Алтайдын Чолмоны

Кӱӱлик талайда Арслан јылдыс

27.05.2022

Кичӱ тӧрӧлистиҥ кожоҥчылары ортодо јиит јайалта Арслан Абудовтыҥ ады калганчы јылдарда јарлу болуп калды. Ол Алтайдыҥ кеендигинде база бир јылдыс деп јолду адалат.

Арслан орооныстыҥ эҥ танылу ла тыҥ ӱндӱ кожоҥчыларыныҥ бирӱзи Муслим Магомаевтиҥ кожоҥдорын сӱрекей јакшы кожоҥдоп турганын кычыраачыларыс ортодо укпагандар јокко јуук болбой. Бар болзо, слерди келер ӧйдӧ Арслан Вячеславович Абудов деп јаркынду ачылта сакып јат.
Бисте бу јиит кожоҥчыла оныҥ тӧрӧл Оҥдой аймагында тегин ле јӱрӱмдик айалгада таныжып, куучындажар јакшынак арга келишти. Арслан ачык-јарык, кемзинчек, јалакай ла јымжак кылыкту уул эмтир. Бойы керегинде ол мынайда куучындады:
«Сӧӧгим тӧӧлӧс, ӧскӧн јерим Оҥдой аймактыҥ Шашыкман јурты. Оогош тужымда кожоҥчы болорым деп бир де амадабагам да, андый санаа да јок болгон. Школдо каа-јаа кандый бир керек-јарактарда кожоҥдоп туратам (ол тоодо Арслан аймак кеминде «Мӧҥӱн микрофон» деп конкурстыҥ јеҥӱчили болгон — ред.). Мени кӱӱлик јолло барзын деп тыҥ амадаган ла баштандырган кижи — ӱредӱчим Любовь Александровна Карлагашева. Онойып, тогузынчы классты божодоло, мен культураныҥ ла санаттыҥ Г. И. Чорос-Гуркинниҥ адыла адалган колледжине ӱредӱге киргем. Ондо мени Светлана Анатольевна Туголукова бойыныҥ канадыныҥ алдына кийдирип, санаттыҥ телекейиле, профессионал кожоҥдоорыла таныштырган.
Колледжте Магомаевтиҥ кожоҥдорын кожоҥдоорго ӱним јакшы келижип туратан. Угаачылардыҥ кӧп сабазы да мени бу јарлу артисттиҥ кожоҥдорыла сананып алган. Чындап та, оныҥ кожоҥдоры сӱрекей ийделӱ, кижиниҥ ӧзӧк-буурына ӧдӧ берер. Сӱӱбес аргазы јок. Онойдо ок меге кожоҥчылардаҥ Сергей Ларин, Филипп Киркоров, Олег Газманов, Артур Марлужоков, Виктор Малчинов ло оноҥ до кӧп ӧскӧлӧри јарайт. Мен ончо ло кожоҥдорды угадым: албатылык, классикалык, эмдиги ӧйдиҥ».
Арслан ӱредӱзин божодып салган, Эл-тергеелик оркестрда, Эл театрда ла оныла коштой тӧрӧл аймагыныҥ культура бӧлӱгинде ле балдарды кеендиктиҥ телекейиле таныштырып иштейт. Удабас оныҥ баштапкы «азатпайлары» јаан конкурста туружар.
Кӱӱле, кожоҥдоорыла колбулу бу ижи ого јорыктаар, эл-јонго сӱӱнчи сыйлаар аргазыла коркышту јарайт. «Улустаҥ јакшы, јылу сӧстӧр уксаҥ, оноҥ до ары иштеер кӱӱниҥ тыҥыйт» — деп, кожоҥчы айдат.
Бош ӧйинде ол энези Сузанна Алексеевнага болужып, тайга барып, балыктап јӱрет. Черӱчил молјузын Арслан бӱдӱрип салган. Јаражай эш-нӧкӧри Улаган аймактаҥ, ӱредӱчи болуп иштейт. Айдарда, келер јуук ӧйгӧ пландары јанынаҥ ол «тура тудар, бала-барка азыраар керек» – деп айдат.
Бистиҥ јиит кычыраачыларга А. Абудов кандый бир јолды талдап алганда, бош салынбай, јаантайын ӱренер, таскадынар, тазыктырынар, онойдо ок недеҥ де коркыбас керек деп јакарат.
Чындап, Арслан коо баритон ӱниле «Алтайдыҥ Чолмоны» газеттиҥ гимнин кожоҥдоор. Угаачылар оны кичӱ изӱ айдыҥ 3-чи кӱнинде Оҥдой јуртта «Алтайдыҥ Чолмоны» најыларын јууйт» деген фестиваль-туштажуда угар аргалу.

2017 јылдыҥ куран айында Сочи калада «Бастырателекейлик хоровой ойындар» деп конкурстыҥ алтын дипломыла кайралдаткан.
***
Јииттердиҥ кандык айдыҥ 18-23 кӱндеринде Свердловский областьтыҥ Екатеринбург калазында ӧткӧн 16-чы Дельфийский ойындарында «Эстрадный вокал» номинацияда
18-25 јашту туружаачылардыҥ ортозынаҥ 4-чи јер алган.
***
2016 јылдыҥ јаҥар айында Кемероводо ӧткӧн Бастырателекейлик «Сибириада» конкурстыҥ лауреады.

Эмина КУДАЧИНА
Евгений БУТУШЕВТИҤ фотојуруктары