«Россияныҥ чаназы»

15.02.2022

Кочкор айдыҥ 12-чи кӱнинде Горно-Алтайскта Јыланду ӧзӧктӧ «Россияныҥ чаназы» деп јаҥжыккан маргаандар ӧткӧн.

Тергеениҥ башчызы Олег Хорохордин маргаандарда туружарга келген спортчыларды, спорттыҥ ветерандарын, ишмекчи ӧмӧликтердиҥ ишчилерин, студенттерди уткуп тура, бу маргаандар Алтай Республикада 15-чи катап ӧдӱп јатканын темдектеген.
— Бу јаҥжыккан кышкы старттар. Анда бастыра ороон ичинде бир миллионноҥ ажыра спорт сӱӱчилер туружат. Коронавирустыҥ јаҥы толкузынаҥ улам маргаандарга кӧп улусты јуурга келишпеген. Школдордыҥ балдары јок, олор дистанционный ӱредӱде. Је санитарно-эпидемиологический айалга оҥдолзо ло, школдыҥ ӱренеечилерине чанала јӱгӱрериниҥ экинчи бӧлӱгин ӧткӱрерис – деп, Олег Хорохордин айткан.
Тергеениҥ башкараачызы јаан учурлу старттар Пекинде XXIV кышкы Олимпийский ойындарда ӧдӱп јатканын ла эҥ артык једимдерди шак ла орооныстыҥ чаначылары кӧргӱзип турганын темдектеген.
Олег Хорохордин јуулган улуска бек су-кадык, бийик кӱӱн-санаа, маргаандарда једимдер кӱӱнзеген.
Маргаандардыҥ туружаачыларына уткуулду сӧзин анайда ок Эл Курултайдыҥ туризмниҥ ӧзӱми, аргачылык, спорт ло јашӧскӱримдик политика аайынча комитединиҥ јааны Сергей Тимошенский айткан. Ол бу спортивный керек-јарактыҥ учурын темдектеп, мындый маргаандар кижиде турумкай ла јана баспас кӱӱн-тап, кылык-јаҥ тӧзӧп турганын айткан ла су-кадык јӱрӱм јӱрерин сӱӱп тургандарга чанала јӱгӱреринде бийик једимдер кӱӱнзеген.
Маргаандар спорт сӱӱчилер ортодо чанала узуны бир километр јерге јӱгӱрериле башталган. Бу јӱгӱриште республиканыҥ башчызы Олег Хорохордин база турушкан.
Спорт сӱӱчилер узуны бир километр јерди јӱгӱрген кийнинеҥ, база да ӧскӧ группалар аайынча маргаандар ӧткӧн. 55 ле оноҥ јаан јашту ветерандар ортодо эр улустаҥ баштапкы Павел Жабров, экинчи Александр Увачев ло ӱчинчи Виктор Коновец келген. Ӱй улус ортодо баштапкы ӱч јерди Александра Кошкина, Наталья Копылова ла Галина Матвиенко ӱлешкен.
2003 јылда чыккан уулдар ла оноҥ јаан јашту эр улус ортодо узуны ӱч километрге чанала јӱгӱриште эҥ артык ӧйди Росгвардиядаҥ Александр Гуляев кӧргӱскен ле јеҥӱни ал соккон. Экинчи јерде таҥынаҥ аргачы Алексей Лихобабин болордо, ӱчинчи јерди ГАГУ-даҥ Александр Ульчиеков алган.
Бу ок дистанцияда маргышкан ӱй улус ортодо баштапкы јерди Арина Кусургашева аларда, экинчи ле ӱчинчи јерлерди Дарья Ушакова ла Полина Гололобова ӱлешкендер. Ӱчӱлези ГАГУ-да ӱренедилер.
Маргаандардыҥ јеҥӱчилдери медальдарла, дипломдорло, РФ-тыҥ спорт аайынча министерствозыныҥ кереес сыйларыла, АР-дыҥ физический культура ла спорт аайынча комитединиҥ дипломдорыла кайралдаткан.
Чанала јӱгӱрери аайынча маргаандар эпидемияны болдыртпас некелтелер аайынча ӧткӱрилгенин темдектеер керек. База бир темдектегедийи – ол бу маргаандарда «Алтайдыҥ Чолмоны» республикан газеттиҥ ишчилериниҥ эрчимдӱ турушканы болуп јат.
«Россияныҥ чаназы» деп бастырароссиялык ачык маргаандар орооныста кыш ӧйинде ӧдӧт лӧ туружаачыларыныҥ тоозы эҥ кӧп болуп турган маргаандар. Анда орооныстыҥ кӧп саба тергеелери туружат. Быјылгы «Россияныҥ чаназында» орооныстыҥ 73 тергеези турушкан. Бу маргаандар 1982 јылдаҥ ала кажы ла јыл ӧдӧт.

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина