Ӱредӱчи керегинде сӧс

25.09.2020

2020 јылда куран айдыҥ 26-чы кӱнинде Оҥдой аймактыҥ Каракол јуртыныҥ јарлу ла тоомјылу ветерандарыныҥ бирӱзи, Россия Федерацияныҥ бийик профессионал ӱредӱзиниҥ кӱндӱлӱ ишчизи, јурттыҥ ла аймактыҥ керек-јарактарыныҥ эрчимдӱ туружаачызы САМТАРОВА Роза Васильевна ортобыстаҥ ыраап барды. Ол биске јаан карыкчалду ла неле де толтырып болбос јылыйту болды.

Самтарова (Шатинова) Роза Васильевна 1934 јылда кӱӱк айдыҥ 2-чи кӱнинде Кулады јуртта ӱредӱчилердиҥ билезинде чыккан. Јуу-чак башталарда, адазы јууга барып, кайра бурылбаган. Энези эки балазын аштатпай, чыдадып салган.

Карындажы Коля А. М. Горькийдиҥ адыла адалган Литературный институтты божоткон. Ол јарлу алтай бичиичи Шатра Шатинов.

Роза Васильевна Караколдыҥ сегисјылдык школын божодып, Горно-Алтайск калада педучилищеге ӱредӱге киреле, оны 1958 јылда једимдӱ божодоло, Шашыкман јурттыҥ школында иштеп баштаган. Эрчимдӱ иштӱ, ижине каруулу јиит ӱредӱчини Караколдыҥ школына баштамы класстардыҥ ӱредӱчизине кычырган. Ол 1969 јылдаҥ ала амыралтага чыкканча јетире Караколдыҥ интернадыныҥ јааны болуп иштеди. Јакшы, эрчимдӱ ижи бийик баалалып, кӧп грамоталарла, медальдарла кайралдаткан. Ол тоодо РСФСР-дыҥ ӱредӱлигиниҥ министерствозыныҥ, Алтай Республиканыҥ Эл Курултайыныҥ Кӱндӱлӱ грамоталарыла, «За освоение целинных и залежных земель», «Иштиҥ ветераны» медальдарла, «Албаты ӱредӱликтиҥ отличниги» деп темдекле кайралдаткан.

Роза Васильевна чапты сӧӧктӱ Михаил Дмитриевич Самтаровло айыл-јурт тӧзӧп, эки бала азырап чыдаткан. Олор ӱч баркалу ла баркалардыҥ балдарыныҥ тоозы јети. Јайалталу ла јалакай ӱредӱчибис, јерлежис, канча баланыҥ кару энези, јааназы, сыйындарыныҥ јаан јӱректӱ эјези керегинде эзем јӱректеристе узакка артар!

Тӧрӧӧн-туугандары

ТОП

«Гуркин» деген телекей: ачылталар ла јажыттар

Г.И. Гуркин ӱйи Мария Агафоновнала Оносто садында Атту-чуулу алтай јурукчы, политикалык ла јондык ишчи Григорий Иванович Чорос-Гуркинниҥ чыккан ӧйин ле јерин чокумдаган јаҥы документтер табылган. «ХХ чактыҥ башталарында Туулу Алтайда эҥ јарлу јон-политикалык ишчилердиҥ бирӱзи, јурукчы Григорий Иванович Чорос-Гуркин 1870 јылдыҥ чаган айыныҥ 12-чи кӱнинде Улалуда чыккан деп чотолот. Је Алтай Республиканыҥ Государстволык архивинде Улалудагы

«Јурукчыныҥ јуртын орныктырары – тӧс иш»

Јурукчыныҥ Оностогы јуртында Атту-чуулу алтай јурукчы, ады јарлу јондык ла политикалык ишчи Григорий Иванович Чорос-Гуркинниҥ чыкканынаҥ ала 155 јылдыгыла колбой тергеебисте кандый иштер темдектелгени керегинде Алтай Республиканыҥ А. В. Анохинниҥ адыла адалган Эл музейиниҥ директоры Римма ЕРКИНОВА куучындайт. – Г. И. Чорос-Гуркинниҥ юбилейине белетенери ле оныла колбой быјыл ӧткӱретен иштер керегинде Алтай Республиканыҥ башкарузыныҥ јакааны

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым