Кӧксуу-Оозы аймакта јонјӱрӱмдик јаҥы тудумдар

24.05.2021

Алтай Республиканыҥ башчызы, башкарузыныҥ председатели Олег Хорохордин кӱӱк айдыҥ 19-чы кӱнинде ишмекчи јол-јорыкла Кӧксуу-Оозы аймакка јӱрген.

Аймактыҥ тӧс јуртында Олег Хорохордин тудулып турган школдыҥ айалгазын шиҥдеп кӧргӧн. Кӧксуу-Оозында 275 бала ӱренер школ «Ӱредӱлик» деген эл ӱлекер аайынча тудулып јат.

2020 јылдыҥ јайында республиканыҥ башчызы школды тудар иштер канайда ӧткӧнин кӧрӱп јӱрген. Ол ӧйдӧ иш темдектелген ӧйдӧҥ соҥдоп турганы јарталган. Олег Хорохордин иштиҥ эрчимин тыҥыдар јакылта берген. Је јыл туркунына айалга бир эмеш ле кубулган.

Тергеениҥ башкараачызы тудум иштер ӧткӧн јерде подрядчиктиҥ ижин критикалаган. Кӧксуу-Оозы јуртта школды тудары 2019 јылдыҥ јаан изӱ айында башталган ла тургуза ӧйдӧ тудумныҥ технический белениниҥ кеми јӱк 40% болуп јат. Ӧткӧн шиҥжӱлерде јарталган једикпестер толо эмес тӱзедилет эмезе тӱзедилгени керегинде јӱк чаазындарда бичилет. Школды бӱдӱре тудар ӧй улайын узадылат.

«Слер бу ишти бӱдӱрерге не алганыгар? Бир јылга айалга тыҥ кубулганын мен кӧрбӧй јадым. Слерде миллиард салковойго турар јӧптӧжӱ, слер дезе тудуп болбой јадыгар. Уйатту болор керек» — деп, Олег Хорохордин подрядчикле куучын ӧйинде айткан.

Школды тударга чыгарган акчаны тузаланары республиканыҥ башчызыныҥ ла шиҥжӱ јаҥдардыҥ шиҥжӱзинде туруп јат.

«Школ кандый да айалгалардаҥ камааны јогынаҥ бӱдӱре тудулар. Эмдиги эмезе ӧскӧ подрядчикле бис оны тузаланарына табыштырарыс. Бу Кӧксуу-Оозы аймактыҥ эл-јоныныҥ ла ороонныҥ башкартузыныҥ алдында бистиҥ молјубыс» — деп, Олег Хорохордин угускан.

***

Јол-јорык ӧйинде тергеениҥ башкараачызы аймактыҥ Огневка јуртында фельдшерско-акушерский пунктты ачкан. Кӧдӱриҥиде АР-дыҥ су-кадыкты корыыры аайынча министриниҥ молјуларын бӱдӱрген Людмила Григоричева, тергеениҥ бӱдӱреечи ле јасакчы јаҥдарыныҥ чыгартулу улузы, јурттыҥ эл-јоны турушкан.

«Јаҥы ФАП — улуска сӱрекей керектӱ јонјӱрӱмдик тудум. Ол эмдиги ӧйдиҥ некелтелериле тудулган ла баштапкы медициналык болуш јетирерге ончо керектӱ не-немеле јепселген. ФАП Огневка ла Березовка јурттардыҥ 800 кире эл-јонын, ол тоодо 220 баланы јеткилдеер» — деп, республиканыҥ башчызы айткан.

Медициналык јеткилдешле тузаланары эл-јонго јеҥил ле јуук болоры аайынча Алтай Республикада јаан иш ӧткӧнин Олег Хорохордин темдектеген. «Су-кадыкты корыыры» эл ӱлекер аайынча 2020 јылда тергееде текши баазы 90 млн салковойго турар 16 фельдшерско-акушерский пункт тудулганын ол айткан.

Россияныҥ президенти В. В. Путин Федерал Јуунга быјылгы Баштанузында аҥылу ајаруны јурттарда ФАП-тар тударына, су-кадыкты корыырыныҥ кажы ла кижи, кажы ла биле баштанып турган баштамы ӱйезине эдери сӱрекей керектӱ болгонын угусканын АР-дыҥ башчызы темдектеген.

АР-дыҥ башчызыныҥ Быйанду самаразы Огневка јурттыҥ ФАП-ыныҥ заведующийи Елена Ивановага ла медсестразы Людмила Табакаевага табыштырылган.

Олег Хорохордин јаҥы ФАП-тыҥ ачылтазыла колбой оныҥ материально-технический јеткилдежине 70 муҥ салковойдыҥ баазына турар сертификат табыштырган.

Тергеениҥ башчызы анайда ок Кӧксуу-Оозы јуртта балдардыҥ «Радуга» деген садыныҥ кӧдӱриҥилӱ ачылтазында турушкан. «Демография» деген эл ӱлекер аайынча тудулган бу садикке 125 бала, ол тоодо ясляга јӱрер 60 болчом јӱрер аргалу. Јонјӱрӱмдик тудум ишке табыштырылганыла аймактыҥ тӧс јуртында балдардыҥ садигине очередь болбос.

«Балдардыҥ садтарын тудар элбек иштерди бис Россияныҥ президенти В. Путинниҥ 2021 јылдыҥ учына јетире ороондо балдардыҥ садтарыла кӱӱнзеген ончо улус јеткилделер учурлу деген јакыганыла бӱдӱредис. Эне кижи ишке чыгарга эмезе ӱренерге турза, балазын ӱренерге јажы јеткелек балдардыҥ учреждениезине кийдирерге тутак болбос учурлу» — деп, республиканыҥ башчызы айткан.

Алтай Республикада 2019 јылдаҥ ала 2021 јылга јетире 2360 бала јӱргедий 21 садик тудулары темдектелген. Бу иш бӱткениле тергеебистиҥ эл-јонында балазын садикке јӱргӱзери јанынаҥ сурак турбас деп, Олег Хорохордин темдектеген ле балдарга, педагогторго ло јурттыҥ эл-јонына су-кадык ла једимдер кӱӱнзеген.

АР-дыҥ башчызыныҥ Быйанду самараларыла «Радуга» детсадтыҥ таскадаачызы Наталья Шарыпова ла «Строительное управление-7» ООО-ныҥ генеральный директоры Евгений Бобров кайралдаткан. Балдардыҥ садына материально-технический тӧзӧлгӧзин јеткилдеерге 100 муҥ салковой акча табыштырылган.

Јуртта јонјӱрӱмдик јаҥы тудум ачылганыла уткуулдарын ӧткӧн кӧдӱриҥилерде анайда ок Кӧксуу-Оозы аймактыҥ башкартузыныҥ јааны Олег Кулигин ле Эл Курултайдыҥ депутады Мария Кабудыкова айткандар.

(АР-дыҥ башкарузыныҥ пресс-службазыныҥ јетиргениле)

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина