В. И. Чаптыновко кереес тургузылган

06.07.2021

Тергеениҥ башчызы Олег Хорохордин јаан изӱ айдыҥ 3-чи кӱнинде, Алтай Республиканыҥ тӧзӧлгӧнинеҥ ала одус јылдыгы темдектелген кӱнде, јарлу политик ле республиканыҥ баштапкы башчызы болгон Валерий Иванович Чаптыновко учурлалган кереести ачкан.

Горно-Алтайск каланыҥ тӧс тепсеҥиниҥ паркында тургузылган кереестиҥ ачылтазында государственный јаҥныҥ бӱдӱреечи ле јасакчы органдарыныҥ чыгартулу улузы, госслужбаныҥ ветерандары, общественный кыймыгулардыҥ чыгартулу улузы, Валерий Чаптыновтыҥ тӧрӧӧн-туугандары ла јуук улузы турушкандар. Кереестиҥ ӱлекериле јиит јурукчы-скульптор Арчын Баданов иштеген.

Олег Хорохордин: «Бис былтыр Туулу Алтай автономный областьты реформалардыҥ ла јаҥыртулардыҥ кӱч ӧйинде башкарып, ого государственный учур берерине бастыра кӱчин берип иштеген бу кижиниҥ чыкканынаҥ ала 75 јылдыгын темдектегенис» — деп айткан. Ол анайда ок јӱрӱминиҥ калганчы кӱнине јетире бойыныҥ кичӱ тӧрӧлине чындык болуп арткан, оныҥ ӧзӱмине иштеген Валерий Иванович Чаптыновты јерлештери јылу эске алынып јадылар деп темдектеген.

Республиканыҥ башчызы бу кижиниҥ адыла јурттарда оромдор, ӱредӱниҥ ле культураныҥ учреждениелери адалган, бӱгӱн дезе, оныҥ јӱткӱмелиле тӧзӧлгӧн республиканыҥ одус јылдыгында, бис оныҥ эземин кереестеп артыргызар база бир алтам эдип јадыс деген. Олег Хорохордин былтыр бу кереести тургузары керегинде јӧп чыгып турарда, Валерий Ивановичтиҥ кичӱ тӧрӧли Шабалин аймакта Ӱстиги Апшыйакту јуртта тӧзӧлгӧн музейди јетире тударын јеткилдеер аргалар табары јанынаҥ јакылта база берилгенин эзеткен. «Мында тудум иштер тӱгенген, керектӱ эдим-јазалдар алылган, тургуза ӧйдӧ музейдиҥ тыштын арутап јарандырары аайынча иштер ӧдӱп јат. Музей ишке быјыл кӱскиде табыштырылар учурлу» —деп, башчы айтты.

Кереестиҥ ачылтазында јуулган улуска уткуулду сӧзиле анайда ок Алтай Республиканыҥ Эл Курултайыныҥ председатели Артур Кохоев баштанган. Ол бойыныҥ куучынында республиканыҥ тӱӱкизи Валерий Иванович Чаптыновтыҥ ады-јолыла јуук колбулу деп темдектеген. Парламенттиҥ спикериниҥ айтканыла, Валерий Иванович Алтай Республиканы тӧзӧӧринде, оныҥ ичкери ӧскӧн јолында, тергеениҥ јасакчы јаҥын тӧзӧп тыҥыдарында тереҥ ис артыргыскан. Ол Валерий Иванович тереҥ тӧрӧлчи кӱӱндӱ кижи, тӧрӧл калыгыныҥ чындык уулы, республиканыҥ ла ороонныҥ салымы учун каруулу кижи болгонын темдектеген.

Республиканыҥ баштапкы башчызын бийик тооп, оныҥ кереезиниҥ ачылтазына келген јерлештерин Валерий Ивановичтиҥ эш-нӧкӧри Антонина Иосифовна Чаптынова база уткуган. Ол Валерий Иванович бийик јамыда да иштеген болзо, је јӱрӱмде ачык-јарык ла јалакай, билезин сӱӱген ле тоогон, энезиниҥ эрке уулы ла тӧрӧӧн-туугандарыныҥ кару кижизи, республиканыҥ эл-јонына килеҥкей ле буурзак кӱӱндӱ башкараачы болгон деп айткан. Антонина Чаптынова республиканыҥ башкараачыларына быйанду сӧстӧр айткан.

Кереестиҥ ачылтазында уткуулду сӧстӧрин анайда ок Горно-Алтайск каланыҥ администрациязыныҥ јааны Ольга Сафронова, 1994-1996 јылдарда Алтайский крайдыҥ губернаторы болгон Лев Коршунов, Алтай Республиканыҥ башчызыныҥ советниги Александр Манзыров, Государственный Думаныҥ депутады Иван Белеков, Алтай Республиканыҥ ветерандарыныҥ совединиҥ јааны Борис Алушкин ле кереести јазаган скульптор Арчын Баданов айткандар. Кереестиҥ ак кӧжӧгӧзи ачылган кийнинде, јуулган улус ого чечектер салган.

Алтай Республиканыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина