Балдардыҥ эҥ телкем сады – Горно-Алтайскта

07.02.2023

Кочкор айдыҥ 3-чи кӱнинде Горно-Алтайскта Кольцевой оромдо балдардыҥ јаҥы сады ачылган.
Бу кӧдӱриҥиде Алтай Республиканыҥ башчызы Олег Хорохордин турушкан.

«Чӧрчӧк» – тергееде балдардыҥ «Демография» эл ӱлекерле тудулган эҥ јаан сады, ого 285 болчом јӱрер, ол тоодо 135 бала – ясля группаларга.
Садтыҥ эки кат туразында 13 бӧлӱк балдарга кыптар, кӱӱлик, хореографияныҥ ла физкультураныҥ залдары, кинозал, курсак белетеер јер бар. Мында ӱредӱчи-логопедтиҥ ле психолог педагогтыҥ кабинеттери керектӱ ончо не-немеле јепселген, балдарга кургак бассейн, массажтыҥ јолычактары ла сооттыҥ ӧскӧ дӧ јаҥы јазалдары бар. Садикте мультимедийный, интерактивный ла кӱӱлик эҥ јаҥы јазалдар тургузылган. Тышкары балдар ойноор јерлер эдилген.

«2019 јылдаҥ бери бу Горно-Алтайскта балдардыҥ «Демография» эл ӱлекер аайынча тудулган бежинчи сады. Бу биске балдар школдоҥ озо јӱрер 700 јаҥы јерлерди, анайда ок јаан да улус иштеер јаҥы јерлерди тӧзӧӧр арга берген. Текши алза, тергееде бис балдардыҥ јаҥы 19 садын тутканыс, быјыл база экӱзин – Кызыл-Ӧзӧктӧ лӧ Оҥдойдо – тузаланарына табыштырарыс» – деп, Олег Хорохордин кӧдӱриҥиде айткан.

АР-дыҥ башчызыныҥ темдектегениле, балдардыҥ садтарын чыныктап јазаар элбек кемдӱ тергеелик программа республикада башталып јат. Алтай Республика ороондо эҥ кӧп балдар туулып чыккан озочыл тергеелердиҥ тоозында јаантайын адалат, оныҥ учун мындый ӱлекерлер биске анчада ла керектӱ ле јуук ӧйдӧ јӱрӱм алынар деп, ол айткан.
Олег Хорохордин кӧдӱриҥиде турушкандарды уткуп, балдарга бастырајандай једимдӱ ле толо кемдӱ ӧзӱм ле су-кадык, таскадаачыларга јайаанду иш кӱӱнзеген.
Ачылтага јуулган улусты анайда ок АР-дыҥ Государстволык Јууныныҥ − Эл Курултайдыҥ башкараачызыныҥ ордынчызы Герман Чепкин уткуган. «Балдардыҥ јаҥы сады эмдиги ӧйдиҥ эҥ јаҥы, ол тоодо интерактивный јазалдарыла јепселген. Сакылталу бу тудум бӱткениле тергеениҥ башкарузын ла каланыҥ башкартузын уткуйдым» – деп, депутат айткан.

Балдардыҥ јаҥы сады ачылганы каланыҥ бастыра ӱредӱлигине јаан байрам болгонын Горно-Алтайсктыҥ мэри Ольга Сафронова темдектеген.
«Горно-Алтайскта балдардыҥ садтарына 4,5 муҥ бала јӱрӱп јат, бӱгӱн олордыҥ тоозына база 285 болчом кожулган. Каланыҥ тӧс јеринеҥ ыраада јаткан микрорайонныҥ эл-јонын уткуйдым, олорго эмди балдарын садка јетирерге јуук ла эптӱ болор» – деп, ол айткан.

Ачылтада уткуулду сӧстӧрин анайда ок Горно-Алтайсктыҥ прокуроры Андрей Латышков, балдардыҥ садыныҥ заведующийи Наталья Наумова, энелер ле адалар айткандар.
Кӧдӱриҥиде Россия Федерацияныҥ строительство ло јадар-коммунал ээлем аайынча министерствозыныҥ Кӱндӱлӱ грамотазыла «Городское хозяйство и лесничество» МКУ-ныҥ капитальный строительство аайынча бӧлӱгиниҥ јааныныҥ ордынчызы Николай Берсенев кайралдаткан. Алтай Республиканыҥ башчызыныҥ, башкарузыныҥ председателиниҥ Быйанду самаразыла балдардыҥ «Чӧрчӧк» садыныҥ башкараачызыныҥ административно-хозяйственный иш аайынча ордынчызы Владислав Патрушев кайралдаткан.
АР-дыҥ башчызы анайда ок материально-технический јеткилдештиҥ сертификадын балдардыҥ садыныҥ јаанына табыштырган. Кӧдӱриҥиде Эл Курултайдыҥ ла каланыҥ башкартузыныҥ Быйанду самаралары ла ӧскӧ дӧ кайралдар болгон, ол тоодо цифровой пианино алар сертификат.

Јаҥжыкканы аайынча јаҥы садтыҥ тӱлкӱӱри ээлерине берилген, оныҥ кийнинде айылчылар тураныҥ ичи канайда јазалганыла, балдар ойноор јерлерле танышкан.

АР-дыҥ пресс-службазыныҥ јетиргениле

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина