Алтайдын Чолмоны

Јайгы эҥирдеги кӱӱлик элестер

18.06.2021

Эл театрдыҥ залы толо. Јакшынак концерттерге «суузап» калган, јараш кийинген улус оныҥ башталарын сакып, бой-бойын ајыктап, куучындажып, сакып отурды. Олордыҥ ортозында мен база болдым.

Театрдыҥ сценазы ачылып, Алтай Микстиҥ артисттери кожоҥын баштады. Олордыҥ кажызы ла сӱрлӱ, јаркынду кеп-кийимдӱ — кӧрӧргӧ кӧзиҥ сӱӱнер. Анчада ла Нина Колондинаны. Ол јаантайын мызылдууш сыргаларлу, чачын эптӱ јуунадып эмезе јайып алат. А кызыл ӧҥ ого кандый јакшы келижип јат! Ол кӧрӧӧчилерле колбу тудуп, олорды колчабыжуга кычырат.

Владимир Попошевтиҥ ле Батыр Тодошевтиҥ  номерлери јаантайын бијелӱ, сценаны толо алып турган кыймыгулу. Владимир танылу шляпазын кийип чыкса, сценада ыш јайыла берзе, туруп чыгала, кожо бијелеп ийер кӱӱниҥ келер. База ок шляпа кийип, бијеге кычырган кожоҥдорын ӱлекерде баштапкы катап Алия Кеберекова сыйлады.

Казах калыктыҥ культуразыла концертте аҥылу баритон ӱндӱ Азамат Есимов таныштырды. Алексей Жданов «Малиновый звон» кожоҥыла сӱӱндирди. Куманды тилле кожоҥ ӱренип, кӧрӧӧчилерди Элина Божко кайкатты. Коо ӱниле Улаганныҥ улу тууларына угаачыларды Эдуард Согоноков апарып келди. Оныҥ тӧрӧл јуртына учурлалган «Кара-Кујур» деп кожоҥы сценадаҥ баштапкы катап угулды. Солун атту, чичке јараш ӱндӱ Жанетта Тонова быјыл албатылар ортодо «Ступень к успеху» деген конкурстыҥ баштапкы степеньдӱ лауреады болуп чыккан. Бу ӱлекерде ол кӧрӧӧчилерге «Солнышко» ло «Астыккан јӱрек» деп кожоҥдор сыйлады.

Эҥ ле тыҥ колчабыжулар Муслим Магомаевтиҥ «Синяя вечность» деп кожоҥына учурлалды ошкош. Бу кожоҥ јарлу кожоҥчыныҥ јайаандыгыныҥ эҥ артык кожоҥдорыныҥ бирӱзи болгон. Ондый ок ӧткӱн, ийделӱ эдип оны Алтайыстыҥ јайалталу уулы Арслан Абудов кожоҥдоды.

Алтай Миксте баштапкы катап Роман Сандяев турушты. Јиит уул быјыл тергеениҥ медициналык колледжин божоткон. Роман сценага ап-ак алтай кеп-кийимдӱ чыгып, бойы чӱмдеген «Алтын кӱс» деген кожоҥын кожоҥдоды. Ого кӧрӧӧчилер база тыҥ колчабыштылар.

Эпидемиологиялык кирелендириштерле кожо эл-јон бир эмеш «тоҥуп» калган деп билдирди — «Браво!» деген кыйгы, оноҥ тыҥ колчабыжулар јетпей турды. Ого ӱзеери јанымда отурган спортивный кийимдӱ јиит уулга бир эмеш кыјыраҥтыдым деп чынын айдайын. Не дезе, тергеебистиҥ сок јаҥыс театрына, мындый јараш јерге келип јадала, бир эмеш те болзо јаранып, јазанып, байрамга чылап келгем не. Андый да болзо, залдаҥ јакшы санаа-кӱӱндӱ, та кандый да јаҥы тыныш алынгандый чыктым.

Алтай Микс ӱлекердиҥ бу јаҥы сезоны Алтай Республика  тӧзӧлгӧниниҥ  30 ла алтай албаты бойы-ныҥ кӱӱниле Россияга киргениниҥ 265 јылдыктарына учурлалган. Оныҥ концерти тӧс калабыстаҥ башталды. Коронавирус југуш оорула айалга мынаҥ ары оҥдолып, сӱӱген артисттерис јурт јерлерде де јаркынду  концерттер берер деп иженедис.

Кӧрӧӧчи