Гран-кыйу корулаачылардыҥ ойын-концерти

30.09.2022

Монголияныҥ пограничный черӱлериниҥ кожоҥныҥ ла бијениҥ ансамбли бистиҥ тергееге ойын-концерттӱ келип јӱрди.

Бу јол-јорук Россия Федерацияныҥ ла Монголияныҥ пограничниктериниҥ чыдулу чыгартулу улузыныҥ ордынчыларыныҥ Алтайдагы ла Байан-Ӧльгийдеги участоктордо ӧткӧн ишмекчи туштажулар тушта болгон. Ойын-концерт Горно-Алтайскта П. В. Кучияктыҥ адыла адалган эл театрда ӧткӧн.
Монгол делегацияныҥ культурный программазы элбек болгон. Карындаштык ороонноҥ келген айылчылар монгол фольклордыҥ байлыгын ойын-концерт башталганынаҥ ла ала бийик профессионал кеминде кӧргӱскен. Кӧрӧӧчилерге олордыҥ јаркынду, кайкамчылу кожоҥ-бијези сӱрекей јараган. Артисттердиҥ кеп-кийими кееркемјик те, сӱрлӱ де болгон. Ойын-концертти кӧргӧн улус «Браво!» деп кыйгырып, кажы ла номерди изӱ колчабыжула ӱйдешкен — ойын-концерт бӱдӱн-јарым саатка улалганы сезилбей де калган.
Артисттер ойноткылардыҥ, кожоҥ-доорыныҥ ла бијелеериниҥ јирме эки номерин кӧргӱскен. Олор пограничный башкартуныҥ ишчилериниҥ «Форпост» деп вокальный группазыла кожо јуу ӧйиниҥ кожоҥдорын база кожоҥдогон. Ол тоодо јаҥыс ла Россияда эмес, је анайда ок бастыра јер-телекей ичинде јарлу «Катюша», «Смуглянка», «Синий платочек» кожоҥдорды. Экранда кӧргӱзилген Советский Союзтыҥ Геройлорыныҥ — Алтай Республиканыҥ јеринде чыккан-ӧскӧн улустыҥ портреттери «Турналар» деп кожоҥло ӱйдежилерде, залда отурган улус бастыразы бут бажына турган. Бу, чындап та, јӱрекке шимирт экелген элес болгон.
«Бистиҥ јаан најылыгыс керегинде айдып турган кожоҥдорды талдап алганыс. Кӧрӧӧчилер бисти сӱрекей јылу уткуган, кӧп улус керек дезе бисти јӧмӧп кожо кожоҥдошкон. Бис Алтай Республикага келгениске сӱӱнип јадыс» — деп, Монголияныҥ пограничный черӱлериниҥ кожоҥныҥ ла бијениҥ ансамблиниҥ јааны подполковник Болдбаатар Базарсад айткан.
Театрдыҥ јаан залы кӧрӧӧчилерле јык толо болгон! Олорго учурлай, фойеде бичиктердиҥ ле јетирӱлик стендтердиҥ кӧрӱзи тӧзӧлгӧн. Ол бичиктерде ле стендтерде государственный гран-кыйуны экијандай корыганыныҥ, башка-башка јылдарда Россияныҥ ла Монголияныҥ ӧмӧ-јӧмӧ болужыныҥ тӱӱкизи керегинде айдылган. Ада-Тӧрӧл учун Улу јууныҥ тӱӱкизине аҥылу ајару эдилген.
Оныҥ да учун, байла, монгол ансамбль-дыҥ репертуары ла мары Россияныҥ мындый ок ӧмӧликтериниҥ јайаандыгына тӱҥдеш: ол ло тӧрӧлчи кӱӱндӱ ле Тӧрӧлине сӱӱштӱ кожоҥдор, черӱчил јайаандык ӧмӧликтер кӧргӱзип турган бијелер ошкош бијелер. Кожоҥдор ӧскӧ тилле де кожоҥдолгон болзо, олордыҥ кӧгӱстик учуры кажы ла кижиге јарт.
Россияныҥ пограничниктери Монголия-даҥ келген айылчыларды јылу уткуурга чырмайган. Экијандай уткуштыҥ окылу бӧлӱги театрдыҥ сценазында ӧткӧн. Россияныҥ ФСБ-зыныҥ пограничный башкартузыныҥ јааны Монголияныҥ пограничниктерин башкартуныҥ черӱчил ӧмӧлигиниҥ адынаҥ уткуган.
Подполковник Б. Болдбаатарга «55» таҥмалу пограничный эки кереес-темдек — Россияныҥ ла Монголияныҥ — табыштырылган. Бу мындый темдектер бистиҥ ороонныҥ ла Монголияныҥ пограничниктериниҥ чыдулу чыгартулу улузы туштажып турган јерде турат. Шак ол јерди монгол јаан делегация 2022 јылдыҥ сыгын айыныҥ 20-чи кӱнинде ӧдӱп келген.
Оноҥ Горно-Алтайскла, оныҥ јанында јараш јерлерле јол-јорук болгон. А. В. Анохинниҥ адыла адалган эл музей элбек, солун экскурсия тӧзӧгӧн. Оныҥ туружаачылары бистиҥ тергеелер ортодо тӱӱкиде кӧп немелер тӱҥдеш болгонын, муҥдар јылдарга улалган јебрен тӱӱкиниҥ јаҥылгалары бистиҥ кӱнӱҥги јадын-јӱрӱмистиҥ элестеринде кӧрӱнип келип турганын билип алган.
Ишмекчи туштажулар ӧдӧр тушта эки ороонныҥ пограничниктери государственный гран-кыйуны каруулдаарыныҥ сурактарын шӱӱшкен. Монгол ансамбльдыҥ ойын-концерти Алтай Республиканыҥ јӱрӱминде солун ла учурлу керек болуп, бистиҥ ороондор ортодогы карындаштык колбуларды керелеген.

Россияныҥ ФСБ-зыныҥ Алтай Республика аайынча пограничный башкартузыныҥ пресс-службазы

ТОП

«Гуркин» деген телекей: ачылталар ла јажыттар

Г.И. Гуркин ӱйи Мария Агафоновнала Оносто садында Атту-чуулу алтай јурукчы, политикалык ла јондык ишчи Григорий Иванович Чорос-Гуркинниҥ чыккан ӧйин ле јерин чокумдаган јаҥы документтер табылган. «ХХ чактыҥ башталарында Туулу Алтайда эҥ јарлу јон-политикалык ишчилердиҥ бирӱзи, јурукчы Григорий Иванович Чорос-Гуркин 1870 јылдыҥ чаган айыныҥ 12-чи кӱнинде Улалуда чыккан деп чотолот. Је Алтай Республиканыҥ Государстволык архивинде Улалудагы

«Јурукчыныҥ јуртын орныктырары – тӧс иш»

Јурукчыныҥ Оностогы јуртында Атту-чуулу алтай јурукчы, ады јарлу јондык ла политикалык ишчи Григорий Иванович Чорос-Гуркинниҥ чыкканынаҥ ала 155 јылдыгыла колбой тергеебисте кандый иштер темдектелгени керегинде Алтай Республиканыҥ А. В. Анохинниҥ адыла адалган Эл музейиниҥ директоры Римма ЕРКИНОВА куучындайт. – Г. И. Чорос-Гуркинниҥ юбилейине белетенери ле оныла колбой быјыл ӧткӱретен иштер керегинде Алтай Республиканыҥ башкарузыныҥ јакааны

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым