Тӧрт муҥнаҥ кӧп кижи…

19.02.2021

Алтай Республиканыҥ башчызы Олег Хорохордин кочкор айдыҥ 15-чи кӱнинде коронавирус југуш ооруныҥ таркаарын болдыртпазы аайынча оперативный штабтыҥ јуунын ӧткӱрген.

«Ӧткӧн неделеде бу оорула оорыган учуралдардыҥ кеми 23 процентке јабызаган — 208 учурал темдектелген. Алтай Республика коронавирусла оорып турган учуралдары ас тергеелердиҥ тоозына турумкай кирип јат» — деп, башчы темдектеген.

Олег Хорохординниҥ айтканыла, бастыра ӧйдиҥ туркунына бу оорула тергееде 15939 кижи оорыган. Оноҥ эмденип алган улустыҥ тоозы аайынча проценттиҥ кеми бийиктейт ле 96,5 процентке јеткен. Јазылган улустыҥ тоозы 15384 кижи, ол тоодо ӧткӧн неделеде – 258. Бу оорудаҥ улам улус божогон јаҥы учуралдар темдектелбеген.

«Вакцинацияны тӧзӧмӧлдӱ ӧткӱретени бистиҥ тӧс амадубыс болуп артат. Бис темдектелген план аайынча иштердиҥ 5 процентин бӱдӱргенис. Тергееге келген вакцинаныҥ 80 процентинеҥ кӧбизин тузаланып салганыс» — деп, тергеениҥ башкараачызы айткан.

Алтай Республиканыҥ башкарузыныҥ председателиниҥ ордынчызыныҥ молјула-рын бӱдӱрип турган Динара Култуеваныҥ јетиргениле, республикага коронавирустаҥ 5302 доза вакцина келген. Тургуза ӧйдӧ вакцина тургустырган улустыҥ тоозы 4307 кижи, ол тоодо 1271 кижи вакцинаныҥ компоненттериниҥ экӱлезин тургустырган болуп јат. Келер јуук ӧйдӧ тергееге база 1,1 муҥ доза вакцина келерин ол айткан. Келген вакцина Оҥдой, Чамал, Турачак, Шабалин, Улаган, Чой аймактарда бӱткӱлинче тузаланылган.

Вакцинация аайынча јаан иш Кош-Агаш аймакта ӧдӧт. Анда улус чума оорудаҥ база вакцина тургустыртат. Не дезе, аймактыҥ јеринде бу ооруныҥ ар-бӱткендик очагы бар болуп јат. Чумадаҥ прививкаларды озо баштап балдар ла коронавирустаҥ эмденген јаан улус аладылар. Коронавирустаҥ эл-јонныҥ вакцинациязын ӧткӱрерге олорды јурт јерлердеҥ аймактыҥ тӧс јуртына тартып экелери темдектелет.

АР-дыҥ иш, јонјӱрӱмдик ӧзӱм ле эл-јонды ишле јеткилдеери аайынча министри Адар Суминниҥ јетиргениле, «Демография» нацӱлекердиҥ «Јаан јашту ӱйе» деп адалган ӱлекери аайынча республиканыҥ аймактарында тӧзӧлгӧн мобильный бригадалар коронавирустаҥ прививка тургустырарга кӱӱнзеген 60 јаштаҥ ашкан улусты медучреждениелерге јетирер.

АР-дыҥ су-кадыкты корыыры аайынча министри Сергей Коваленконыҥ айтканыла болзо, коронавирусту улусты эмдеерге алты медицинский организацияда 285 орын бар. Бӱгӱнги кӱнге јетире олордоҥ 207 орын бош эмес, бош орындардыҥ тоо-фондыныҥ кеми 27 процент.

АР-дыҥ башкарузыныҥ председателиниҥ ордынчызыныҥ молјуларын бӱдӱреечи, АР-дыҥ башчызыныҥ ла башкарузыныҥ бирлик аппарадыныҥ башкараачызы Михаил Маргачев тергеениҥ муниципал тӧзӧлмӧлӧринде эпидемияны болдыртпас режимниҥ некелтелерин бӱдӱрери аайынча кандый рейдовый керек-јарактар ӧдӱп турганын айткан.

Оныҥ темдектегениле, калганчы неделе туркунына 508 шиҥжӱ иш ӧткӱрилген. Олордыҥ турулталары аайынча административный 61 протокол тургузылган. Ол бу ууламјыда Горно-Алтайск каланыҥ, Кӧксуу-Оозы ла Чой аймактардыҥ администрациялары јакшы иштеп турганын темдектеген.

Ӱредӱлӱ организациялардагы айалга керегинде тергеениҥ ӱредӱ ле билим аайынча министриниҥ баштапкы ордынчызы Екатерина Чандыева јетирӱ эткен.

Бӱгӱнги кӱнге јетире Јолодо Э. М. Палкин-ниҥ адыла адалган школдыҥ «Кайыҥаш» садигинде ле Ӱстиги-Апшуйактуда В. И. Чаптыновтыҥ адыла адалган школдыҥ «Карычак» садигинде, анайда ок Маймадагы јуртээлемдик техникумда толо кирелендириштер кийдирилген. 12 школдо 18 класска толо эмес кирелендириштер эдилген, олордоҥ 11 школдыҥ 16 клазында коронавирус аайынча.

Тергеениҥ баш санитар врачы Леонид Щучинов коруланар керек-јарактарды, ол тоодо масочный режимди буспас керек болгонын айткан. Ол анайда ок вакцинация аайынча јетирӱ-јартамал иш јаан учурлу болгонын темдектеген.

Олег Хорохордин муниципал тӧзӧлмӧ-лӧрдиҥ јаандарына кирелендириштиҥ керек-јарактарын бӱдӱрерин јаан ајаруда тутсын деп јакарган.

«Оорып тургандардыҥ тоозы астаары аайынча тоо-динамика бисте јакшы. Кирелендириш аайынча ӧткӱрилип турган керек-јарактар астаган. Је олор јаан учурлу. Бис олорды буспай бӱдӱрзеес, удабастаҥ јаҥжыккан јадын-јӱрӱмге келерис» — деп, ол темдектеген.

АР-дыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина