Алтайдын Чолмоны

Башчыныҥ уткуулы — быйанду энелерге

22.12.2020

Алтай Республиканыҥ башчызы Олег Хорохордин тоолу кӱндер кайра Кош-Агаш аймакла јол-јорыкта болуп, кӧп балдарлу энелерди кереес темдектерле кайралдаган. Ол онойдо ок нацӱлекерди јӱрӱмде бӱдӱрери аайынча аймактыҥ тӧс јуртында тудулган объекттерди шиҥдеп кӧргӧн.

«Кару эпшилер, мен слерди эне кижиниҥ, от-очогыныҥ чындык коручылдарын јеҥил эмес, је кӱндӱлӱ ижигерле акту кӱӱнимнеҥ уткуп турум. Слер балдарарды таскадып тура, ороонныҥ, республиканыҥ, тӧрӧл аймагардыҥ, јуртыгардыҥ ичкери ӧзӱмине сӱрекей јаан јӧмӧлтӧ-болужыгарды јетиредигер. Энелик — ол јаҥыс та бийик ле кӱндӱлӱ ат-јол эмес, је онойдо ок јеҥил эмес кӱнӱҥги иш. Слер бу ишке ончо ийде-кӱчигерди бередигер. Слерге ле слердиҥ јуук улузыгарга бек су-кадык, билелик ырыс-кежик, амыр-энчӱ јадын-јӱрӱм кӱӱнзейдим» — деп, Олег Хорохордин айтты.

Билелик јадын-јӱрӱмди тыҥыдарында јеткен једимдери ле балдарыныҥ јакшы таскамалы учун «Быйанду Эне» деген кереес темдекле Кош-Агаштаҥ Сабираш Ахметова, Жана-Аул јурттаҥ Гульайша Байгунакова, Курай јурттаҥ Наталия Адыкинова ла Оксана Абулова кайралдаттылар.

Олег Хорохординниҥ темдектегениле, Кош-Агаш аймак бойыныҥ јаҥжыгуларыла танылу, јарлу. Аймакта кӧп балдарлу билелер кӧп. Оныҥ учун болчомдордыҥ 60 јерлӱ садын тудары јанынаҥ сурак анчада ла курч турат. Јаҥы детсадты тудатан иш кандык айда бойыныҥ јолына чыккан ла келер јылдыҥ јайында бӱдер учурлу.

«Мен шак ла ол объектти кӧрдим. Мында детсадтыҥ ла котельныйдыҥ бетон полдорын карага тудары учына чыккан. Ишмекчилер тудум иштерди баштап ийди, јабынтыны, стенелерди, эжик алдын јазаары улалат. Ончо иш чокум графикле ӧдӧт. Келер јылда мында јаҥы детсадтыҥ ачылтазында туштажарыс деп иженедим» — деп, О. Хорохордин чокумдады.

Таланыҥ башчызы онойдо ок аймактыҥ тӧс јуртыныҥ тӧс тепсеҥин шиҥдеп кӧргӧн. Ол «Жилье и городская среда» деген нацӱлекердиҥ программазын бӱдӱрери аайынча јазалган: экрандарлу сцена тургузылган, такталарла, урналарла, велопарковкала јеткилделген ле чеденделген.

«Мында государствоныҥ, бизнестиҥ ле јербойыныҥ ӧмӧ-јӧмӧ ижи јакшынак јозок болуп јат. Ӧмӧ-јӧмӧ иштиҥ амадузы — тӧрӧл јурты јаранып ӧзӧри» — деп айтты. Программа аайынча быјыл Кош-Агашта муниципал тӧзӧлмӧлӧр ортодо эҥ баштапкы фонтанду скверди јазаар иш башталган. Мында јойу улустыҥ јӱретен јолдоры јазалган, такталар, урналар тургузылып  чеденделген ле оромды јарыдар эп-арга база тургузылган.

Сквердеҥ ыраак јокто, «Демография» деп нацӱлекердиҥ «Спорт — јӱрӱмниҥ ээжизи» деген программазы аайынча, физкультураныҥ ла су-кадыктыҥ ачык бӱдӱмдӱ комплекси јазалар. Мында оромныҥ хоккейный  бортторын тургузар, јалаҥды искусственный эдимле бӱркеер, тренажерлорды ла 100 јерлӱ трибунаны тургузар, јӱгӱретен јолдорды ла улус уштынар-кийинер јерлерди јазаар иш темдектелет.

«Бу объектти бу ла јылда бӱдӱрип салары темдектелген, је коронавирустыҥ пандемиязынаҥ улам иш эмеш тутакталды. Бис келер јайда объект бӱткӱлинче белен болор ло Кош-Агаш аймактыҥ эл-јонында, айылчыларында спорттыҥ башка-башка бӱдӱмдериле тазыктырынар, маргаандарды ӧткӱрер арга болорына иженедис, сакыйдыс» — деп, республиканыҥ башчызы айтты.

Бу јол-јорык ӧйинде башчы онойдо ок Јазатыр јурттыҥ јааны Альберт Каменовко јурт јеезениҥ керек-јарактарына јаҥы трактордыҥ ла аймактыҥ спортчыларына «Форд Транзит» микроавтобустыҥ тӱлкӱӱрлерин табыштырды.

Аймактыҥ тӧс јуртында ол аймактыҥ јашӧскӱриминиҥ активиниҥ чыгартулу улузыла тушташты. Олор Россияныҥ МВД-зыныҥ Барнаулдагы юридический институдыныҥ бежинчи курсыныҥ ӱренеечизи Салимжан Советханов, Кӧкӧрӱдеҥ «Солоҥы» детсадтыҥ таскадаачызы Айсулу Майхиева, аймактыҥ «Эре-Чуйдыҥ таҥдагы» газединиҥ корреспонденти Лиана Кумашова, аймактыҥ јурт јеезелер ортодогы тӧс библиотечный системазыныҥ ишчилери Сабыржан Абзиев, Азамат Аргинов ло Аймерген Нурслямов.