Настройки отображения

Размер шрифта:
Цвета сайта:
Ностройка изображения
Ностройка изображения

Настройки

Алтайдын Чолмоны

Јонјӱрӱмдик объекттердиҥ ижин шиҥдеп кӧргӧн

22.12.2020

Алтай Республиканыҥ башчызы Олег Хорохордин Кош-Агаш аймакла ишмекчи јол-јорыкла бололо, Јаҥы Белтир, Тӧбӧлӧр, Кӧкӧрӱ, Чаган-Узун јурттардагы јонјӱрӱмдик учурлу объекттерди шиҥдеп кӧргӧн.

Культураныҥ туразын Јаҥы Белтирде «Культура» деген национальный ӱлекер аайынча тудары канайда ӧдӱп турганыныҥ аайын кӧргӧн. Тургуза ӧйдӧ тураныҥ стенелерин кӧдӱрип, стенелерди ӧрттӧҥ корыыр немеле сӱртӱп, ӧскӧ дӧ иштерди бӱдӱрип салган. Тышкартында канализацияла колбулу иш ӧткӱрилет. Строительдер анайда ок конструкция-немелерди келиштирте такып белетелген ӱлекер аайынча јуурын баштап, ӧрт болдыртпазыныҥ темир резервуарларыныҥ фундаменттерин тургузып койгон. Јылдыҥ учына јетире ӧйдиҥ туркунына тураныҥ јабынтызын јаап салары, тураныҥ тыштын јарандырары, јылутрассаны ӧткӱрери, ӧрт болдыртпазыныҥ резервуарларын белетеери темдектелип калган.

«Мында јайаандык, јайалталу улус јадып јат. Тургуза ӧйдӧ јурт јеезеде он клубный биригӱлер иштейт, олордоҥ тӧртӱзи балдарга, алтузы — јаан улуска ла јашӧскӱримге. Тудум иштер тӱгенген соҥында јербойында культураныҥ јӱрӱмин ӧскӱрер, јӧмӧӧр лӧ улус ӧйди тузалу ӧткӱрер јакшынак айалга болор» — деп, Олег Хорохордин айткан.

Бу объектти 2021 јылдыҥ учы кирезинде тузаланарына табыштырары планда темдектелип калган.

Тергеениҥ башкараачызы Тӧбӧлӧр јуртта 2019 јылда тудулган ФАП-тыҥ ижин шиҥдеп кӧргӧн. Прививкалар тургузар ла улус кӧрӧр кабинеттерле јеткилделген фельдшерско-акушерский пункт јурттыҥ 900-теҥ кӧп улузын јеткилдейт. Мындагы ишти фельдшер ле акушер бӱдӱрет.

«Јуртта јаҥы ФАП — улусты медицинаныҥ чыҥдыйы бийик болужыла текшилей јеткилдееринде јаан алтам. Бӱгӱн андый арга бар. Учреждение баштапкы медициналык болуш јетирерине керектӱ не-немелерле јеткилделип калган» — деп, Олег Хорохордин темдектеген.

Ээчиде туштажу Кӧкӧрӱниҥ орто ӱредӱлӱ школында болгон. Муниципал тӧзӧлмӧдӧ Кӧкӧрӱ јуртта орто ӱредӱлӱ школды јаҥыртары аайынча белен ӱлекер бар, ол государственный экспертизаны ӧдӱп салган. Ӱлекерде темдектелгениле, школдыҥ туразына уланты тудулар, анда спортзал ла ашкана, бӱгӱнги турадӧӧн кирер јылу переход болор.

Тергеениҥ башчызы андый улантыны тудары керектӱ бе эмезе керектӱ эмес пе деп шиҥдеп кӧрзин деген јакылта берген. Капитальный јазаш ӧткӱрер арганы база шиҥдеп кӧрзин деген. Мында куучын школдыҥ спортзалында душевой ло балдар уштынар-кийинер кыптарга керектӱ јер керегинде ӧдӧт.

Республиканыҥ башкараачызы Чаган-Узунда школдыҥ ӧдӱп јаткан јылда текшилей јазалган спортзалында болгон. Мындагы тудум иштер «Ӱредӱ» нацӱлекердиҥ «Кажы ла баланыҥ једими» деген тергеелик ӱлекери кеминде ӧткӧн. Олег Хорохордин анайда ок јурттыҥ 1946 јылда тудулган Культураныҥ туразыныҥ айалгазын шиҥдеп кӧргӧн. Тургуза ӧйдӧ ол аварийный айалгада турада иштейт, калганчы капремонты 2004 јылда ӧткӱрилген. Тергеениҥ башчызы тураны текшилей јазаары аайынча ишти ӧткӱрер арга барын-јогын кӧрзин деп јакылта берген.

Тергеениҥ башкараачызы Кош-Агаш аймакла ишмекчи јол-јорыгыныҥ учында Чуй сууда дамбаны шиҥдеп кӧргӧн. Гидротехнический јазалдыҥ — тошко удура дамбаныҥ — капремонты «Россия Федерацияныҥ сууээлемдик комплексиниҥ 2012-2020 јылдарда ӧзӱми» деген федерал адылу программаныҥ кеминде ӧткӧн болгон. Тургуза ӧйдӧ иштер бӱткен, объект тузаланарына табыштырылган. Јаҥы дамба 150-неҥ кӧп улус јадып турган Чаган-Узун јурттыҥ тураларын, кажаан-чедендерин, јонјӱрӱмдик учурлу инфраструктураныҥ объекттерин јайканнаҥ корыыр.

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина