Алтайдын Чолмоны

Ӱй улустыҥ албатылар ортодо байрамы темдектелген

11.03.2021

Ӱй улустыҥ телекейлик кӱнине учурлалган кӧдӱриҥилӱ керек-јарак тулаан айдыҥ 5-чи кӱнинде ӧтти. Эпшилерди байрамла Алтай Республиканыҥ башчызы Олег Хорохордин уткуды.

«Бу байрамды бис анчада ла јылу, јаркынду ла сӱӱнчилӱ кӱӱн-санаалу темдектейдис. Нениҥ учун дезе кажыбыстыҥ ла јӱрӱминде эҥ куулгазынду ла јакшы керектер ӱй улусла колбулу — сӱӱш, јараш, эрчимдӱ кӱӱн-тап, јалакайдыҥ ла јакшыныҥ сезими, ӧзӧк-буурдыҥ јылузы» — деп, тергеени башкараачызы айтты.

Олег Хорохордин 8 Марттыҥ байрамы кижиликтиҥ эҥ артык јарымына база катап быйанысты айдар јакшынак арга болуп турганын ајарды.

«Эне-эпшилерге — јабыс эҥчейгенис ле уткуулыс. Јаан тоомјыбыс кӧп балдарлу энелерге — ончо јӱрӱмин балдарга учурлаган чындык, ат-нерелӱ улуска. Тергеебисте андый энелер кӧп. Кӧп балдар чыдадып јаткан билелердиҥ тоозы јылдыҥ ла кӧптӧп јат. Эм тургуза олордыҥ тоозы 8778, ондо 29582 бала чыдап јат. Беш ле оноҥ кӧп балдарын јозокту чыдаткан 947 эпшиге «Быйанду Эне» деген кӱндӱлӱ ат адалган» — деп, ол айтты.

Олег Хорохордин онойдо ок эмдиги ӧйдӧ экономикада, медицинада, ӱредӱликте, культурада ла оноҥ до башка кажы ла бӧлӱкте ӱй улус јок деп сананып та болбозысты айтты. Кажы ла иште эпшилер бийик једимдерге једет. Ороондо уур-кӱч ӧйлӧрдӧ  эл-јон тӱбекке киргенде, эҥ ле озо болужын јетирерге ӱй улус турат ла ончо ченелтелерди турумкай ӧдӧт.

Тергеениҥ башчызы эпшилерге ырыс, су-кадык, сӱӱнчи, јаскы јаркынду кӱӱн-санаа кӱӱнзеди.

Алтай Республиканыҥ Эл Курултайыныҥ председатели Артур Кохоев јуулгандарды байрамла уткуды.

«Ончо албатыларда ӱй кижи јараштыҥ ла јалакайдыҥ, Јер ӱстинде јӱрӱмниҥ сӱр-темдеги болуп јат. Эҥ кызалаҥду ӧйлӧрдӧ бис болуш сурап, ӱй кижиге келедис — энебиске, карган энебиске, эш-нӧкӧриске, эје-сыйныска, айыл-јурттыҥ от-очогыныҥ јылузына јылынып аларга меҥдейдис. Јуук кижиниҥ эрке сӧзи, килегени ле јӧмӧшкӧни — биске јӱрӱмди јӱрерге, тартыжарга ла јеҥӱлер аларга болужып турганы ол» — деп, спикер темдектеди.

Онойдо ок ӱй улусты байрамла Государстволык Думаныҥ депутады Родион Букачаков уткуды.

Кӧдӱриҥилӱ айалгада кайралдар табыштырылды.

Россия Федерация телекӧрӱлтениҥ цифралык кемине кӧчӧриниҥ ӱлекерин бӱдӱреринде јаан камааны учун «Тӧрӧли алдында једимдери учун» орденниҥ экинчи степеньдӱ медалиле «Россиядагы телевизионный ла радиоберилте сеть» ФГУП-тыҥ «Алтай Республиканыҥ радиотелеберилте эдип  турган тӧс јери» филиалыныҥ бӧлӱгиниҥ јааны Анна Кулигина кайралдаткан.

Тӧрӧл культураныҥ ла санат ӧзӱминде јаан камааны, кӧп јылдарга једимдӱ ижи учун «Россия Федерацияныҥ культуразыныҥ нерелӱ ишчизи» деген кӱндӱлӱ атла чӱмдӱ бичик кепке базар «Алтын-Туу» деп байзыҥ-јурттыҥ художественный редакторы Чейнеш Мамашева адатты.

Тӧрӧл журналистиканыҥ ӧзӱминде једимдери ле кӧп јылдарга једимдӱ ижи учун «Россия Федерацияныҥ нерелӱ журналисти» деген кӱндӱлӱ ат «Алтайдыҥ Чолмоны» газеттиҥ корреспонденти Светлана Кыдыевага адалган.

Ӱредӱлик бӧлӱкте једимдери ле кӧп јылдарга ак-чек ижи учун Россия Федерацияныҥ Президентиниҥ быйанын Кан-Оозыныҥ Ч. К. Кыдрашевтиҥ адыла адалган орто ӱредӱлӱ школыныҥ ӱредӱчизи Людмила Тайдонова алды.

Россия Федерацияныҥ Конституциязына кубулталар эдери аайынча текшироссиялык ӱнберишти белетееринде ле ӧткӱреринде эрчимдӱ турушканы учун РФ-тыҥ Президентиниҥ Быйанду самаразы Майма аймактыҥ Культура ла јашӧскӱрим политика аайынча тӧс јериниҥ  јашӧскӱримле иштеер  специалисти Клавдия Землянскаяга, Алтай Республикада Јашӧскӱрим политика, граждандарды јуучыл-тӧрӧлчи кӱӱн-тапка таскадары ла черӱдеҥ озо белетеери аайынча тӧс јердиҥ директорыныҥ молјуларын бӱдӱреечи Надежда Лебедевага, Улаган аймакта Саратандагы Культураныҥ туразыныҥ художественный башкараачызы Эзенай Тойдоновага табыштырылган.

Билениҥ институдын тыҥыдарында једимдери ле балдарын јозокту таскатканы учун «Быйанду Эне» деген аҥылу темдекле Турачак аймактыҥ Тондош јуртында јаткан Любовь Ульчиекова кайралдаткан.

Педагогикалык ла таскамал иште, чыдап јаткан ӱйени белетееринде кӧп јылдарга једимдӱ ижи учун «Алтай Республиканыҥ нерелӱ ӱредӱчизи» деген кӱндӱлӱ ат Оҥдой аймактыҥ Алтыгы Талду јуртыныҥ орто школыныҥ баштамы класстарыныҥ ӱредӱчизи Галина Бадировага адалды.

Педагогикалык ла таскамал иште, чыдап јаткан ӱйени белетееринде кӧп јылдарга једимдӱ ижи учун «Алтай Республиканыҥ ӱредӱлигиниҥ нерелӱ ишчизи» деген кӱндӱлӱ ат балдардыҥ Горно-Алтайск каладагы компенсирующий бӱдӱмдӱ «Хрусталик» деген 3-чи таҥмалу садыныҥ таскадаачызы Галина Вишняковага адалды.

Культураныҥ ӧзӱминде камааны, эрчимдӱ јондык ла јайаандык ижи учун Алтай Республиканыҥ Кӱндӱлӱ грамотазыла эл-јонды јонјӱрӱмдик јанынаҥ јеткилдеер комплексный тӧс јердеги ветерандардыҥ «Огоньки» хорыныҥ туружаачызы, РСФСР-дыҥ культуразыныҥ нерелӱ ишчизи Зоя Мундусова кайралдатты.

АР-дыҥ башкарузыныҥ пресс-службазы