Г. И. Чорос-Гуркинниҥ сыйыныҥ ээчий лауреады

Г. И. Чорос-Гуркинниҥ сыйыныҥ ээчий лауреады — Роман Жданов

17.05.2022

Кӱӱк айдыҥ 12-чи кӱнинде каланыҥ «Чаҥкыр Алтай» кинотеатрында Г. И. Чорос-Гуркинниҥ адыла адалган јондык сыйды табыштырар кӧдӱриҥи ӧткӧн. Быјыл бу сыйдыҥ лауреады болуп Россияныҥ спортыныҥ узы Роман Жданов чыккан.

А. В. Анохинниҥ адыла адалган эл музейдиҥ јааны Римма Еркинова залда отурган студенттерге, јуулган улуска Г. И. Чорос-Гуркинниҥ јӱрӱмдик, јайаандык јолы керегинде элбеде айтты. Г. И. Чорос-Гуркинниҥ адыла адалган тӱӱкилик учурлу јондык сыйла 1991 јылдаҥ бери билим, спорт, јондык иштерде аҥыланган 34 лауреат адалган, олордыҥ тоозында — Артур Марлужоков, Болот Байрышев, Григорий Самаев, Айана Шинжина, Тамара Муканова, Александр Трифонов, Эмиль ле Радмила Теркишевтер, Эмил Толкочеков, Валерий Тебеков, Николай Чепоков, Эзен Уланкин, Вячеслав Ельдепов ло оноҥ до ӧскӧлӧри.
«Оносский клуб — Оностогы кӱрее» деп коммерциялык эмес јондык кӧмзӧниҥ башкартузыныҥ јааны, «Алтын-Туу» бичик чыгартуныҥ башкараачызы Татьяна Туденева, Алтай Республиканыҥ башчызыныҥ јӧпчизи, попечительский советтиҥ јааны Александр Манзыров, «Алтайдыҥ Чолмоны» республикан газеттиҥ баш редакторы Светлана Триянова уткуулду сӧстӧрин айттылар ла Роман Ждановко лауреаттыҥ сертификадын ла Г. И. Чорос-Гуркинниҥ адыла адалган јондык сыйдыҥ аҥылу темдегин табыштырдылар.
Роман Жданов 1998 јылда кичӱ изӱ айдыҥ 30-чы кӱнинде Горно-Алтайск калада чыккан, Россияныҥ эжинеечи (пловец)-паралимпиеци. Ол — јаан маргаандардыҥ кӧп катап чемпионы, телекейлик чемпионаттардыҥ призеры ла рекордсмени, Европаныҥ чемпионаттарыныҥ кӧп катап призеры, базар аргазы кирелӱ кенек эжинеечи-спортчылар ортодо Россияныҥ спортыныҥ албатылар ортодогы узы. 2021 јылда Токиодо ӧткӧн Паралимпийский ойындардыҥ чемпионы Россияныҥ јуунты командазыныҥ маанызын Паралимпийский јайгы ойындардыҥ јабылтазында апарган. Роман Жданов 24 јаштуда спортто бийик једимдер-ге јеткени, Тӧрӧлиниҥ спортыныҥ ӧзӱмине јетирген јаан јӧмӧлтӧзи учун Најылыктыҥ ордениле, Россия Федерацияныҥ Президентиниҥ Кӱндӱлӱ грамотазыла кайралдаткан.

(Учы ээчий номерде јарлалар)

ТОП

«Гуркин» деген телекей: ачылталар ла јажыттар

Г.И. Гуркин ӱйи Мария Агафоновнала Оносто садында Атту-чуулу алтай јурукчы, политикалык ла јондык ишчи Григорий Иванович Чорос-Гуркинниҥ чыккан ӧйин ле јерин чокумдаган јаҥы документтер табылган. «ХХ чактыҥ башталарында Туулу Алтайда эҥ јарлу јон-политикалык ишчилердиҥ бирӱзи, јурукчы Григорий Иванович Чорос-Гуркин 1870 јылдыҥ чаган айыныҥ 12-чи кӱнинде Улалуда чыккан деп чотолот. Је Алтай Республиканыҥ Государстволык архивинде Улалудагы

«Јурукчыныҥ јуртын орныктырары – тӧс иш»

Јурукчыныҥ Оностогы јуртында Атту-чуулу алтай јурукчы, ады јарлу јондык ла политикалык ишчи Григорий Иванович Чорос-Гуркинниҥ чыкканынаҥ ала 155 јылдыгыла колбой тергеебисте кандый иштер темдектелгени керегинде Алтай Республиканыҥ А. В. Анохинниҥ адыла адалган Эл музейиниҥ директоры Римма ЕРКИНОВА куучындайт. – Г. И. Чорос-Гуркинниҥ юбилейине белетенери ле оныла колбой быјыл ӧткӱретен иштер керегинде Алтай Республиканыҥ башкарузыныҥ јакааны

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым