Јиит парламентарийлерге — кере бичиктер

01.12.2020

Јашӧскӱримниҥ Алтай Республиканыҥ алтынчы катап тудулган Эл Курултайындагы парламентиниҥ текши јууны экинчи катап ӧткӧн. Уткуулду сӧстӧрин јуулгандарга Алтай Республиканыҥ Эл Курултайыныҥ председатели Владимир Тюлентин, Россияныҥ Госдумазыныҥ депутады Родион Букачаков, АР-дыҥ ӱредӱлик ле билим аайынча министриниҥ ордынчызы Александр Сыркашев айткан.

Владимир Тюлентинниҥ темдектегениле, Јашӧскӱримниҥ Алтай Республиканыҥ алтынчы катап тудулган Эл Курултайындагы парламенти бӱткӱлинче тӧзӧлгӧн лӧ ишке белен. Јашӧскӱримниҥ парламентиниҥ ле комитеттердиҥ председательдери тудулган. «Јашӧскӱримниҥ парламентин тудары башкараачылардыҥ ла јаандардыҥ келер ӱйезин белетеерине ууламјылу иш. Ол јиит улус јасактарла иштееринде јаан ченемел алатан, Алтай Республиканыҥ депутаттарыла чике колбу тудатан јаан учурлу школ болуп јат» — деп, ол темдектеген. «Слер јашӧскӱримниҥ ортодо башчылар болуп, оныҥ баштаҥкайларын јӧмӧӧр лӧ ичкерледер, олор ортодо су-кадык јӱрӱм јӱрерин јартап элбедер учурлу — деп, республикан парламенттиҥ спикери оноҥ ары айткан. —Слерге Алтай Республиканыҥ эл-јоныныҥ курч сурактарын ла керексиштерин толо шиҥдеерге, каланыҥ ла муниципалитеттердиҥ службаларыныҥ ижиле таныжарга, олордыҥ ижин јарандырары јанынаҥ шӱӱлтелер ле эп-сӱмелер айдарга келижер».

Владимир Николаевич јиит парламентарийлерге баштанып, олор кадрлардыҥ иженчилӱ кӧмзӧзи деген. Ол онойдо ок јиит парламентарийлер келер ӧйдӧ Алтай Республиканыҥ депутаттары, јарлу политиктер, бийик кемдӱ башкараачылар болор деген ижемјизин айткан. Спикер Јашӧскӱримниҥ парламентине бирлик команда болуп, бой-бойына болужып иштезин деген кӱӱнземелин айткан. «Бистиҥ депутаттар слерге јаантайын болужар ла слердиҥ сурактарыгардыҥ аайына чыгыжар» — деп, ол адакыда угускан. Владимир Тюлентин Јашӧскӱримниҥ парламентиниҥ турчыларына кере бичиктер ле темдек-значоктор табыштырган.

Госдуманыҥ депутады Родион Букачаков уткуулында ороондо јашӧскӱримниҥ парламентаризми керектӱ кыймыгу деген. Государственный Думада ол эрчимдӱ иш ӧткӱрет. Јасактар јанынаҥ кӧп баштаҥкайлар Јашӧскӱримниҥ парламенттери јанынаҥ болуп туру. Оныла колбой, тергеениҥ Јашӧскӱрим парламентин јасактардыҥ баштаҥкайларыныҥ авторы болорына, бойыныҥ шӱӱлтелериле республикан парламентке чыгарына кычырган. Тургуза ӧйдӧ Эл Курултай РФ-тыҥ Государственный Думазына јасакберим ӱч баштаҥкайла чыккан деп, Родион Борисович айткан.

АР-дыҥ ӱредӱлик ле билим аайынча министриниҥ ордынчызы Александр Сыркашев Алтай Республикада государствоныҥ јашӧскӱрим јанынаҥ политиказыныҥ бӱдӱп турганы керегинде јетирӱ эткен. АР-дыҥ Јашӧскӱримниҥ парламентиниҥ јербойында башкарынары ла тап-эриктер аайынча комитединиҥ председатели Александр Лутцев Јашӧскӱримниҥ Алтай Республиканыҥ Эл Курултайындагы парламенти керегинде Ээжиге кубулталар кийдирер шӱӱлте айткан. АР-дыҥ Јашӧскӱримниҥ парламентиниҥ председатели Алена Кудачинова 2021 јылдагы иштиҥ планыла таныштырган. Јашӧскӱримниҥ парламентинеҥ каруулу качыны ӧскӧ тергееге барганыла колбой чыгарар јӧп јарадылган. Бу ишке бир ӱнле Ольга Параева тудулган.

«Алтай Республикада јашӧскӱримниҥ политиказыныҥ, граждандардыҥ јуучыл-тӧрӧлчи таскамалыныҥ ла черӱге белетеериниҥ тӧс јери» БУ-ныҥ директоры Надежда Лебедева бу бюджеттеги учреждениениҥ ижи керегинде куучындаган. Оныҥ јетирӱзиле, тӧс јерде 21 кижи иштейт, јылдыҥ ла волонтер кыймыгуны, јашӧскӱримниҥ тӧрӧлчи, јуучыл-тӧрӧлчи таскамалын ӧскӱрерине, су-кадык јӱрӱм јӱрерин элбедерине ууламјылу 300 кирези керектер ӧткӱрилет.

АР-дыҥ Јашӧскӱримниҥ парламентиниҥ Россияныҥ Госдумазындагы Јашӧскӱримниҥ Јондык палатазында (Јашӧскӱримниҥ парламенти) чыгартулу кижизи Роман Гордеев эмди иштеп турган организациязыныҥ ижи керегинде јетирӱ эткен. «Государствоныҥ јашӧскӱрим јанынаҥ политиказы керегинде» федерал јасактыҥ ӱлекери баштапкы кычырышта јарадылганын куучындап, коллегаларына бу јасактыҥ ӱлекерине бойыныҥ шӱӱлтелерин кийдирзин деп баштанган. Бойыныҥ јетирӱлерин онойдо ок Јашӧскӱримниҥ парламентиниҥ эрчимдӱлери Мария Ардиматова ла Айабас Белешев эткендер. Мария Ардиматова јуунныҥ туружаачыларын су-кадыгыныҥ айалгалары коомой улуска турист объекттерди тузаланарын јеҥилтери јанынаҥ мониторинг ӧткӱрер ӱлекерле таныштырган. Айабас Белешевтиҥ јетирӱзиле, јаҥар айдыҥ 3-чи кӱнинде бистиҥ ороондо калыктар ортодогы јаан акция — Ада-Тӧрӧл учун Улу јууныҥ тӱӱкизи аайынча тест — ӧткӱрилер. Алтай Республиканыҥ депутады Ольга Волосовцева јиит парламентарийлерди «Щедрый вторник» акцияда эрчимдӱ туружарына кычырган.

Алтай Республиканыҥ Эл Курултайыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина