Настройки отображения

Размер шрифта:
Цвета сайта:
Ностройка изображения
Ностройка изображения

Настройки

Алтайдын Чолмоны

Каланыҥ оромдоры јаранат

26.11.2021

Кӱчӱрген айдыҥ 23-чи кӱнинде тергеениҥ башчызы Олег Хорохордин Горно-Алтайскта Строительдердиҥ оромында јаҥы площадкалардыҥ ачылтазында турушкан.

Ондо «Јадар јер ле кала ичи» нацӱлекер аайынча балдар ойноор ла спортло тазыктырынар эки јаҥы площадка тудулган. Олор ойноор комплексле, воркаутла тазыктырынарына керектӱ јазалдарла, тышкары тургузатан тренажерлорло, кичӱ футбол ойноор јалаҥла јеткилделген. Анайда ок площадкалардыҥ јаны јарандырылган, айландыра ӧзӱмдер отургузылган.
«Бу ӧзӱм алынып јаткан микрорайон. Анда ӱч муҥнаҥ кӧп улус, ол тоодо бир муҥнаҥ кӧп балдар јуртайт. Мындый объект микрорайонго керектӱ болгон. Оныҥ да учун каланыҥ јарандыратан јондык јерлерин талдаары аайынча рейтинговый ӱнбериште бу микрорайон јеҥӱчил болуп чыкканында кайкагадый неме јок» — деп, республиканыҥ башкараачызы айткан.
Олег Хорохордин эм тургуза ӱренчиктер карантинде болгонын ла ӱредӱ токтодылганын айдып, санитар-эпидемиялык айалга оҥдолзо ло, балдар бош ӧйин кыйалтазы јоктоҥ бу площадкаларда ӧткӱрер деген.
Ол бу объекттерди туткан строительдерге ижин чыҥдый бӱдӱрген учун быйанын айткан ла площадкалар балдарды ла јаан улусты узак јылдарга сӱӱндирерине бӱткенин темдектеген.
Каланыҥ ичинде јадарына эптӱ айалгалар тӧзӧӧр программа аайынча Горно-Алтайскта беш јылдыҥ туркунына 50-ге јуук дворовый ла јондык јерлер тудулган.
«2019 јылдаҥ ала бу программа текши республика ичинде иштеер этире элбедилген ле ӱчинчи јылга улай «Јадар јер ле кала ичи» нацӱлекер аайынча бӱдет. Мынызы бис келер де јылдарда балдардыҥ площадкаларын, спортплощадкаларды тударыс, јаҥыс ла каланыҥ улузыныҥ эмес, је анайда ок бастыра тергеебистиҥ эл-јоныныҥ јӱрӱмин эптӱ эдерис дегени болуп јат» — деп, Олег Хорохордин айткан.
Јуулган улуска уткуулду сӧзин Эл Курултайдыҥ председателиниҥ ордынчызы Герман Чепкин база айткан. Ол бу программа 2017-2018 јылдарда партийный ӱлекер аайынча иштегенин, 2019 јылда нацӱлекерге киргенин ле эмди ол аайынча иштер јаҥыс ла тергеебистиҥ тӧс калазында эмес, је анайда ок јурт јерлерде база ӧдӱп турганын темдектеген. Оныҥ айтканыла, амыраарына ла ӧйди тузалу ӧткӱрерине керектӱ мындый объекттер кажы ла јыл ачылат. Тергеебистиҥ эл-јоны бу площадкаларда бош ӧйин ӧткӱрет, спортло тазыктырынат.
Горно-Алтайсктыҥ администрациязыныҥ јааны Ольга Сафронованыҥ айтканыла, 2022 јылда каланыҥ јарандыратан јондык јерлериниҥ ӱлекерлерин талдаары аайынча рейтинговый ӱнбериште эки муҥнаҥ кӧп кижи турушкан. Олордоҥ 900 кижи ӱндерин Строительдердиҥ оромында спортло тазыктырынарыныҥ площадказын тудары учун берген. «Бу микрорайонды јарандырар иш улалар» — деп, Ольга Сафронова айткан.
Кӧдӱриҥилӱ керек-јаракта кайралдар база табыштырылган. Ол тоодо «Јадар јер ле кала ичи» нацӱлекердиҥ «Калада јадарга эптӱ айалгалар тӧзӧӧри» деген федерал ӱлекери аайынча јарандыратан јондык јерлерди талдаар онлайн ӱнберишти ӧткӱреринде эрчимдӱ турушкан улуска Россияныҥ Минстройыныҥ быйанду самаралары табыштырылган. Бу онлайн ӱнбериш бирлик федерал платформада ӧткӱрилген баштапкы мындый бастырароссиялык ӱнбериш болгон. Россияныҥ Минстройыныҥ быйанду самараларын Горно-Алтайсктагы Јашӧскӱримниҥ тӧс јериниҥ директоры Эркелей Бекова, АР-дыҥ тергееле башкарар тӧс јериниҥ специалисти Алтынсай Курдакова, добровольчествоны јӧмӧӧриниҥ «Алтайдыҥ ийдези» деп тергеелик тӧс јериниҥ јааны Мария Рылеева, АР-дыҥ тергеелик ӧзӱминиҥ министерствозыныҥ јадар јер аайынча политика бӧлӱгиниҥ баш специалисти Толунай Эдокова алгандар.
Кӧдӱриҥилӱ керек-јарак бу микрорайондогы «Олимп» ле «Спарта» клубтарда тазыктырынып турган студенттер ортодо футбол аайынча најылык матчла тӱгенген.

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина