Озочылдарга кайралдар табыштырылган

25.01.2021

Чаган айдыҥ 22-чи кӱнинде бистиҥ тергеениҥ журналисттери, редакторлор, печатьтыҥ ижинде иштеп турган ишчилер Россияныҥ Печатьтыҥ ишчилериниҥ кӱнин темдектеп, Алтай Республиканыҥ башкарузынаҥ ла Эл Курултайынаҥ кайралдар ла уткуулдар алдылар. Алтай Республиканыҥ башчызы Олег Хорохордин ле Эл Курултайдыҥ председателиниҥ ижин бӱдӱреечи Герман Чепкин элбек јетирӱлер эдер эп-аргалардыҥ ишчилерине уткуулду ла быйанду сӧстӧрин айтты.

«Слер јаан учурлу ла сӱреен керектӱ иш бӱдӱрип јадыгар. Кажы ла кӱн тергееде болуп турган керектер керегинде чындык јетирӱлерди, государстволык органдарда болуп турган иштиҥ уч-турулталарын эл-јонго јетиредигер — деп, Олег Хорохордин темдектеген. —Анчада ла тӱӱкизиле 100 јашка једип барааткан «Алтайдыҥ Чолмоны» ла «Звезда Алтая» газеттер бу кире јаан ӧйдиҥ туркунына бойыныҥ бӱктеринде Туулу Алтайдыҥ албатызыныҥ јадын-јӱрӱмин, болгон јаан учурлу керектерин тӧкпӧй-чачпай бичиген. Бу јебрен јерде јуртаган ла иштеген јилбилӱ улустыҥ јӱрӱмдик јолдоры газеттердиҥ бӱктеринде артып калган. Бӱгӱн аймактардыҥ да газеттери улуска сӱреен керектӱ болуп калды. Олор кӱннеҥ кӱнге ижин ичкерледип, јарандырып, ӧйлӧ теҥ-тай барып јатканы сӱӱнчилӱ. Телекӧрӱлтениҥ ле радионыҥ журналисттериниҥ ижи там ла ӧҥжип, јаранып бараады. Текши республиканыҥ элбек јетирӱлер эдер эп-аргаларыныҥ ижиниҥ тӧс амадузы јаҥыс — тӧрӧл республиканыҥ ӧзӱмине иштеери, тӧрӧл јерин сӱӱри ле албатызын тооры. Бу кӱч ӧйдӧ журналисттер тергеениҥ улузына јетирӱлерди тӱрген-тӱкей јетирет. Анчада ла пандемияныҥ ӧйинде ооруны болдыртпазында слердиҥ чындык ижигерди темдектеерге јараар».

Тергеениҥ башкараачызы газеттердиҥ, телекӧрӱлтениҥ ле радионыҥ ишчилерине једимдӱ иш, бийик кӱӱн-санаа, кӧп кычыраачылар ла кӧрӧӧчилер, 2021 јылда эҥ ле артык јетирӱлер кӱӱнзеген.

Алтай Республиканыҥ Эл Курултайыныҥ председателиниҥ ижин бӱдӱреечи Герман Чепкин уткуулду сӧзинде тергеениҥ јетирӱлик телкеми там ла элбек, экпиндӱ ле бастыра јанынаҥ толо болуп бараатканын темдектеген. «Бойыныҥ курч бичимелдериле, јетирӱлериле журналисттер депутаттардыҥ ижине ајару эдип турганы јакшы. Бу айалгада депутат улус бар курч сурактарга бурылып, јетирӱлер канча ла кире ачык болзын деп амадап, иштенип јат. Бӱгӱн кажы ла журналист бойыныҥ кӧрӱм-шӱӱлтезин чыгара айдып, эбиреде болуп турган бастырајандай керектер керегинде толо јетирӱлер белетеерге амадап турганы мӧрлӱ. Бу айалгада тергеениҥ јасакчы органы ла СМИ-лердиҥ ишчилери экијандай эптӱ-јӧптӱ куучынга келип, кожо эрчимдӱ иштенип турганын темдектеер керек. Республиканыҥ эл-јонына јетирӱлерди тӧкпӧй-чачпай, тӱрген-тӱкей јетирип, депутаттардыҥ ижиле јууктада таныштырып турганы учун јаан быйаныс айдадыс. Кажы ла кӱн бӱдӱрип турган сӱреен керектӱ ле учурлу ижигерде једимдер ле ачык јолдор кӱӱнзейдим. Тӧрӧл тергеениҥ ӧзӱмине ууландырылган амадулу ижигер јаантайын быйанду болзын» — деп, Герман Чепкин айткан.

Адакыда кӱндӱлӱ кайралдар кӧдӱриҥилӱ айалгада табыштырылган. «Бис кожо» деп бастырароссиялык акцияныҥ ижинде эрчимдӱ турушканы учун Россия Федерацияныҥ Президентиниҥ кереес медалиле, Кӱндӱлӱ грамотазыла «Звезда Алтая» республикан газеттиҥ корреспонденти Наталья Антюфьева, «Эл Алтай» ГТРК-ныҥ директоры Татьяна Кончева, «Вестник Горно-Алтайска» газеттиҥ корреспонденти Светлана Костина, «Радио России Горно-Алтайск» радиостанцияныҥ корреспонденти Анастасия Попошева, «Сельчанка в Майминском районе» газеттиҥ редакторы Светлана Триянова, Алтай Республиканыҥ башчызыныҥ ла башкарузыныҥ Бирлик аппарадыныҥ башкараачызыныҥ ордынчызы, Алтай Республиканыҥ башчызыныҥ пресс-качызы Михаил Максимов кайралдаткан.

Профессионал ижинде једимдери, тергеениҥ СМИ-леринде ак-чек ижи учун Алтай Республиканыҥ Кӱндӱлӱ грамотазыла Оҥдой аймактыҥ «Ажуда» газединиҥ баш редакторы Анатолий Атаров, «Чемальский вестник» газеттиҥ корреспонденти Людмила Голонягина, «Уймонские вести» газеттиҥ корреспонденти Светлана Ковальчук, «Улаганныҥ солундары» газеттиҥ баш редакторыныҥ ордынчызы Татьяна Тадыева, «Эл Алтай» ГТРК-ныҥ корреспонденти Ольга Усольцева, Алтай Республиканыҥ башчызыныҥ ла башкарузыныҥ Бирлик аппарадыныҥ јетирӱлик политика аайынча башкартузыныҥ баш эксперт-специалисти Елена Прибытько кайралдаткан. Онойдо ок ижинде једимдери, профессионал узы учун Алтай Республиканыҥ башчызыныҥ, башкарузыныҥ председателиниҥ Быйанду самаразы «Звезда Алтая» республикан газеттиҥ компьютерный верстказыныҥ операторы Юлия Баландинага, Горно-Алтайсктыҥ типографиязыныҥ переплетчик-ишчизи Татьяна Кортинага, «Сельская новь» газеттиҥ дизайнери Наталья Скатовага табыштырылган. «Алтайдыҥ Чолмоны» ла «Звезда Алтая» республикан газеттерге бу байрамдык кӱнде јеҥил јорыкту кӧлӱктердиҥ сертификаттары табыштырылган.

Алтай Республиканыҥ Эл Курултайыныҥ председателиниҥ ижин бӱдӱреечи Герман Чепкин журналисттерди база уткып, парламенттиҥ кайралдарын табыштырган. Узак јылдарга бойыныҥ ижин ак-чек, бийик профессионал кеминде бӱдӱргени учун Эл Курултайдыҥ Кӱндӱлӱ грамотазыла «Вестник Горно-Алтайска» газеттиҥ корреспонденти Алексей Герасимов, «Ажуда» газеттиҥ корреспонденти Татьяна Егорова, «Эл Алтай» ГТРК-ныҥ кӧлӱктер аайынча бӧлӱгиниҥ јааны Людмила Кеденова, «Горно-Алтайская типография» ООО-ныҥ кадрлар аайынча инспекторы Ирина Семендеева, «Сельская новь» газеттиҥ редактор-директоры Руслана Таханова, «Сельчанка в Майминском районе» газеттиҥ редакторы Светлана Триянова кайралдаткан. Кажы ла јыл «Эл Курултайдыҥ председателиниҥ аҥылу сыйы» деп адалган ла республикан, аймактардыҥ газеттери ле телерадиокомпаниялар ортодо ӧткӱрилип турган конкурс-номинацияда јеҥӱчилдердиҥ аттары база адалган. Онойып, јыл туркунына Эл Курултайдыҥ ижин чындык кӱргӱзип, бастырајандай јетирӱлерди эл-јонго јетиргени учун Эл Курултайдыҥ Быйанду самаразы «Алтайдыҥ Чолмоны» республикан газеттиҥ ӧмӧлигине (баш редакторы Айсулу Кыйгасова), «Эл Алтай» ГТРК-ныҥ алтай редакциязыныҥ ӧмӧлигине (башкараачызы Ырысту Маркитанов), «Эл Алтай» ГТРК-ныҥ телеоператоры Артур Самыровко, «Звезда Алтая» республикан газеттиҥ фотокорреспонденти Владимир Суховко, «Горно-Алтайская типография» ООО-ныҥ ишчилери Алексей Тимофеевке ле Александр Фибинчукка, «Звезда Алтая» республикан газеттиҥ корреспонденти Галина Ясаковага табыштырылган.

Анчада ла ӧткӧн јыл журналисттерге кӱчке келишкен. Коронавирус оорула колбой, кӧп керектер, иш онлайн эп-аргалар ажыра ӧткӱрилген. Ӧмӧликтердиҥ ишчилери бойлоры да ооруга табарткан, је ол ок ӧйдӧ олор Роспотребшиҥжӱниҥ, су-кадыкты корыыры аайынча министерствоныҥ, оперштабтыҥ јетирӱлерин эл-јонго кажы ла кӱн јетирер учурлу болгон. Бойыныҥ бу профессионал учурын бир де тӱжӱрбей, ак-чек апарып, бойыныҥ ижин газеттердиҥ, радионыҥ ла телекӧрӱлтениҥ ишчилери бӱдӱрген. Оныҥ да учун бу кӧдӱриҥилӱ байрамдык кӱнде Алтай Республиканыҥ окылу јаҥдары журналисттерди уткыганы ла быйанду сӧстӧрин айтканы учурлу болды.

Јаҥы 2021 јыл ӧткӧн јылга кӧрӧ, эмеш табылу, јымжак башталганы улуска база ижемји берип јат. Уй јылда оору-јобол, чыгым ас болор, ӧзӱм, једимдер ле сӱӱнчилӱ керектер кӧп болор деп, бис ончобыс иженедис. Элбек јетирӱлер эдер эп-аргалардыҥ ишчилерин байрамыла база катап уткуйдыс!

А. МАЙМАНОВА

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина