Алтайдын Чолмоны

Амаду – Россияныҥ тӧс командазына кирери

03.03.2023

2022 јылда Сибирьдеги федерал округтыҥ боксло ӧткӧн маргаандарында 2-чи јер алган, Барнаулдагы Олимпий резервтиҥ школыныҥ ӱренеечизи Кайрат Мегедековло эрмек-куучын ӧтти.

– Кайрат, бойыҥ керегинде куучындап ийзеҥ?

– Мен 2008 јылдыҥ кӱӱк айыныҥ 26-чы кӱнинде Моты-Оозы јуртта чыккам. Сӧӧгим сойоҥ.

– Училищеге јайалталу, албаданчак балдарды алып турган деп билерим. Айдарда, бу алтамга јетире оогоштоҥ ала таскадынар керек болбой?

– Эйе, боксло бежинчи јыл тазыктырынып јадым. Моты-Оозы јуртта 2-чи класста ӱренеримде, акам бокско јӱргӱзип баштаган. Бистиҥ тазыктыраачыларыс Яков Леонидович Байталов, оноҥ Леонид Яковлевич Байталов болгон. Олордо тазыктырынып, удабай республиканыҥ 2021-2022 јылдарда ӧткӧн маргаандарында јеҥӱлӱ јерлер алып баштагам.
Баштапкы јаан ченемелди 2021 јылда Сибирьдиҥ Томскто ӧткӧн первенствозында алгам. 44 кг бескеде баштапкы тартыжуны јеҥдиртип, јер албаган да болзом, ол меге оноҥ ары тыҥыда тазыктырынарына јакшынак тебӱ болгон. 2022 јылдыҥ тулаан айында Леонид Яковлевичле кожо училищеге ӱредӱге кирерге барганыс, је ол тушта бисти албаган. Јӱк кандык айдыҥ учында, Сибирьдиҥ Барнаулда ӧткӧн маргаандарында 52 кг бескеде 2-чи јерди алып ийеримде, мени училищеге ӱрензин деп кычыргылаган. Онойып, ӧткӧн кӱстеҥ ала Барнаулдагы олимпий резервтиҥ училищезинде 8-чи класста ӱренедим.

– Јакшы. Ӱренерге санаа-кӱӱниҥ кандый болот, ӱредӱниҥ аайы керегинде нени айдарыҥ?

– Ӱренерге јарап јат, санаа-кӱӱн јакшы (кӱлӱмзиренет). Бис интернатта јададыс. Кыпта бис ӱч уул. Таскадаачы бисти таҥла 7 саатта ойгозот, 7:30 саатта ажаныш, 9 сааттаҥ ала 10:30 саатка јетире тазыктыру ӧдӧт, оноҥ экинчи ажаныш, 11:00 сааттаҥ ала 16:10 саатка јетире ӱредӱде болодыс, оноҥ эҥирги тазыктыру. Понедельниктеҥ пятницага јетире кӱнниҥ аайы бисте мындый, јӱк субботто эҥирги тазыктыру јок, воскресеньде амырап јадыбыс.

– Азыражы, јаткан јерер кандый, слер ол учун тӧлӧйдӧр бӧ? А стипендия берилет пе?

– Курсак-тамагы, интернат јакшы, аштабайдым, соокко тоҥбойдым (кӱлӱмзиренет). Стипендия биске јӱк 9-чы классты божотсо, 1-кы курстаҥ ала берилер. Азыраганы ла јатканы учун акча тӧлӧбӧйдис.

– Сӱреен. Туулу Алтайдаҥ кожо балдар бар ба?

– Эйе, је тургуза ӧйдӧ јӱк Айдамир Санинди билерим. Ол база боксло тазыктырынат.

– Бу јолдо бойыҥа кандый амаду тургузадыҥ?

– Училищебисте кажы ла спортчыныҥ тӧс амадузы – Олимпий ойындардыҥ алтыны деп айтсам, јастыра болбос. Мениҥ де тӧс амадум андый, је озо баштап боксло Россияныҥ тӧс командазына кирип алар керек. Оныҥ учун албаданып тазыктырынадым. Спортты талдап алган јолымда мен јарлу боксер Майк Тайсонныҥ «Меге кӱч болзо, мен јаантайын бойыма айдынадым: колдорымды бош салып ийзем – јакшы болбос» деген сӧстӧриле баштанадым, олор меге ичкери барарга ийде берет деп айдарга јараар.

– Мындый амаду тургузып, ол аайынча иштенип турганыҥ јакшы. Кайрат, сен бистиҥ албатыныҥ адын кӧдӱретен эр эмтириҥ! Амадаган амадуларыҥ бӱтсин! Су-кадык јӱр, албатыҥнаҥ алкышту, Алтайыҥнаҥ курчулу бол! Быйан болзын.

– Слерге быйан. Јакшы болзын.

Эрелдей ТЕЛЕСОВ