Черӱге белен болорго!

24.01.2023

Бу кӱндерде М. З. Гнездиловтыҥ адыла адалган политехнический колледжтиҥ стадионында патриотикалык јаан керек-јарак ӧткӧн.

Чаган айдыҥ 13-чи кӱнинде колледжтиҥ граждандарды черӱге белетеер ле јуучыл патриотикалык таскамал ӧткӱрер зональный тӧс јеринде ӱч кӱнниҥ туркунына ӧдӧр ӱредӱ-тазыктыру јуунтыныҥ (сбор) кӧдӱриҥилӱ ачылтазы ӧтти. Бу ла ӧйдӧ мында тӧс јерге энчи эдип КП-130 деп полевой кухня табыштырылган. Јуучыл ӱредӱниҥ ӧйинде политехнический колледжтиҥ стадионында байкан лагерь ачылган.

Кӧдӱриҥилӱ керекте туружаачыларга уткуулду сӧзин Алтай Республиканыҥ ӱредӱ ле билим аайынча министри О. С. Саврасова айтты. Оныҥ темдектегениле, бу зональный дейтен тӧс јердиҥ материально-технический тӧзӧлгӧзи јаантайын јаҥыртылат, темдектезе, 2019 јылда строй ӧткӱретен плац, буудактарлу полоса ачылган, 2022 јылда Алтай Республиканыҥ башкарузыныҥ ла ӱредӱ министерствозыныҥ болужыла электрон тир, эмди дезе, спонсорлордыҥ камааныла, тӧс јер полевой кухнялу болуп калды.
Колледжтиҥ директоры Е. В. Басаргина ӧмӧ-лигин ле студенттерди мындый кухня алылганыла уткуп, бу јаҥы јепселле јаҥыс ла «казанчыга, кондитерге» ӱренип тургандар эмес, ӧскӧ дӧ студенттер элбеде тузаланар деп айтты. Бу јалаҥдагы кухняны садып аларга болушкандардыҥ тоозында — Алтай Республиканыҥ Ӧзӱминиҥ тӧс јериниҥ башкараачызы М. Ю. Грудинин, Эл Курултайдыҥ туризм, аргачылык ла јашӧскӱрим политика аайынча комитединиҥ председатели С. К. Тимошенский, Горно-Алтайск каланыҥ администрациязыныҥ јааныныҥ баштапкы ордынчызы Ю. С. Мягкова, Алтай Республиканыҥ јуучыл комиссары О. М. Денисенко, Горно-Алтайсктыҥ јуучыл комиссары С. А. Катрашенко.

Зональный тӧс јерде черӱге белетеништи политехнический колледжтиҥ «казанчы, кондитер», «сварщик», «электромонтер», «столяр ла мебель эдериниҥ узы» деген профессиялар алып тургандар ӧдӧт. Бу уулдардыҥ кӧп лӧ сабазы ӱредӱзин божодып, черӱчил молјузын бӱдӱрип барар. Олордыҥ укаа-санаазы, кӱӱн-табы бийик, су-кадыгы бек болуп, Ада-Тӧрӧлин корыырына белен болзын дегени – бу тӧс јердиҥ тӧс амадузы. Ӱредӱлик јылдыҥ туркунына курсанттар јуучыл тӱӱки, јуучыл-техникалык дисциплина, Россия Федерацияныҥ Јуучыл ийде-кӱчтериниҥ Уставын ӱренедилер.

Јуунтыларда курсанттар стройго турар, мылтык-јепселдеҥ адар, тактикалык, тазыктыру ла јуучыл-медициналык ууламјыларла, онойдо ок радиация, химикалык ла биологиялык јанынаҥ коруланарыныҥ белетеништерин ӧткӧн.

Стадиондо мылтык-јепселдиҥ солун кӧрӱзи болгон. Солдаттыҥ формазын кийген, курсанттарды кӧрӧргӧ сӱрекей солун. Олор јалаҥда адыжарыныҥ, јуучыл кухняда иштеериниҥ, шыркалаткан јуучылдарга баштапкы болуш јетирерин кӧргӱстилер.

– Јалаҥдагы јуунтылар биске јаан туза экелет, нениҥ учун дезе јуучылдар – элистиҥ коручылдары, олор Ада-Тӧрӧлин корыырга белен болзын деп мында јаан иш ӧдӧт. Бу јуунтулардаҥ бистиҥ черӱниҥ ийде-кӱчи ӧзӧр деп сананадым – деп, политехникалык колледжтиҥ курсанты Даниил Чилбаев айдат.

Айдыс ПУШКУНОВ

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина