Алтайдын Чолмоны

Эземди чеберлеп алалы

12.10.2021

Акташтагы Станислав Моховтыҥ адыла адылган орто текши ӱредӱлӱ школдо «Эземди чеберлеп алалы» деген ӱлекер јӱрӱмде ичкери јолын алынып, эрчимдӱ бӱдет.

Солун ӱлекердиҥ тӧс туружаачылары «Јакшыны Сыйлайдым» деген отрядтыҥ волонтерлоры. Олор ӧдӱп јаткан јылда «Јакшы керек каникулдарга барбас» деген бастырароссиялык кӧрӱ-маргаанда јеҥӱчилдер болуп чыккан. Шак бу ӱлекер Ада-Тӧрӧл учун Улу јууны кӧргӧндӧрдиҥ, оны ӧткӧндӧрдиҥ — тылда иштегендердиҥ, јууныҥ балдарыныҥ јеҥил эмес салымын ӱренчиктер, јаан улус кыракы ӱренип ле эзедип јӱрерине ууламјылалган.
Оныҥ шылтузында ӱлекерди јӱрӱмде бӱдӱреечилер — волонтерлордыҥ «Јакшыны Сыйлайдым» («БлагоДарю») деген отрядыныҥ балдары калганчы айлардыҥ туркунына «Эзем тирӱ» деген видеофильмди белетеери аайынча ишти эрчимдӱ ӧткӱрет. Видеофильмде тылда иштегендер, јууныҥ балдары бойлорыныҥ салымы, турумкайы, јалтанбазы керегинде куучындагылайт. Волонтерлор С. М. Каташевага, Н. И. Кривельскаяга, В. Ф. Лямкинага, Г. П. Буньковага,
Г. А. Поповага, А. Г. Зиминге, Л. А. Оминага, А. М. Турганбаевке, В. А. Логиновага, Т. И. Каташевага айылдап јӱрдилер. Балдар бу мындый туштажуларда Улу јууны кӧргӧн, ӧткӧн улус керегинде јилбилӱ ле солун јетирӱлер уккандар. Олордыҥ салымдарыла, јилбӱлериле, амадуларыла танышкандар. Онойып, «Эзем тирӱ» деген киноныҥ туружаачылары — кайкамчылу улус, бала тужы уур-кӱч ӧйдӧ дӧ ӧткӧн болзо, ачык-јарык кӱӱндӱ ле эбире улуска јакшызын ла јетирер амадулу.
«БлагоДарю» деген отрядтыҥ волонтерлоры бу ла ӱлекер аайынча јуу ӧйиниҥ балдарыныҥ јилбӱлеринеҥ, таҥынаҥ кӧмзӧлӧринеҥ алылган фотојуруктардаҥ солун бир канча кӧрӱ белетеген, «Јаанактыҥ кайырчагы», «Бил. Ундыба», «Куучында» деген акцияларды ӧткӱрген. Бого ӱзеери «Јакшы керек каникулга барбас» деген кӧрӱ-маргаанныҥ логотип-таҥмазыла чыгарылган гранттыҥ шылтузында кружкаларды белетеп, јажы јаан улуска сыйлаган. «Олор эзен, качан бис олорды сананып јӱрзес» деген стендти белетеген. Тылда иштегендер ле јууныҥ балдары керегинде фотојуруктарлу ла кыска јетирӱлерлӱ табличкаларды јазап, олордыҥ јадып турган подъездтеринде ле тураларында илип салды.
Волонтерлордыҥ алдында база бир канча кӧдӱриҥилер бар. Олор јаҥыс та ӱренчиктерге эмес, је онойдо ок јерлештерине кижиниҥ тӱӱкидеги учуры, «Јалтанбас, нерелӱ керек», «Тӧрӧлин корыыры» деген оҥдомолдорго бойыныҥ кӧрӱмин чокымдап айдары. Тылда иштегендерле, јууныҥ балдарыла таныштырып, олорды тооп, баалап, оморкоп јӱрерине таскадар.

Н. Красных,
директордыҥ таскамал иш аайынча ордынчызы