Алтайдын Чолмоны

Айдыҥ эҥ эрчимдӱ волонтерлоры

10.08.2021

Куран айдыҥ 5-чи кӱнинде Алтай Республикада Бирлик волонтер штаб тӧзӧлгӧнинеҥ бери туй ла бир ай болды. Ондо тергеебистиҥ бойыныҥ кӱӱниле иштер бӱдӱрер он тӧзӧлмӧзи биригип иштейт. Баштапкы бир айдыҥ туркунына ӧткӧн иштиҥ турулталарын штабта кӧрдилер.

Штабта текши республикадаҥ 300 кире кижи иштейт. Олор јаҥыс ла коронавирусла колбой медишчилерге болужып турган эмес. Волонтерлор онойдо ок керектеп турган улуска адылу болуш јетирет, экологияны корыырында ла оноҥ до ӧскӧ иштерде туружат.

Ӧткӧн айдыҥ туркунына ӧмӧ-јӧмӧ иштеп, «Молодой Горный» кыймыгуныҥ ийде-кӱчиле 1500 сааттаҥ кӧп ӧйгӧ иштер эдилген. Бойыныҥ кӱӱниле иштер бӱдӱреечилер колл-тӧс јерде, кызу линияда, прививка тургузар кыптарда ла вакцинацияныҥ јерлеринде болушкандар. Ол керегинде окылу эмес айалгада ӧткӧн туштажуда  «Молодой Горный» кыймыгуныҥ башкараачызы Эркелей Бекова куучындады. Југуш оору таркабазын јеткилдеер иштерде эки келин эҥ эрчимдӱ турушкан, олор кажызы ла 160 сааттыҥ туркунына иштер бӱдӱрген. Чындап, келиндердиҥ бирӱзи кӧп балдарлу эне. Олор чылап ок эрчимдӱ иштеген эр — Евгений Тайборин. Ол автоволонтер болуп, кӧлӱгиле маҥтадып, эл-јонго болушкан. Волонтерлордыҥ штабыныҥ јааны Алена Кудачинова Ольга Бурцевага ла Ирина Кабаковага грамоталар табыштырып, быйанду сӧстӧр айтты.

Ай туркунына иштеринде волонтерлык штаб каланыҥ поликлиниказында пациенттерге јартамалду болуш јетирген, колл-тӧс јерде колбуда болгон, прививка эдер кыптарда эмчилерге болушкан, вакцинацияныҥ кӧчӱп јӱрер јерлеринде дежурство ӧткӧн, вакцинацияныҥ иштериле тергеениҥ ыраак турган јурттарына ӱч катап барып келген. Кажы ла моногоспитальда, тӱрген болуш јетирер јерлерде килемјиниҥ акцияларын ӧткӱрген (суу экелген, #Эмчилергебыйан деп баннер тургускан, чечектер, тату пирог сыйлаган), албатылык программага баштанулар јуурга јаҥыскандыра пикеттер ӧткӱрген, тергеениҥ тӧзӧмӧл группазына кирип, «борщ кайнадар набордыҥ» баазын шиҥжӱде тудат, экологиялык акцияларда туружат. Бир айга поликлиникада 21 волонтер 1500 сааттыҥ туркунына иштеген. Олордыҥ эҥ эрчимдӱлери М. А. Рылеева, У. Е. Смайлова, Ю. В. Махалина, А. А. Бехине, Э. В. Татаров, Н. С. Семина, А. П. Есипов, А. Плешкова, С. Е. Петухов, Л. Н. Рыспаева.

Волонтерлордыҥ экӱзи бир неделе иштеп ийеле, поликлиникага ишке кирип алган. Тургуза ӧйдӧ каникулдар болгонынаҥ улам волонтерлордыҥ тоозы астап калды.

Јондыкчылардыҥ туштажузында Алтай Республиканыҥ башкарузыныҥ председателиниҥ молјуларын удурумга бӱдӱреечи Динара Култуева ла тергеениҥ Муниципал тӧзӧлмӧлӧрдиҥ ассоциациязыныҥ председатели Роман Птицын турушкан. Олор волонтерлордыҥ акту кӱӱниле иштеп турганын бийик баалап, бойыныҥ ла республиканыҥ ончо эл-јоныныҥ адынаҥ јуулгандарга јаан быйанын айттылар. Волонтерлык бир канча ӱлекерлердиҥ баштаачызы болуп турган Роман Викторович эл-јонныҥ пандемия ӧйинде тӧзӧлгӧн бирлик кӱӱни ооруны јеҥген де кийнинде јоголбос деп иженгенин айтты.

Кайралдар табыштырылган, быйанду сӧстӧр айдылган кийнинде јуунныҥ туружаачылары чай ичип, иш ӧйиндеги учуралдар јанынаҥ куучындажып, келер ӧйгӧ пландар тургусты.

* * *

Россияда Бирлик волонтер штаб тӧзӧлгӧн. Ол партияныҥ, ОНФ-тыҥ, «Бис — кожо», Јеҥӱниҥ волонтерлорын, медик-волонтерлорды ла јиит гвардеецтерди бириктирген. Ол керегинде эпидемиологиялык айалга коомойтып турарда, кичӱ изӱ айдыҥ 29-чы кӱнинде јарлалган эди. Бирлик штаб мынаҥ озо иштеп келген волонтерлык тӧзӧлмӧлӧргӧ тайанып тӧзӧлгӧн. Ол медишчилерге ле болуш керектеген улуска болужып иштейт.

Алтай Республикада андый штабты «Единая Россия» партияныҥ волонтерлык тӧс јери тӧзӧгӧн. Ӧмӧ-јӧмӧ иште «Јиит Гвардия», АР-дыҥ Јашӧскӱрим парламенти, Волонтерлор-медиктер, Јеҥӱниҥ волонтерлоры, АР-да ОНФ, «Молодой Горный»,  АР-да Сибирьдиҥ јуучыл казачествозы, «Ару Алтай» јондык кыймыгу, АР-да Орус географиялык биригӱниҥ Јииттер клубы, коммерциялык эмес «Перспектива», Майманыҥ Культураныҥ тӧс јери ле «Алтайдыҥ ийдези» деген ресурсный тӧс јер ле оноҥ до ӧскӧлӧри туружадылар.

 Э. КУРГАРИНОВА