Јеткер болбозын јеткилдеечилер

12.07.2021

Горно-Алтайскта Алтай Республиканыҥ МВД-зыныҥ јолдордо јеткер болдыртпазын јеткилдеер инспекциязыныҥ тӧзӧлгӧнинеҥ ала 85 јылдыгына учурлалган кӧдӱриҥилӱ јуун ӧткӧн.

Бу кӧдӱриҥиде Алтай Республиканыҥ ичбойындагы керектериниҥ министри Александр Соловьев, УГИБДД-ныҥ јааны Анатолий Косинов, Алтай Республиканыҥ Эл Курултайыныҥ председатели Артур Кохоев, Алтай Республиканыҥ башкарузыныҥ председателиниҥ ордынчызы, республиканыҥ башчызыныҥ аппарадыныҥ башкараачызы Михаил Маргачев, Государственный Думаныҥ депутады Иван Белеков, ло ГИБДД-ныҥ подразделениезиниҥ ишчилери ле ветерандары турушкандар.

Александр Соловьев јуунныҥ туружаачыларын байрамла уткуп, тергеениҥ јолдорында јеткер болдыртпазын јеткилдеп турган башкартузыныҥ ишчилерине једимдер кӱӱнзеп, быйанду сӧстӧрин айткан. Министр Госавтоинспекция МВД-ныҥ бӧлӱгинде јаан учурлу службалардыҥ бирӱзи болуп јат деп темдектеген. Оныҥ айтканыла, јолдордо јеткер болбозын јеткилдеечилер бойлорыныҥ ижин ак-чек бӱдӱрип јадылар. Олор јолдорго ай-кӱнниҥ кандый ла айалгазында тӱндӱ-тӱштӱ чыгып, ээжилерди бускандарла карамы јогынаҥ тартыжадылар. Олор јеткерге учураган улуска болушка ончозынаҥ озо келип јадылар деп темдектеген.

Михаил Маргачев бойыныҥ уткуулында: «ГИБДД-ныҥ ишчилери Алтай Республиканыҥ јолдорында јеҥил эмес иш бӱдӱрип, кӧлӱкле јӱрген улустыҥ су-кадыгын кичееп јадылар. Олор анайда ок јолдо болгон јеткерлӱ учуралдардаҥ улам сынык-бычыкты болдыртпазы јанынаҥ јартамалду ишти ӧткӱрет. Кайда јеткерлӱ учуралдар — олор јаантайын анда. ГИБДД-ныҥ ишчилери берген чертине јаантайын чындык улус» — деп айткан. «Башкару јолдордо болуп турган јеткерлӱ айалгаларды астадарга бастыра кӱчин салып иштеп јат. Бистиҥ республикада «Јеткери јок чыҥдый јолдор» деген ӱлекер јаан јол алынган. Былтыр бу программа аайынча республикада тергеелик ле јербойындагы учурлу 130 километр јол јазалган. Быјыл дезе база 140 километр јол чыныкталып јазалары темдектелет» — деп айткан.

Башкаруныҥ председателиниҥ ордынчызы бу службаныҥ ветерандарына олордыҥ ак-чек ле јана баспас ижи учун алкыш-быйанын јетирген. Вице-премьер кӧдӱриҥилӱ јуунда кайралдар табыштырган. Службада јеткен бийик једимдери ле ГИБДД-ныҥ (ГАИ) тӧзӧлгӧнинеҥ ала 85 јылдыгыла колбой, ол Алтай Республиканыҥ башчызыныҥ, башкарузыныҥ председателиниҥ Быйанду самараларын ГИБДД-ныҥ ДПС-ныҥ аҥылу ротазыныҥ канцеляриязыныҥ инспекторы, полицияныҥ лейтенанты Елена Пискловага, ГИБДД-ныҥ башкартузында кӧлӱктердиҥ технический шиҥжӱзин ле регистрациязын ӧткӱрер ле экзамендер алар бӧлӱктиҥ государственный инспекторы, полицияныҥ капитаны Сергей Табертке табыштырган.

Јуунныҥ туружаачыларын байрамла анайда ок Артур Кохоев уткуган. Ол бистиҥ республикага туристтер сӱрекей кӧп келип турганын ла оныла колбой тергееге амыраарга келип турган улустыҥ тоозы јылдаҥ јылга там ла кӧптӧп турганын темдектеген. «Јолго чыккан улустыҥ су-кадыгы ла јӱрӱми ГИБДД-ныҥ ишчилериниҥ ак-чек ижинеҥ кӧнӱ камаанду. Мен Госавтоинспекцияныҥ личный составы ижин мынаҥ да ары турумкай бӱдӱрерине иженип турум» — деп, спикер айткан. Ол Эл Курултайдыҥ Быйанду самараларыла кӧлӱктердиҥ регистрациязын ӧткӱрер ле экзамендер алар аймактар ортодогы бӧлӱктиҥ јааны Максим Князевти ле ГИБДД-ныҥ ОРДПС-ыныҥ баштапкы взводыныҥ баш инспекторы Юрий Тельтерековты кайралдаган.

ГИБДД-ныҥ ишчилерине бойлорыныҥ уткуулдарын анайда ок Государственный Думаныҥ депутады Иван Белеков ло бу службаныҥ башкартузыныҥ јааны Анатолий Косинов айткандар. Кӧдӱриҥилӱ јуунда Госавтоинспекцияныҥ алтаннаҥ ажыра ишчилерине ле ветерандарына ӧрӧги адалган ведомствоныҥ грамоталары ла быйанду самаралары табыштырылган.

Алтай Республиканыҥ МВД-зыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина