Алтайдын Чолмоны

Кӧрӱ-конкурстыҥ јеҥӱчили ле финалисттери

10.12.2021

Јаҥар айдыҥ 7-чи кӱнинде АР-дыҥ башчызы Олег Хорохордин «Јаан перемена» деп текшироссиялык кӧрӱ-конкурстыҥ јеҥӱчилиле, финалга чыккандарла туштажу ӧткӱрди.

Финалга Майма аймактагы Кызыл-Ӧзӧк јурттыҥ школыныҥ ӱренчиктери Ольга Чурикова ла Арина Гуляева, республикан классикалык лицейдиҥ ӱренчиги Анастасия Садовая чыккандар. Суперфиналда Ольга Чурикова јеҥӱ алып, оноҥ ары ӱредӱзин улалтарына ла бойыныҥ билгирлерин элбедерине 1 миллион салковой акча ойноп алган.
«Јаан перемена» деген кӧрӱ-конкурста бӱткӱл ороонныҥ балдары туружар аргалу. Ол «Россия — аргалардыҥ орооны» деп адалган јаан ӱлекердиҥ ууламјызы. Кӧрӱ-конкурста туружып, финалга чыгары – ол бийик једим. Јеҥӱ алып чыгары сӱрекей учурлу оморкоду» – деп, республиканыҥ башчызы айтты.
Кӧрӱ-конкурста бастыра 6712 бала турушкан. Олор школдордыҥ 5-10 класстарыныҥ ӱренчиктери, колледжтердиҥ ле техникумдардыҥ ӱренеечилери.
«Туружаачыларды акту кӱӱнимнеҥ уткуп турум. Бистиҥ тергеениҥ ӱренчиктери ортодо слер тем алатан ӱренчиктер болорыгарга алаҥзыбай турум. Мен слерге јаҥыс ла јеҥӱлер кӱӱнзейдим. Јаантайын ичкери алтагар, бийик амадулар тургузыгар, јеткен једимдеригерге токтобогор. «Јаан перемена» деп кӧрӱ-конкурстыҥ кычырузы – бойлорыстыҥ кӱӱн-санаабысты ӧскӧртип, бисти курчаган телекейди ӧскӧртӧри. Айдарда, бу кычыруны јӱрӱмде бӱдӱрерге чырмайыгар» – деп, Олег Хорохордин айтты.
АР-дыҥ башкарузыныҥ председателиниҥ баштапкы ордынчызы Эжер Ялбаковтыҥ темдектегениле, туружаачылар амадузына јединерге бирлик ӧмӧлик болуп иштеерине ӱренип алгандар. «Ӧткӧн јылда «Јаан перемена» деп кӧрӱ-конкурста бистиҥ тергеенеҥ бир финалист болгон болзо, быјылгы јылда олордыҥ тоозы ӱч кижи. Кажы ла јыл кӧрӱ-конкурстыҥ туружаачыларыныҥ тоозы кӧптӧйт, айдарда, јеҥӱчилдер де ас эмес болорына иженип турум» – деп, ол айтты.
АР-дыҥ ӱредӱ ле билим аайынча министри Ольга Саврасованыҥ айтканыла, бийик једимдерге једерге туружаачылар, олордыҥ ӱредӱчилери ле ада-энелери јаан иштер ӧткӱргендер. Республиканыҥ башчызына ӱредӱликке јаан ајару эдип, јаантайын јӧмӧлтӧ-болуш јетирип турганына алкыш-быйанын айтты.
Кӧрӱ-конкурстыҥ јеҥӱчили Ольга Чурикованыҥ айтканыла, бу кӧрӱ-конкурста турушканы оныҥ јӱрӱмине кубулталар кийдирди. «Кӧрӱ-конкурс меге јаҥы аргалар ачып, мениҥ санаа-шӱӱлтелеримди јӧмӧп турган кӧп тоолу најылар табарга болушты. Ӱлекерде турушканым мениҥ санаамда јаантайынга артып калар» — деп, ол айткан. Анайда ок Арина Гуляева ла Анастасия Садовая бойлорыныҥ кӱӱн-санааларыла база ӱлештилер.
«Јаан перемена» деп текшироссиялык кӧрӱ-конкурстыҥ финалыныҥ кӧдӱриҥилӱ јабылтазы кӱчӱрген айдыҥ 13-чи кӱнинде балдардыҥ «Артек» деп телекейлик тӧс јеринде ӧткӧн. Бистиҥ ороонноҥ 11-чи класстардыҥ 300 ӱренчиги ле 9-10 класстардыҥ база 300 ӱренчиги јеҥӱчилдер болуп чыккандар.
Кӧрӱ-конкурс «Ӱредӱ» деп нацӱлекерге кирет. Оныҥ тӧзӧӧчилери јашӧскӱримниҥ керектери аайынча федерал агентство (Росмолодежь), «Россия – аргалардыҥ орооны» деп биригӱ ле Россиядагы ӱренчиктердиҥ кыймыгузы.

Хамида ТАДИНА