Јаҥы школ – јаҥы аргалар ла ижемјилер

03.02.2023

Кочкор айдыҥ 1-кы кӱнинде Кӧксуу-Оозы јуртта В. И. Харитошкинниҥ адыла адалган орто текшиӱредӱлик школдыҥ сакылталу ачылтазы кӧдӱриҥилӱ айалгада ӧтти.

«Ӱредӱлик» нацӱлекер аайынча тудулган ла 275 ӱренчик ӱренер јерлӱ бу школ 2019 јылда тудулып башталган, је ӱлекер-чоттомол документацияда кубулталар эдилгенинеҥ ле подрядчик солунганынаҥ улам тудум иштиҥ ӧйи узадылган. «Бис школ бойыныҥ эжиктерин балдарга ла ӱредӱчилерге ачарын тӱргендедерге болуп, бастыра аргаларды тузаланганыс, јаан ајару тудум иштиҥ чыҥдыйына эдилген. Тудум иштер јондыктыҥ ла ӱренчиктердиҥ ада-энелериниҥ шиҥжӱзиле ӧткӧн. Школдыҥ салымында педагогический иштиҥ ветераны Надежда Николаевна Сухотеринаныҥ эрчимдӱ турушканы јаан учурлу. Бӱгӱн бисте иштиҥ уч-турултазына сӱӱнер бастыра тӧзӧлгӧ-аргалар бар» — деп, АР-дыҥ башчызы Олег Хорохордин айткан.

Школдо ӱредӱ ӧдӧр 20 кабинет јазалган, олор јаҥы мебельле, јазалдарла, ӱредӱ-методикалык материалдарла, техникалык эп-аргаларла јепселген. Спортзал спорттыҥ јазалдарыла, актовый зал эмдиги ӧйдиҥ акустикалык системазыла, јарыткыштарла јеткилделген. Школдо балдардыҥ баштаҥкайларыныҥ тӧс јери тӧзӧлгӧн, не-немелер кӧктӧӧр лӧ слесарный мастерскойлор, психологтыҥ кабинеди, методкабинет, телкем библиотека бар. Аш-курсак белетеер јерде эмдиги ӧйдиҥ технологиялык јазалдары тургузылган, су-кадыгыныҥ аргалары кирелӱ балдарга лифт белетелген.

«Школдо јайалталу, јилбиркек балдар ӱренет. Слерге мында јилбилӱ болзын, јаҥы школдо јайаандыктыҥ телекейи элбезин, бийик кӧрӱм-санаа ла јакшы колбулар ээлезин деп кӱӱнзейдим» — деп, башчы айтты.

Школдыҥ албаты-јон сӱрекей сакыган ачылтазыла кӧдӱриҥиниҥ туружаачыларын Эл Курултайдыҥ председатели, «Единая Россия» партияныҥ тергеелик бӧлӱгиниҥ качызы Артур Кохоев уткуган: «Эмдиги ӧйдиҥ класстары, јазалдары бар бу школ јап-јакшынак. Оны тударында турушкан бастыра улуска быйан айдып турум. Балдар мында кыйалтазы јогынаҥ јакшы ӱренерине, ӱредӱчилер олорго бойыныҥ билгирлерин ле ченемелин берерине бир де алаҥзыбайдым. Слерге јаҥы школды чеберлегер деп кӱӱнзейдим. Бу школ јуртка эҥ ле јаан учурлу объект болуп јат».

«Алтай Республиканыҥ муниципал тӧзӧлмӧлӧриниҥ соведи» ассоциацияныҥ председатели, Горно-Алтайсктыҥ мэри Ольга Сафронова эл-јонды байрамла бастыра аймактардыҥ јаандарыныҥ адынаҥ уткуган. «Кажы ла јуртта ӱредӱликтиҥ јаҥы объекттерин ачканы — јаантайын байрам, бистиҥ балдардыҥ ӱренер айалгаларын јарандырганы. Школдыҥ јаан педагогикалык ӧмӧлигине, балдарга ла ада-энелерге ӧмӧ-јӧмӧ иште бой-бойына сӱӱнчи экелзин ле Кӧксуу-Оозы аймакты ӧскӱрзин деп кӱӱнзейдим» — деп, ол айткан.

Кӧксуу-Оозы аймактыҥ јааны Дмитрий Кочевов тергеениҥ башчызына ла башкарузына јаҥы школ тудулганы учун бастыра эл-јонныҥ адынаҥ быйан айткан. «2023 јылды Россия Федерацияныҥ президенти Ӱредӱчиниҥ ле таскадаачыныҥ јылы деп јарлаган. Бисте иштеҥкей, јайаандык ӧмӧлик иштейт. Педагогтор ло ӱренчиктер албатылар ортодогы, россиялык, республикан конкурстарда туружып, бийик једимдерге јеткен. 2023 јылда бу јакшынак јаҥжыгу оноҥ ары улалып, ӧзӱп ле јаранып барзын деп кӱӱнзейдим» — деп, ол бойыныҥ уткуулду сӧзинде айтты.

Педагогикалык иштиҥ ветераны Н. Н. Сухотерина школ баланы чындык кижи эдип таскадарында тӧс тӧзӧлгӧлӧрдиҥ бирӱзи болуп јат деп айтты. «Јылдар ӧдӧт, ӱйелер солынат, је тоомјы, ак-чек, чындык, ишти тооп јӱрер деген оҥдомолдор бастыра чактарга артар учурлу. Бӱгӱн бис школдыҥ јаҥы, јараш туразына кирип јадыс, ол бу ла бӱдӱмиле чеберлелип артсын. Мында бар бастыра не-немелерге чебер болор керек» — деген.

Кӧдӱриҥи ӧйинде кайралдаш база болгон. АР-дыҥ башчызыныҥ, башкарузыныҥ председателиниҥ Быйанду самаралары Кӧксуу-Оозыныҥ В. И. Хари-тошкинниҥ адыла адалган орто текшиӱредӱлӱ школыныҥ педагогторына — баштамы класстардыҥ ӱредӱчизи Ольга Пигаревага, математиканыҥ ӱредӱчизи Надежда Сухотеринага, информатиканыҥ ӱредӱчизи Анастасия Шпиляевага, Кастактуныҥ тӧс текшиӱредӱлик школыныҥ орус тил ле литература аайынча ӱредӱчизи Светлана Маймановага, директордыҥ ӱредӱ-таскамал иш аайынча ордынчызы, химияныҥ ла биологияныҥ ӱредӱчизи Людмила Музыковага, котельныйдыҥ машинисти Родион Иркитовко табыштырылган.

Тергеениҥ башчызы Кӧксуу-Оозыныҥ школыныҥ материально-техникалык јеткил-дежине тузаланарына 100 муҥ салковойдыҥ сертификадын табыштырган.
АР-дыҥ Эл Курултайыныҥ Быйанду самараларыла Кӧксуу-Оозыныҥ школыныҥ баштамы класстарыныҥ ӱредӱчизи Галина Головина, бу ок школдыҥ тискинчизи Константин Евстропов, Кастактуныҥ школыныҥ алтай тил ле литература аайынча ӱредӱчизи Наталья Добровольская ла казан азаачызы Дьендиш Папитова кайралдаткан. Анайда ок аймактыҥ администрациязыныҥ Быйанду самаралары озочыл иштӱлерге табыштырылды. Школго оргтехника аларына «Алтай Республиканыҥ муниципал тӧзӧлмӧлӧриниҥ соведи» ассоциацияныҥ адынаҥ база сертификат берилген.

Кереес тӱлкӱӱр Кӧксуу-Оозыныҥ школыныҥ директоры Ольга Тютюньковага табыштырылган кийнинеҥ окылу айылчыларга ла јуулгандарга школло экскурсия ӧткӱрилген.

АР-дыҥ башкарузыныҥ пресс-службазы

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина