Кулјаларлу кӧжӧгӧлӧри кӧзнӧктӧрди кееркедет

28.10.2022

Оҥдой аймактыҥ тураларыныҥ кӧзнӧктӧринде алтай кулјаларлу штора-кӧжӧгӧлӧр кӧптӧй берди. Олорды јерлештерине ус келин Анастасия ТАЙЛУНОВА кӧктӧп турганы керегинде слер јербойында башка-башка берилтелердеҥ кӧргӧн-кычырган болбойор.

Бу ла јуукта бистиҥ редакцияныҥ эҥ јаан кӧзнӧктӧрин алтай кулјаларлу ап-апагаш јараш кӧжӧгӧлӧр база кееркедип ийди. Оныҥ учун Оҥдойдо болуп, Анастасияныҥ ижин бойыстыҥ кӧзисле кӧрбӧс аргабыс јок болды. Эки јыл кире таҥынаҥ бойына иштеп турган аргачыда солундар да кӧп.
Озо ло баштап оныҥ ателье-предприятиезиниҥ ады керегинде чокумдап ийели. Оогошто Настя ого алтай ат бербегенине эмеш тарынып туратан эмтир. Оныҥ да учун ол сӱӱген ижиниҥ јерине ӧбӧкӧзиниҥ ле орус адыныҥ баштапкы ӱч таныктарын бириктирип, ТайАна деп су-алтайлап угулган јараш ат берген.
«ТайАнаныҥ» ижи канайда башталганын эзедип ийели. Алган ӱредӱзиле Анастасия экономист, узак ӧйгӧ тӧрӧл аймагыныҥ акча-манат бӧлӱгинде иштеген. Кӧктӧнӧрине дезе ол оогоштоҥ ло ала арайынаҥ темигип, оныҥ ончо јажыттарына, эп-сӱмелерине бойы ла ӱренип алган. Онойдо ок эмдиги ӧйдӧ кӧкчиге ченемелин бийиктедерге интернетте видео-уроктор, курстар јаан аргалар берет. Бала чыгарда берилип турган акчазына кӧктӧнӧр баштапкы машинка садып алган. Учы-учында бу јилбӱзи јеҥген ле ол чаазын-документациялу ижинеҥ јӱре берген.
Кӧкчи таныштарыла биригеле, ателье ачып, бир канча јылдыҥ туркунына кийим чыныктап, кӧктӧп иштеген. Ковид таркаган калганчы јылдарда ол айылында отурып иштеген. Бу ижинде оны јуук улузы јӧмӧйт. Энези баалу-чуулу оверлокты тӧлӧжӧргӧ, балдары оок-тобыр иштерде база јаантайын болужат.
Аргачы јолын ус келин јон-јӱрӱмдик јӧптӧжӱлердиҥ ижиле колбой бӱдӱн-јарым јыл кайра баштаган. Бизнес-планда бичилгени аайынча ол јӧптӧжӱле берилген 250 муҥ салковойго машинкалар ла кӧктӧнӧргӧ керектӱ ӧскӧ дӧ эдимдер, материалдар алып, кӧжӧгӧлӧр кӧктӧп иштеген.
Быјылгы кичӱ изӱ айда оныҥ кереги јонјӱрӱмдик предприятие деп статус алган. Ээзи бойы ээчиде ӱредӱ-курстар божодып, тергеениҥ экономикалык ӧзӱмниҥ министерствозы ажыра јарым миллион салковой грант акча алган. Бу јӧмӧлтӧниҥ болужыла аргачы кӧктӧнӧр ачык мастерской ачкан (тургуза ӧйдӧ профессионал машинкалар, оверлоктор келип јаткан). Кӧктӧнип билер эмезе ӱренип аларга турган кажы ла кижи ого келип, профессионал машинкаларла тузаланып, узанар аргалу.
— Шторалар шидеп турарымда, кӧп улус алтай кулјалар кошсын деп сурап баштаган. Озо мен оны јурап, кезип, аппликация эдип, ончозын бойымныҥ колымла эдип туратам. Эмди мен туку Москваныҥ јанында фабрикала колбу тудуп, јураганым аайынча јакыдып ийедим. Тоолу ла алтай кулјаны тузаланадым, је олордыҥ ӧҥи, бӧзи јӱзӱн-башка болор аргалу. Фабрикада лазерле кескени капшайынча сӧгӱлбес, чыҥдый болот.
Анастасияныҥ иштери јаҥыс ла улустыҥ тураларын эмес, онойдо ок школдорды, садиктерди, библиотекаларды ла ӧрӧ бичилгениле «Алтайдыҥ Чолмоны» газеттиҥ редакциязын кееркедет. Кӧжӧгӧ-штораларга ӱзеери устыҥ колынаҥ тӧжӧктиҥ алтайлап кееркеткен кыбы, арчын салар каптар чыгат. Чыҥдыйы бийик бӧстӧрди аргачы Москвадаҥ јакыдып кӧндӱге берген. Кӧзнӧккӧ кӧжӧгӧ јакытса, олорды алдыртарыла колбой, ол бир ай киредеҥ белен болор. Бӧсти мындагы ла садудаҥ алзагар — јап-јараш кӧжӧгӧлӧ кӧзнӧгӧрди ӱч-тӧрт кӱннеҥ јабарар.
«ТайАна» предприятиениҥ эрчимдӱ ээзи келер ӧйдӧ аргачылык ижин мынаҥ да ары элбедер, эл-јонго ӱредӱлик мастер-класстар ӧткӱрер амадулу.
Ус колду аргачыга ачык јолдор кӱӱнзейдис.

Эмина Кудачина
Евгений Бутушевтиҥ фотојуругы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина