Пограничниктерди байрамыла уткуган

31.05.2021

Кӱӱк айдыҥ 28-чи кӱнинде Горно-Алтайскта Пограничниктиҥ кӱнине учурлалган кӧдӱриҥилӱ митинг ӧткӧн.

Тӱӱкини ајаруга алза, РСФСР-дыҥ пограничный каруулын тӧзӧӧри керегинде Декретти албаты-комиссарларыныҥ Соведи 1918 јылдыҥ кӱӱк айыныҥ 28-чи кӱнинде јараткан. Бу документте погранслужбаныҥ амадулары, тап-эриктери ле молјулары чокымдалган. Оноҥ учун бу кӱн погранслужбаныҥ тӧзӧлгӧниниҥ кӱни деп окылу темдектелет.

Кӧдӱриҥиде государственный јаҥныҥ бӱдӱреечи ле јасакчы органдарыныҥ чыгартулу улузы, Россияныҥ ФСБ-зыныҥ Алтай Республика аайынча пограничный башкартузыныҥ ишчилери, пограничный службаныҥ ветерандары, черӱчил-тӧрӧлчи клубтардыҥ турчылары турушкан.

«Пограничниктер јаантайын јаан тоомјыда. Пограничный службада тууразынаҥ кижи јок — пограничниктер чындап та чындык профессионалдар, билгирлери бийик, аҥылу белетениш ӧткӧн, кандый ла кызалаҥ айалгада каруулу болорын бойына алынып, керекти аайлаштырар аргалу, бойыныҥ Тӧрӧлине чындык улус» — деп, Алтай Республиканыҥ башчызы Олег Хорохордин кӧдӱриҥи тужында уткуулду сӧзинде аҥылап темдектеген.

Оныҥ айтканыла, черӱчил-пограничниктердиҥ мемориал комплексинде бойыныҥ служебный молјузын бӱдӱрип турала јӱрӱмин берген улустыҥ ады-јолдоры ӱргӱлјикке бичилген. «Бӱгӱн бис олордыҥ ат-нерези, јалтанбазы алдына бажысты эҥилтип турус. Јеҥ јастанып јыгылган геройлорго јаркынду ла ӱргӱлјик эзем, олордыҥ ат-нерези учун јаан быйан» — деп, тергеениҥ башкараачызы айткан.

Байрамга учурлалган уткуулду сӧстӧрин анайда ок Россияныҥ ФСБ-зыныҥ Алтай Республика аайынча пограничный башкартузыныҥ јааны Александр Кайгородов, пограничный службаныҥ ветерандарыныҥ бистиҥ республикадагы «Рубеж» деген јондык организациязыныҥ председатели Григорий Хабиев айткан.

Бу митинг ак-јарыктаҥ барган пограничниктерди эзедип бир минут унчыкпай турганыла, олорго учурлалган керееске чечектер салганыла тӱгенген.

Оноҥ озо кӱнде дезе П. В. Кучияктыҥ адыла адалган национальный драмтеатрда Пограничниктиҥ кӱнине учурлалган кӧдӱриҥи ӧткӧн.

Кӧдӱриҥилӱ јуунныҥ туружаачыларын байрамла тергеениҥ башчызы Олег Хорохордин, Эл Курултайдыҥ председатели Артур Кохоев ле ӧскӧ дӧ јамылу улус уткуган.

«Бӱгӱн бис Тӧрӧлистиҥ гран-кыйуларын быжу корулап тургандарды бийик тооп турганысты угузып јадыс. Бу службаныҥ ветерандарына ла пограничный башкартуныҥ ишчилерине олордыҥ бӱдӱрген ле бӱдӱрип турган кереги учун јаан быйанысты айдып турус. Черӱчил молјузын гран-кыйуны корулаар бӧлӱкте ӧткӧни јаантайын бийик тоомјыда, јаан государственный учурлу болгон. Ада-Тӧрӧл учун Улу јууныҥ јылдарында ӧштӱниҥ табарузына эҥ озо алдырткан, соҥында ӧйлӧрдӧ јуу-согуштарда турушкан пограничниктердиҥ турумкайы ла ат-нерези ӱргӱлјик эзем болуп артар.

Бу ла кече Эл Курултайда Пограничниктиҥ кӱнине учурлалган фотокӧрӱниҥ кӧдӱриҥилӱ ачылтазы болгон. Ол бистиҥ тергееде пограничный служба тӧзӧлгӧниниҥ 95 јылдыгына учурлалган. Депутаттар ла парламенттиҥ айылчылары погранслужбаныҥ ишчилериниҥ оперативно-служебный ижиниҥ солун ла јаркынду элестериле, олордыҥ јадын-јӱрӱминиҥ аҥылуларыла танышкан» — деп, Артур Кохоев айткан.

Спикердиҥ темдектегениле, гран-кыйуда черӱчил служба, анчада ла бистиҥ республикада, эҥ кӱч дегендердиҥ тоозына кирет. Бистиҥ тергее туулык тергее болгон учун ар-бӱткени де кату, государственный гран-кыйуныҥ узуны 800 километрдеҥ артыкташ. Анайда ок спикер пограничниктердиҥ јуук улузына олордыҥ чындыгы, турумкай кылык-јаҥы, бийик каруулу болгоны учун быйанын айткан.

Тергеениҥ башчызы Олег Хорохордин погранслужбаныҥ ишчилерине ле ветерандарына кайралдар табыштырган. Алтай Республиканыҥ Кӱндӱлӱ грамотазыла тергеелик погранбашкартуныҥ ишчизи Алексей Богодухов, Алтай Республиканыҥ башчызыныҥ Быйанду самараларыла пограничный службаныҥ ветерандарыныҥ бистиҥ республикадагы «Рубеж» деген јондык организациязыныҥ турчылары Владимир Евсеев, Алексей Белоусов, Александр Сарычев кайралдаткан.

Кӧдӱриҥилӱ јуунныҥ учында тергеениҥ артисттериниҥ ле погранбашкартуныҥ ишчилериниҥ турушканыла байрамдык ойын-концерт кӧргӱзилген.

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина