турулталары депутаттардыҥ корпузы бӱткӱлинче солынганын кӧргӱзет. Јаҥы тудулган депутаттардыҥ тоозында јиит улус болгонын кӧрӧргӧ јарамыкту, олордо јурттыҥ ӧзӱмине бойыныҥ камаанын јетирер деген кӱӱн-санаа бар. Бис граждандардыҥ јакылталарын бӱдӱрери јанынаҥ иштеп, бӱгӱн ичкери бек тӧзӧлгӧлӱ барып јадыс. Оныҥ да учун улус талдаштарда јӧмӧгӧни чындык керек деп бодойдым. Бирлик ууламјыла иштеерин улалтарга, јуук келер ӧйдӧ фракцияларды тӧзӧӧри артат» — деп, ол айткан.

Республикан Талдаачы кӱреениҥ јетирӱлериле болзо, бастыра талдаачы кампаниялар јасактыҥ ээжи-некелтелери аайынча ӧткӧн. Орто кӧргӱзӱлерле болзо, ӱнбереечилердиҥ тооломдорына кийдирилген граждандардыҥ текши тоозынаҥ 26,93 проценти талдаштарда турушкан. Муниципал талдаштарды ӧткӱргениле колбулу комыдалдар ла баштанулар талдаштар ӧткӱрер кӱреелерге келбеген.

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина