Алтайдын Чолмоны

Коронавирус ойто кӧптӧйт

03.06.2021

Алтай Республиканыҥ башчызы Олег Хорохордин коронавирусла тартыжар республикан оперативный штабтыҥ јуунын кӱӱк айдыҥ 31-чи кӱнинде видоконференцколбуныҥ бӱдӱм-аргазыла ӧткӱрген.

Тергеениҥ башкараачызы коронавирусла оорып турган улустыҥ тоозы республикада ойто кӧптӧп турганын темдектеген. Оныҥ айтканыла, ол тоо анчада ла ӧткӧн неделеде билдирлӱ бийиктеген. Окылу јетирӱлердеҥ кӧргӧндӧ, коронавирусла југушталган улустыҥ тоозы 38 процентке ӧскӧн. Башчы бастыра 108 учурал илезине чыгарылган, оноҥ озо ӧткӧн неделеде коронавирусла оорыган јетен сегис учурал темдектелген деп айткан.

Олег Хорохордин эҥ ле кӧп улус Кош-Агаш аймакта оорыган деп айткан. Бу аймакта коронавируска 53 кижи алдыртканы јарталган, онызы бу ӱзӱк ӧйдӧ оорыган улустыҥ јарымы кирези. Ӧткӧн неделеде Майма аймакта ла Горно-Алтайскта 22 кижинеҥ оорый берген, Чамал аймакта — тӧрт, Улаган аймакта — ӱч, Турачак ла Шабалин аймактарда эки учуралдаҥ темдектелген. Республиканыҥ башчызы анайда ок бистиҥ тергееге 30764 вакцина келген деп айткан. Ол тоодо — «Спутник V» деген 25934, «ЭпиВакКорона» деген 4050, «КовиВак» деген 780 вакциналар.

Алтай Республиканыҥ башкарузыныҥ председателиниҥ ордынчызыныҥ молјуларын удурумга бӱдӱрип турган Динара Култуева тургуза ӧйдӧ тергееде Бирлик государственный экзамендер ӧдӱп јат деп айткан. Ӱренчиктердиҥ адакы аттестациязы санитарный ла эпидемиологиялык неклетелерди бастыра јанынаҥ бӱдӱргениле ӧдӱп јат. Экзамендер табыштырып турган балдардыҥ эди-каныныҥ температуразы кемјилет, олор бой-бойынаҥ бӱдӱн-јарым метр ыраагында турар керек деген ээжини бӱдӱрет. Ончо пункттарда рециркуляторлор тургузылган. Персонал таҥынаҥ коруланар эдимдерле јеткилделген. Динара Култуева ӱредӱлӱ јылдыҥ учына учурлалган керек-јарактарда санитарный ла эпидемиологиялык айалгалардыҥ ээжилери база толо бӱдӱп јат деген. Башкаруныҥ председателиниҥ молјуларын удурумга бӱдӱреечи биске бу јуук кӱндерде база 6010 доза вакцина келер, олор муниципалиттер сайын ӱлелер деп айткан.

Су-кадыкты корыыры аайынча министрдиҥ молјуларын удурумга бӱдӱреечи Людмила Григоричева бисте коронавирусты эмдеер эки моногоспиталь иштеп јат деп айткан. Олордо јӱс орын тургузылган. Майма аймактыҥ эмчилигинде 70, СПИД-ле тартыжар тӧс јерде 30 орын бар. Тургуза ӧйдӧ јетен эки орын тузаланылып јат, тузаланышта эмес јайым орындардыҥ тоо-фонды — 28 процент. Л. Григоричеваныҥ айтканыла, бу неделеде Майма аймактыҥ эмчилигинде ӱзеери база јирме орын тургузылар.

Су-кадыктыҥ министриниҥ молјуларын удурумга бӱдӱреечи анайда ок республикада вакцинацияныҥ 67 пункты иштеп јат деп айткан. Ол эмди улуска вакцинацияны иштиҥ кийнинде эҥирде тургузарга база јараар деген. Каланыҥ поликлиниказы иштеер кӱндерде коронавирустаҥ вакцинацияны эртен тура сегис сааттаҥ ала эҥирдиҥ јирме саадына јетире ӧткӱрип јат. Амыраар кӱндерде прививкалар эдер кабинеттер 9 сааттаҥ ала 13 саатка јетире иштейт. Маймада кабинет тегин кӱндерде 8 сааттаҥ ала 19 саатка јетире, амыраар кӱндерде 8 сааттаҥ ала 13 саатка јетире иштеп јат. Л. Григоричева тургуза ӧйдӧ вакцинация Оҥдой, Шабалин ле Турачак аймактарда јакшы ӧдӱп турганын темдектеген. Майма, Кан-Оозы ла Кӧксуу-Оозы аймактарда дезе бу иш эмеш когыс тӧзӧлгӧн.

Алтай Республиканыҥ башкарузыныҥ председателиниҥ ордынчызы, Алтай Республиканыҥ башчызыныҥ ла башкарузыныҥ Аппарадыныҥ башкараачызы Михаил Маргачев муниципал тӧзӧлмӧлӧрдиҥ администрациялары эпидемиологиялык ээжилерди бӱдӱрери јанынаҥ 406 рейд ӧткӱргендер, оныҥ турулталарыла ээжилерди бусканы учун 78 протокол тургузылган деп айткан.

Тергеениҥ баш санитар врачы Леонид Щучинов республикада санитар ла эпидемиологиялык некелтелер канайда бӱдӱп турганы керегинде куучындаган. Бу јылдыҥ башталганынаҥ ала 2559 объектте шиҥжӱлӱ иштер ӧткӧн лӧ ол јанынаҥ 974 протокол тургузылган. Леонид Щучинов анайда ок коронавирустыҥ Кош-Агаш аймакта кӧптӧгӧн шылтактарын јартаган. Ол бу аймакта  санитар ла эпидемиологиялык ээжилер улайын бузулып, элбек эл-јон туружып турган керек-јарактар јаантайын ӧткӱрилип јат деп темдектеген.

Олег Хорохордин Кош-Агаш аймактыҥ администрациязынаҥ јербойындагы айалгалар ла ол јанынаҥ кандый иштер ӧткӱрилип турганы керегинде јетирӱ сакып турганы керегинде айткан. Ол анайда ок муниципал тӧзӧлмӧлӧрдиҥ јаандарына, государственный јаҥныҥ бӱдӱреечи органдарыныҥ башкараачыларына јербойында элбек эл-јонныҥ турушканыла ӧдӱп турган керек-јарактарды астадып, коронавирусла болуп турган айалгаларды бойлорыныҥ ајарузына алзын деп баштанган.

«Тургуза ӧйдӧ Алтай Республиканыҥ тӧзӧлгӧнинеҥ ала 30 ла алтай калыктыҥ Арасей тергееге бойыныҥ кӱӱниле киргенинеҥ ала 265 јылдыктарына белетенери аайынча јаан кемдӱ иштер ӧдӱп јат. Биске бу байрамдарды бийик кеминде ӧткӱрер керек. Оныла колбой коронавирусты таркадарын болдыртпазы јанынаҥ ончобыска эрчимдӱ иштеер керек. Ковидтеҥ коруланарыныҥ ээжилерин кыйалтазы јогынаҥ бӱдӱрип, маскаларды тузаланарын, дезинфекция ӧткӱрерин, социальный дистанцияны тударын бӱдӱрер керек» — деп, республиканыҥ башчызы айткан.

Алтай Республиканыҥ башкарузыныҥ пресс-службазы