Даяна Бойдоева: база бир алтын јеҥӱ

14.01.2022

Эре-Чуйдыҥ кызы, јайым кӱрешле спорттыҥ узы Даяна Бойдоева чике ле јаҥы 2022 јылдыҥ алдында база бир јаан једимге једип, бастырароссиялык маргаандарда алтын јеҥӱни ойноп алды.

Јаҥар айдыҥ 18-19 кӱндеринде Хакасия Республиканыҥ тӧс калазы Абаканда Н.Г. Булакинниҥ адыла адалган спорткомплексте 21 јашка јеткелек јииттер ортодо јайым кӱрешле бастырароссиялык маргаандар ӧткӧн. Бу јаҥжыккан маргаандар СССР-дыҥ ла Россияныҥ нерелӱ тазыктыраачызы, јайым кӱрешле олимпий чемпион Иван Ярыгинниҥ баштапкы тазыктыраачызы болгон Владимир Ильич Чарковтыҥ эземине учурлалган.
Маргаандарда Хакасиядаҥ, Тывадаҥ, Саха-Якутиядаҥ, Татарстаннаҥ, Красноярский крайдаҥ, Кемеровский, Новосибирский, Иркутский областьтардаҥ 200-теҥ ажыра кӱрешчилер турушкан. Бу маргаандар Россия Федерацияныҥ спорт аайынча министерствозыныҥ бастырароссиялык, тергеелик ле албатылар ортодо деп темдектелген окылу календарь-планына кирип турганын аҥылап айдар керек. Кӱрештиҥ окылу ачылтазында Хакасия Республиканыҥ спорт аайынча министри Сергей Кочан, спортивный кӱрештиҥ тергеедеги федерациязыныҥ башкараачызы Геннадий Конзынчаков туружып, спортчыларды уткудылар.
Даяна Бойдоева бу јаан маргаандарда туружып, бойыныҥ 50 кг бескезинде алтын јеҥӱни ойноп алды. Јарымфиналга једимдӱ једип, бу бӧлӱк кӱреште ол телекейдиҥ јеҥӱчили болгон Лучана Бекболатованы јеҥип алган. Финалдагы тӧс туштажуда ол кебистиҥ ээзи, Россияныҥ призеры Алена Сагалакованы база јеҥип, бастыроссиялык бу маргаандардыҥ алтын јеҥӱчили болуп чыкты. Даянаныҥ бу алтын јеҥӱзин 2021 јылдагы спорт сезон-ӧйиниҥ эҥ ле артык кӧргӱзӱзи деп айдар керек.
Кӱрешчи кыс олимпий резервтиҥ Кемеровский областьтыҥ Ленинск-Кузнецкий деп адалган калазында иштеп турган училищезиниҥ ӱренеечизи болуп јат. Оныҥ баштапкы тазыктыраачызы бистиҥ тергееде ады-чуузы чыккан тазыктыраачы, грек-рим кӱрешчи, спортчыныҥ адазы — Кирилл Власович Бойдоев. Кемероводо Даянаны нерелӱ тазыктыраачы Дмитрий Иванович Гончаров тазыктырат. Чындап, Дмитрий Гончаров Пекиндеги Олимпий ойындарда јайым кӱрешле ӱчинчи болгон Елена Шалыгинаны тазыктырган деп эске алып ийер керек.
Јайалталу алтай кысты, бӧкӧни ле кӱрешчини — Даяна Бойдоеваны — база бир алтын јеҥӱзиле уткуйдыс, спорттыҥ јеҥил эмес текпиштеринде оноҥ артык јеҥӱлер кӱӱнзейдис!

Айгуль МАЙМАНОВА

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина