Ада-энелерле ЕГЭ табыштырар кӱн

22.03.2023

Тулаан айдыҥ 15-чи кӱнинде Горно-Алтайскта «Ада-энелерле ЕГЭ табыштырар кӱн» деп текшироссиялык акция ӧтти.

Бу кӱнде ада-энелер балдарыла кожо јерлерин толужып, ЕГЭ табыштырдылар. Быјыл орус тилдиҥ экзамени В. К. Плакастыҥ адыла адалган республикан гимназияда ӧтти.
Јуулатан ӧй – 10 саат. Ого јетире улус јуулыжып, коридордо кӧптӧй бергенде, олор ортодо кандый да бир эмеш маҥзаарыш тӱҥей ле бар деп билдирип турды. Бодозо, чындаптаҥ ла учурлу экзамен табыштырарга келгендий. Керек-јаракта ончо јаба 13 кижи турушты, ол тоодо башкаруныҥ председателиниҥ јонјӱрӱмдик сурактар аайынча ордынчызы Динара Култуева ла АР-дыҥ ӱредӱниҥ ле билимниҥ министри Ольга Саврасова.

«Јаан улустыҥ» экзамени чике ле ӱренчиктердиҥ ЕГЭ-зи чилеп ӧдӧт. Озо баштап ӧткӱреечилер паспортты кӧрӧр, чаазынга темдектеер, телефонды ла нек-сакты артыргыстырар, темир бедиреер јазал ажыра ӧткӱрер, оноҥ класска кирер алдында партаныҥ номери аайынча отургызып салар. Чындап, парталардыҥ номерин туружаачыларга компьютер талдап јат, оныҥ учун кажы партага отурары озодоҥ јарты јок.

Улус јерлерине отурган кийнинде, кем де табыштанбас, токыналу айалга болор керек. Экзамен башталып јат. Ӧткӱреечи ЕГЭ-ниҥ табыштырар ээжилери керегинде «кире сӧс» кычырат. КИМ-дердиҥ варианттары ӱлелет. Туружаачылар чаазындары ончо бо, јастыралар бар ба деп кӧргӱлейт, оноҥ инструктаж аайынча бланктарды толтыртат. Ӱзези белен болзо, ӧткӱреечи доского экзаменниҥ башталган ла тӱгенер ӧйин бичип салат. Чын ЕГЭ-де 27 јакылтага 3,5 саат берилген болзо, ада-энелерге 1 саатка 8 јакылта болгон.

Ӧй ӧдӧ берерде, ӧткӱреечи чаазындарды јууп, ширтӱге апарды. Бу ӧйдӧ, Ольга Саврасова ада-энелердиҥ ле журналисттердиҥ сурактарына каруу берди. Анайда ок су-кадыктаҥ кенек балдарга ЕГЭ-ни табыштырарга јарамыкту айалгалар керегинде јартады.

Туружаачылардыҥ турулталары јакшы болды, бир кижи 100 балл да алган. Учында сӧстӧрди экзамен табыштырар јердиҥ јааны ла Динара Култуева айттылар.
Анайып, јакшынак акция ару, омок кӱӱн-санаала ӧдӱп калды.

Алтай Республикада текшироссиялык акция тулаан айдыҥ 1-кыдаҥ ала 25-чиге јетире кӱндеринде ӧдӧт, мында бастыра муниципалитеттердиҥ выпускниктериниҥ ада-энелери туружат. Анайда ок олорло кожо јербойыныҥ башкартузыныҥ турчылары, кеендиктиҥ ле культураныҥ ишчилери, СМИ-ниҥ улустары ла блогерлер туружар аргалу.
Быјылгы ЕГЭ-де (кӱӱк айдыҥ 26-чы кӱнинеҥ јаан изӱ айдыҥ 1-чи кӱнине јетире) 1300-теҥ ажыра ӱренчиктер туружар, бастыра экзамен табыштырар 14 јер белетелер.

Эрелдей ТЕЛЕСОВ

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина