Јаркынду јол кӱӱнзеген јуун

19.11.2021

Кӱчӱрген айдыҥ 17-чи кӱнинде Эл Курултайдыҥ јетинчи тудузыныҥ ээчий XXII сессиязы ӧткӧн. Спикер Артур Кохоев башкарган јуунда 41 депутаттаҥ 38 депутат турушкан.

Сессияныҥ ижинде Алтай Республиканыҥ башчызы Олег Хорохордин, онойдо ок эл-тергеелик јаҥныҥ бӱдӱреечи органдарыныҥ, республикада федерал бӱдӱреечи орган-дардыҥ башкартуларыныҥ башкараачылары, муниципал тӧзӧлмӧлӧрдиҥ јаандары ла депутаттар советтериниҥ председательдери, элбек јетирӱлер эдер эп-аргалардыҥ чыгартулу улузы турушкан.
Сессияда 23 сурак кӧрӱлген. Ол тоодо Алтай Республиканыҥ 2022 ле темдектелген 2023 ле 2024 јылдарына республикан бюджедин баштапкы кычырышта јӧптӧӧри, Алтай Республиканыҥ транспорт аайынча каланы, «јууныҥ балдары», депутаттыҥ статузы, тергееде баланыҥ тап-эриктери аайынча чыдулу кижи, јерлердиҥ мелиорациязы, билени, энеликти, адалыкты ла баланыҥ јаш тужын корыыры, ӧрт болдыртпазы, јадын-јӱрӱмге керектӱ акча-манаттыҥ эҥ ас кеми керегинде јасактарга кубулталар кийдирери.
Онойдо ок парламентарийлер Алтай Республиканыҥ эл-тергеелик «Мактулу ада» деген эл-тергеелик кайралын јӧптӧдилер. «Алтай Республиканыҥ кайралдары керегинде» јасакка јаҥы кайрал аайынча кубулталар кийдирер баштануны АР-дыҥ эл политика, ӱредӱлик, культура, јондык биригӱлер ле элбек јетирӱлер эдер эп-аргалар аайынча комитеди ле депутаттар кийдиргендер.
Бу кайралла тергееде беш јылдаҥ ас эмес јадып, балдарын толо кеминде јакшы таскадып, чыдадып турган адалар кайралдадар. Депутаттардыҥ шӱӱлтезиле, мындый кайрал јӧптӧгӧни биледе аданыҥ учурын бийиктедер. Бӱгӱнги кӱнде тергееде 130 кире ада балдарын јаҥыскан чыдадат.
Сессияда јурт ээлем бӧлӱкке чыгарылып турган акча-манаттыҥ кеми канча јылдарга бир ле кеминде болгоны, аргачылар ла тегин эл-јон коронавирус југуш оорудаҥ улам QR-код кийдиргенин тыҥ ла јаратпай турганы, эл-јон акча иштеп аларга болуп, ӧскӧ тергеелердӧӧн барып турганы керегинде ле оноҥ до ӧскӧ ӧҥзӱре сурактар кӧдӱрилген.
Парламенттиҥ јууныныҥ учкары кадровый сурактар кӧрӱлген. Андый сурактардыҥ бирӱзи аайынча «Алтайдыҥ Чолмоны» республикан газеттиҥ баш редакторына Светлана Вячеславовна Триянованыҥ кандидатуразы јӧптӧлди. Алтай Республиканыҥ депутаттары јаҥы редакторго ло эл газетке јаркынду јол, кӧп кычыраачылар кӱӱнзеп, иш аайынча бойыныҥ чокум кӱӱнземелдерин айткан.
Эл Курултайдыҥ јетинчи тудузыныҥ ээчий XXII сессиязы керегинде элбеде келер номердеҥ кычырыгар.

Э. КУДАЧИНА
Е. БУТУШЕВТИҤ фотојуругы

ТОП

«Гуркин» деген телекей: ачылталар ла јажыттар

Г.И. Гуркин ӱйи Мария Агафоновнала Оносто садында Атту-чуулу алтай јурукчы, политикалык ла јондык ишчи Григорий Иванович Чорос-Гуркинниҥ чыккан ӧйин ле јерин чокумдаган јаҥы документтер табылган. «ХХ чактыҥ башталарында Туулу Алтайда эҥ јарлу јон-политикалык ишчилердиҥ бирӱзи, јурукчы Григорий Иванович Чорос-Гуркин 1870 јылдыҥ чаган айыныҥ 12-чи кӱнинде Улалуда чыккан деп чотолот. Је Алтай Республиканыҥ Государстволык архивинде Улалудагы

«Јурукчыныҥ јуртын орныктырары – тӧс иш»

Јурукчыныҥ Оностогы јуртында Атту-чуулу алтай јурукчы, ады јарлу јондык ла политикалык ишчи Григорий Иванович Чорос-Гуркинниҥ чыкканынаҥ ала 155 јылдыгыла колбой тергеебисте кандый иштер темдектелгени керегинде Алтай Республиканыҥ А. В. Анохинниҥ адыла адалган Эл музейиниҥ директоры Римма ЕРКИНОВА куучындайт. – Г. И. Чорос-Гуркинниҥ юбилейине белетенери ле оныла колбой быјыл ӧткӱретен иштер керегинде Алтай Республиканыҥ башкарузыныҥ јакааны

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым