«Единая Россия» кандидадын адаган

01.03.2021

Кочкор айдыҥ 26-чы кӱнинде Павел Кучияктыҥ адыла адалган эл театрдыҥ конференц-залында «Единая Россия» партияныҥ Алтай Республикадагы тергеелик бӧлӱгиниҥ одус биринчи конференциязы ӧткӧн. Конференцияныҥ ижин партияныҥ тергеелик бӧлӱгиниҥ качызы Татьяна Гигель башкарып ӧткӱрген. Оныҥ ижинде Алтай Республиканыҥ башчызы, башкарузыныҥ председатели Олег Хорохордин турушкан.

Коронавирустыҥ пандемиязыла колбой быјыл бисте кӧп токтодулар болгонын бастыра улус јакшы билер. Оноҥ улам «Единая Россия» партияныҥ да тергеелик бӧлӱгинде элбек кемдӱ мындый јуундар узак ӧйгӧ ӧтпӧгӧн. Ол керегинде бӱгӱн айтпас арга, байла, јок. Айдарда, бу конференцияны коронавирус бистиҥ тергееде эмеш киреленген кийнинде ӧткӧн баштапкы јаан политикалык ла јондык керек-јарак деп темдектеер керек. Республиканыҥ бастыра аймактарынаҥ келген делегаттар ол кӱн конференцияда партияныҥ ижиле колбулу алты суракты шӱӱшкендер ле партияныҥ тергеелик бӧлӱгиниҥ 2020 јылда бӱдӱрген иштериниҥ турулталарын кӧргӧндӧр.

Республиканыҥ башчызы Олег Хорохордин јуунныҥ ачылтазында уткуулду сӧс айдып, оныҥ туружаачыларына једимдӱ иш кӱӱнзеген. Конференцияда анайда ок партияныҥ тергеелик политсоведине јаҥы турчылар тудулган. Јажытту ӱнберишле политсоветке Эл Курултайдыҥ депутаттары Артур Кохоев, Владислав Рябченко ло башкаруныҥ баштапкы вице-премьери Эжер Ялбаков ӧткӧндӧр. Мында ла тергеелик бӧлӱктиҥ эрчимдӱ иштӱ турчыларына Быйанду самаралар ла кереес сыйлар табыштырылган.

Конференцияда делегаттардыҥ кӱӱн-санаазын анчада ла адакы алтынчы сурак тыҥ јилбиркеткен ле кӱйбӱреткен деп айдар керек. Јуунныҥ сыраҥай ла учында «Единая Россия» партияныҥ тергеелик бӧлӱгиниҥ адынаҥ Алтай Республиканыҥ Эл Курултайыныҥ председателиниҥ јамызына тудулатан кандидатты талдап кӧстӧӧр сурак шӱӱжилген ле кӧрӱлген. Талдаштардыҥ ээжилери аайынча јажытту ӱнбериштиҥ бюллетенине эки кандидаттыҥ — Артур Кохоевтиҥ ле Айдар Мызинниҥ ады-јолдоры кийдирилген. Ӱнбериште Айдар Кохоев јеҥген. Ол учун ӱндерин партияныҥ тӧртӧн турчызы берген.

Јуунда анайып, бирлик ӱнле, парламенттиҥ экономика, акча-манат ла каландар аайынча политиказыныҥ комитединиҥ јааны Артур Кохоевти Алтай Республиканыҥ Эл Курултайыныҥ председателиниҥ јамызына кӧстӧӧр јӧп јарадылган. Республиканыҥ башчызы бу баштаҥкайды јарадып, ӧктӧм, эрчимдӱ ле ченемелдӱ јиит кижи тергеениҥ бастыра ийделерин бириктирип, тулаан айдыҥ тӧртинчи кӱнинде ӧдӧтӧн сессияда Эл Курултайдыҥ председателиниҥ јамызына јазымы јогынаҥ тудуларына иженип турганы керегинде айткан.

Олег Хорохордин Артур Павловичте республиканыҥ бӱдӱреечи ле јасакчы органдарында иштеген байлык ченемел бар деп темдектеген. Эл Курултайдыҥ јуук кӱндерде болотон сессиязында тергеениҥ јасакчы органыныҥ председателиниҥ сурагы кӧрӱлип јӧптӧлӧтӧни биске сӱрекей учурлу ла каруулу керек-јарак болуп јат. Эл Курултайдыҥ јаанына тургузылган кижидеҥ јаҥыс та јасакчы јаҥныҥ ижи камаанду болор эмес, је анайда ок оныҥ ижиниҥ ууламјызынаҥ республиканыҥ текши политикалык айалгазы кӧнӱ камаанду болор. Депутаттар «Единая Россия» партияныҥ тергеелик бӧлӱгиниҥ кӧстӧгӧн кандидатуразын сессияда јӧмӧӧрине бӱдӱп турганы керегинде айткан.

Конференцияда Алтай Республиканыҥ депутаттары Григорий Пильтин, Михаил Терехов ло ӧскӧлӧри де партияныҥ тергеелик бӧлӱгиниҥ политсовединиҥ чыгарган јӧбин јарадып, парламенттиҥ спикерине кӧстӧлгӧн кандидатты бастыра јанынаҥ јарадып ла јӧмӧп тургандары керегинде айткандар.

Артур Кохоев 1982 јылдыҥ кичӱ изӱ айыныҥ 1-кы кӱнинде Горно-Алтайскта чыккан. 38 јашту јиит политик Новосибирскте экономиканыҥ ла башкартуныҥ государственный академиязын божодып, «акча-манат ла кредиттер» деген специальность алган. 2005 јылдаҥ ала тергеениҥ башкарузыныҥ керектери аайынча бӧлӱгиниҥ экономисти, кийнинде бу ведомствоныҥ баш специалисти болуп иштеген. Алтай Республиканыҥ председателиниҥ баштапкы ордынчызыныҥ болушчызы болгон. 2017 јылда башкаруныҥ председателиниҥ ордынчызыныҥ молјуларын бӱдӱрген. Тергеениҥ иш ле јонјӱрӱмдик ӧзӱм аайынча министриниҥ ордынчызы, башкаруныҥ аппарадыныҥ башкараачызы болуп иштеген. 2019 јылда ӧткӧн талдаштарда бир мандатту 2-чи таҥмалу округта јеҥӱ алып, Эл Курултайдыҥ депутадына ӧткӧн лӧ парламенттиҥ экономика аайынча комитединиҥ јаанына тудулган.

Артур Кохоевтиҥ кандидатуразы эмди парламенттиҥ комитеттеринде шӱӱжилер ле Эл Курултайдыҥ тулаан айдыҥ тӧртинчи кӱнинде ӧдӧтӧн ээчий сессиязында кӧрӱлерине чыгарылар.

П. КАБАР

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина