Алтайдын Чолмоны

Јаҥы чагылган јылдыстар

03.12.2021

База бир јаҥы чагылган јылдыс – саал сӧӧктӱ Кристина ТАЙТЫКОВА (Мичуева)

— Кристина, бойыҥныҥ кожоҥдорыҥла таныштырып ийзеҥ?
— Таҥынаҥ баштапкы «Тепселген сӱӱжим» деп кожоҥымды 2017 јылда чыгаргам. Јиит кижиниҥ кӧксинде сӱӱш, ижениш, айрылыш болгон (каткырат). Мениҥ кожоҥдорым — А. Тахановтыҥ «Сен» деп кожоҥы; «Меҥдейдим» деп кожоҥныҥ сӧстӧрин энем Э.П. Мичуева бичиген, аранжировказын В. Санашев јазаган. Бу ла ӧдӱп јаткан јылдыҥ сыгын айында «Сеге» деп кожоҥ аайынча видеоклип сокконыс. Учурал келижерде, Оҥдойдогы культура аайынча бӧлӱктиҥ јааны С.В. Садрашевага, культураныҥ тӧс јериниҥ јааны Б.С. Мамыевага болушканы, јӧмӧшкӧни учун акту кӱӱнимнеҥ алкыш-быйанымды айдып турум. «Сӱӱшке оролгон» деп кожоҥды казах тилдеҥ чечен ле эптӱ тилдӱ А. Хабаров кӧчӱрген. Тургуза ӧйдӧ јаан ойын-концертке белетенип турубыс. Улаган аймакта балдардыҥ «Јаш канат» ӧмӧлигиниҥ баштапкы ӱренчиктери јуулыжып, јаҥы кожоҥдорысты кӧрӧӧчилерге сыйлаарыс.
— Бала тужыҥда баштап ла кожоҥдогон кожоҥдорыҥ санааҥга кирет пе?
— Баштап ла мен балдардыҥ «Јаш канат» деп ӧмӧлигинде «Койонок», «Школым», «Энейим» деп кожоҥдорды кожоҥдогом. Аймак, республикан кеминде кӧрӱ-конкурстарда јаантайын туружып, јеҥӱлер алып туратаныс.
Билереер бе, мен балдардыҥ бу ӧмӧлигине канай келгем? Оогош тужымда мен Балыктујулдыҥ школында ӱренгем. Бисти кӱӱниҥ урогында А.М. Темеева ӱреткен. Бис бу урокты сӱӱп, энчикпей сакыйтаныс. Бир ле уксам, Айана Михайловна Улаган јуртка кӧчӱп, анда балдардыҥ ӧмӧлигин тӧзӧгӧн эмтир. Мен јалынып туруп энемди сурагам — «мени бу ла кижиниҥ ӧмӧлигине апарыгар» деп. Онойып, мени энем Улаганныҥ школына табыштырган ла бу балдардыҥ ӧмӧлигине јӱрӱп баштагам.
— Салымыҥды јайаандыкла колбогоныҥ тегиндӱ эмес болбой…
— 2010 јылда Москвада ӧткӧн јаан кӧрӱ-конкурста туружып, јеҥӱлӱ јер алганыс учун бисти, ӧмӧликтиҥ туружаачыларын, А.М. Темеева ла А.В. Темеев Абакандӧӧн экскурсияга апарган. Н.Ф. Катановтыҥ адыла адалган кӱӱлик колледжтиҥ ӱредӱчилериле таныжып, «кеендиктиҥ телекейине кӱӱнзегендер, ӱренип келигер» деп кычырту алганыс.
Школды ӱренип божодоло, мен бу колледжке ӱредӱге киргем. Колледжтиҥ кийнинеҥ ӱредӱмди культураныҥ Барнаулдагы институдында улалткам. Тургуза ӧйдӧ Оҥдойдо культураныҥ тӧс јеринде иштеп јадым. Эш-барааным Мӧҥӱне Тайтыков база кайчы кижи, бу ла сыгын айдыҥ 17-18 кӱндеринде ӧткӱрилген Кайчылардыҥ телекейлик курултайында баштапкы јер алган. Балабыска бир јаш. Мен качан да бош отурбайдым, јаантайын бедирениште, кожоҥ-комутта. Бир кожоҥ тӱрген чӱмделер, экинчизи дезе келишпей турар – андый да болуп јат.
— Сен кожоҥчы улустыҥ балазы ба?
— Энем Элеонора Петровна Мичуева школдо кичӱ класстардыҥ ӱредӱчизи болуп иштеп јат. Јаантайын јӱзӱн-башка кӧрӱ-конкурстарда туружат. Адам Аркадий Васильевич ады јарлу Ортонуловтор угынаҥ, јуранарын сӱӱр кижи. Тайнам Тамара Трифоновна Тадышева школдо кӱӱниҥ ӱредӱчизи болуп иштеген, баянла ойноорын сӱӱр. Мен бойым кожоҥдоорын да, јуранарын да сӱӱп јадым. Мениҥ салымым кожоҥло колбулу.
Солун айылчыларыска эрмек-куучын учун алкыш-быйан. Јаҥы јылдыстар бойлорыныҥ ойын-концертин јаҥар айдыҥ 19-чы кӱнинде республикан эл театрда ӧткӱрер амадулу. Кӱӱнзегендер келип, јайалталардыҥ јайаандык иштериле кӱӱнзеп таныжар деп иженедим.