Алтын-Кӧллӧ пресс-тур

23.09.2022

Сыгын айдыҥ 16-чы кӱнинде «Звезда Алтая» республикан газеттиҥ ӧмӧлиги Алтай Республиканыҥ ла Алтай крайдыҥ журналисттерин пресс-турга кычырды. Бу јол-јорук «Звезда Алтая» ла «Алтайдыҥ Чолмоны» республикан газеттердиҥ 100 јылдык юбилейлерине учурлалган. Бӱткӱл бир чак ӧткӧн јолдыҥ тӱӱкизин эзедип, республикан газеттер бойлорыныҥ юбилейлик байрамына учурлаган керек-јарактарын јыл башталганынаҥ ала ӧткӱргилейт. Эҥ ле учурлу кӧдӱриҥи кӱчӱрген айда ӧдӧри темдектелет.

Кӱстиҥ јӱзӱн-башка ӧҥдӧрине курчаткан Алтын-Кӧл. Оныҥ элбек толкузына алдыртып, јайым куштый учар кӱӱнге јайылып, кӧп тоолу журналисттер «Пионер Алтая» деп керепте јуулыштылар. Јаҥжыккан пресс-турга аймактардыҥ газеттеринеҥ, одоштой јаткан Алтай крайдаҥ корреспонденттер, чыгартулу улус ла јондык ишчилер јуулыштылар. Журналисттер јайаандык ууламјыныҥ база бир тизӱзин апарып јаткан улус болор. Олордыҥ кажы ла сӧзи, эрмеги, бичимели јӱректеҥ сызылып чыккан кӱӱн-санаа, кӧрӱм-шӱӱлте. Тууразынаҥ кӧргӧндӧ бичинер кижиниҥ ижи кӧскӧ кӧрӱнбес. «Бичинеринде не бар» — деп, кӧп улус айдыжат. Је качан бичигенин бир-эки ле катап тӱзеткенде, «баш ла бол, бу кандый кӱч неме эди» — деп, колло јаҥып ийет. Сӧстиҥ учуры бийик болгонын бис бӱгӱнги кӱнде јарт оҥдоп јадыбыс. Тургуза ӧйдӧ интернет ажыра кандый солун јетирӱлер кычырбайдыс, кӧрбӧйдис, укпайдыс. Айдарда, кӧп тоолу јетирӱлердеҥ чындыгын аайлап, олорды эл-јонго јетирери сӱрекей учурлу. Алтай Республикадагы газеттердиҥ ижи-тожыныҥ курч сурактарын шӱӱжер иште АР-дыҥ башчызыныҥ, АР-дыҥ башкарузыныҥ председателиниҥ ле АР-дыҥ башкарузыныҥ Аппарадыныҥ башкараачызыныҥ ордынчызы, АР-дыҥ башчызыныҥ, АР-дыҥ башкарузыныҥ председателиниҥ пресс-качызы Михаил Максимов, АР-дыҥ журналисттер бирлигиниҥ башкараачызы Борис Алушкин. Алтайдыҥ государственный ар-бӱткендик, биосферный заповеднигиниҥ јааныныҥ экологиялык ӱредӱ аайынча ордынчызы Ольга Швакова, «Алтайская правда» газеттиҥ каруулу качызы Оксана Иванова туруштылар. Кепке базылып чыгып турган газеттердиҥ ижи-тожын бӱгӱнги ӧйдиҥ некелтелерине келиштире канайда орныктырары, электрон бӱдӱмле эмезе кепке базылып чыгарылган газеттердиҥ башкалары, солундарды кӱнӱҥ-сайын элбеде таркадары, јарлар ажыра ӱзеери акча-манат иштеп алары ла оноҥ до ӧскӧ сурактар кажы ла газеттиҥ ишчилерин јилбиркедет. Туштажуныҥ туружаачылары пресс-тур ӧйинде бой-бойлорынаҥ ченемел алыжып, ачык-јарык эрмек-куучындар ӧткӱрип, мынаҥ да ары ӧмӧ-јӧмӧ иштеер деп шӱӱлтеге келдилер.
Журналист кижиниҥ ижи — ол јаантайынгы јол-јорук, кӧп тоолу улусла туштажулар. Ижи аайынча корреспондент кижи башка-башка јерлерде болот. «Алтайдыҥ Чолмоны» газеттиҥ корреспонденти
Т. У. Тохнинниҥ айтканыла, ол газетте 50 јылга иштеп келген. Кандый јерде болбоды деер, канча боочылар ашпады деер. Алтын-Кӧлди ончо ло јанынаҥ кӧргӧн: Улаган аймактагы Балыкчы јурттаҥ, Турачак аймактагы Артыбаштаҥ. Је кӧлдиҥ бойыла качан да јоруктабаган. Кӧлдиҥ толкузы, серӱӱн кӱски эзини солун да, јараш та. Эбире курчаган ар-бӱткенниҥ јаражын сен канча ла катап кӧрзӧҥ, баштапкы ла катап кӧрӱп тургандый билдирет. Бичинер улустыҥ бир-канчузы кӧлди кӧстӧп ӱлгер чӱмдейт, кем де бойыныҥ ижи-тожы керегинде куучынды оноҥ ары улалтат… Чодор ла Корбу деп учар сууларда болуп, туружаачылар Ольга Швакованыҥ јилбилӱ куучынын сонуркап уктылар. Најылыктыҥ туштажузы тузалу ӧткӧн деп айдарга јараар. Келер туштажуга јетире јакшы болзын, Алтын-Кӧл!

Хамида ТАДИНА,
Владимир СУХОВТЫҤ фотојуруктары

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина