Баштапкы ӱредӱчиге кереестиҥ ачылтазы

24.12.2020

Баштапкы ӱредӱчиге кереестиҥ ачылтазына учурлалган кӧдӱриҥи Горно-Алтайскта ӧтти.

Кӧдӱриҥиниҥ туружаачыларын Алтай Республиканыҥ башчызы Олег Хорохординниҥ адынаҥ АР-дыҥ башкарузыныҥ председателиниҥ ордынчызыныҥ молјуларын бӱдӱреечи Динара Култуева уткыган.

Ол бу кереестиҥ ӱлекериле колбулу иш-керектерде турушкан бастыра улуска быйан айткан. «Бу чындап та албатылык баштаҥкай, оны республиканыҥ албаты-јоны, аргачылар, тергеениҥ башкарузы јӧмӧгӧн. Кереестиҥ ӱлекерин бистиҥ јиит скульптор Арчын Баданов белетегени сӱӱнчилӱ» — деп, Динара Култуева айткан. Оныҥ аҥылап темдектегениле, кереес Горно-Алтайсктагы педколледжтиҥ — ӱредӱчилер белетеер јердиҥ јанында тургузылганы тереҥ учурлу. Бу ӱредӱлик заведение республикада текши ӱредӱниҥ ӱредӱчилерин 90 јылдыҥ туркунына белетеп јат.

«Кереес кажы ла кижиниҥ јӱрегине јуук. Кижи оны кӧрӱп, бойыныҥ јӱрӱминде тереҥ ле учурлу ис артыскан сӱӱген ӱредӱчизин эске алат. Бу кереестик јер: албаты-јон бистиҥ педагогторго быйанду болгонын кӧргӱзип, чечектерди оныҥ јанында салар аргалу» — деп, ол айткан.

Кӱндӱлӱ кайралдар табыштырары мында ок ӧткӧн. Алтай Республиканыҥ башчызыныҥ, башкарузыныҥ председателиниҥ Быйанду самаразы таҥынаҥ аргачы Арчын Бадановко, Горно-Алтайск каланыҥ администрациязыныҥ коммунальный ээлем аайынча башкартузыныҥ строительство ло капремонт јанынаҥ инженери Николай Берсеневко, «АДС-ЭЛИТ» ООО-ныҥ директоры Адалат Дунямали Оглы Султановко табыштырылган.

Уткуулду сӧзин Эл Курултайдыҥ ӱредӱ, культура, спорт, јашӧскӱримниҥ политиказы, јондык биригӱлер ле СМИ аайынча комитединиҥ председатели Наталья Екеева, Горно-Алтайсктыҥ администрациязыныҥ јааны Ольга Саврасова, ӱредӱликтиҥ текшироссиялык профсоюзыныҥ Алтай республикан организациязыныҥ председатели Юрий Тишков, «Алтай Республиканыҥ ӱредӱчилериниҥ биригӱзи» деген тергеелик јондык организацияныҥ председатели Светлана Тундинова айткан.

Уткуулду сӧстӧр айдылган кийнинеҥ керееске чечектер салылган.

Бистиҥ тергееде баштапкы ӱредӱчиге учурлалган кереес тургузары јанынаҥ баштаҥкайды ӱредӱликтиҥ системазыныҥ ишчилери эткен болгон. Бу баштаҥкайды ӱредӱликтиҥ профсоюзыныҥ чыгартулу улузы, тергеениҥ Ӱредӱчилериниҥ биригӱзи јӧмӧгӧн. «Баштапкы ӱредӱчиге кереес» деген килемјилик акция текши республика кеминде ӧткӧн. Тергеениҥ албаты-јоны, аргачылар бу кереести белетеерине 1 миллион салковойдоҥ кӧп акча кӧчӱрген.

Е. БУТУШЕВТИҤ фотојуругы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина