Кӧстиҥ јажы ла эрикчелдӱ сӱӱнчи

23.05.2023

Ар-бӱткен чечектелген кӱӱк айдыҥ јаскы кӱнинде школды божодып јаткан 11-чи класстардыҥ балдарында сакылталу ла ол ок ӧйдӧ эрикчелдӱ калганчы кӱзӱҥӱлер шыҥыраган. Анайып, Горно-Алтайск калада мындый кӧдӱриҥилӱ байрам В. К. Плакастыҥ адыла адалган республикан гимназияда ӧтти.

Ресгимназияныҥ тепсеҥине чыккан 11-чи класстарды ла олордыҥ ӱредӱчилерин изӱ колчабыжула уткудылар. Школды божодып јаткан балдар сӱрекей јараш: кыстар ак фартуктарлу, ак бантиктерлӱ, уулдар пиджактарлу, ак чамчаларлу, кӧбӧлӧк-галстуктарлу. Кажызыныҥ ла чырайында сӱӱнчи, ӧкпӧӧриш ле база та кандый кунукчыл сезилет…

Кӧдӱриҥини ӧткӱреечилердиҥ айтканыла, национальный школ тӧзӧлгӧнинеҥ ала оны 5 муҥ кире ӱренчик божоткон. Олордыҥ ортозында ӱредӱзин 78 кижи алтын медальду, 46 кижи мӧҥӱн медальду тӱгескен. Бу школдоҥ тергеебистиҥ сӱрекей тоомјылу, јарлу, јайалталу ла ойгор санаалу улузы чыккан. Поэттер, бичиичилер, билимниҥ кандидаттары ла докторлоры, артисттер, јурукчылар, эмчилер, инженерлер, политикалык ишчилер, эл-тергеелик сыйлардыҥ лауреаттары, башка-башка ордендердиҥ кавалерлери. Оныҥ да учун 2023 јылдагы бу 74-чи выпусктыҥ јииттери олордыҥ јолын јолдоп, тӧрӧл республиказыныҥ, орооныныҥ оморкодузы болор деп ижемји бар.

Бу байрам балдарыныҥ он бир јылдыҥ туркунына јеҥӱлери учун сӱӱнген, јеҥдирткенине санааркаган ада-энелерине, ӱредӱчилерине ле таскадаачыларына баалу ла кару. Олор кажы ла бала учун оморкоп тургандар.

Быјыл гимназия 11-чи класстыҥ 54 лӧ 9-чы класстыҥ 77 выпускнигин јӱрӱмниҥ јаан јолына чыгарып јат. Олордыҥ тоозында ӱренчиктердиҥ билим биригӱзиниҥ, спорт маргаандардыҥ, јайаандык конкурстар-дыҥ туружаачылары. Кӧдӱриҥиде уткуулду сӧстӧрин АР-дыҥ башкарузыныҥ председателиниҥ ордынчызы Динара Култуева, АР-дыҥ Эл Курултайыныҥ эл политика, ӱредӱлик, культура, јондык биригӱлер ле элбек јетирӱлер эдер эп-аргалар аайынча комитединиҥ председатели Наталья Екеева, АР-дыҥ ӱредӱ ле билим аайынча министриниҥ баштапкы ордынчызы Екатерина Чандыева, ресгимназияныҥ директоры Наталья Тадышева, классты башкараачы ӱредӱчилер Людмила Тадина, Ырыс Клёнова, Жанна Уханова ла ада-энелер Любовь Токоекова, Айана Иванова айттылар. Јаандар выпускниктерге баштанып, олор экзамендерди јакшы табыштырзын, јӱрӱмде бойыныҥ јолын табып, орооныстыҥ тоомјылу улузы болзын, кичӱ тӧрӧлин ундыбай, ого јарамыкту иштезин деп кӱӱнзеп, балдары алтай тилин, чӱм-јаҥжыгуларын ундыбай, тооп јӱрзин деп јакардылар.

Выпускниктер ада-энелерге ле ӱредӱчилерге, таскадаачыларга јакшы таскамалы, турумкайы учун быйанын айткан. Калганчы кӱзӱҥини 11-чи класстыҥ выпускниги Алан Согоноков ло 5-чи класстыҥ ӱренчиги Амелия Антарадонова соккондор.

Кӧдӱриҥиниҥ кийнинде гимназияныҥ јаан залында 11-чи класстыҥ балдары ада-энелерге, ӱредӱчилерге ле ӱренчиктерге јаҥжыгу болуп калган «Незабудка» деген јилбилӱ ойын-концерт кӧргӱсти. Ондо школдо ӧткӱрген ӧйлӧриниҥ элестери, оогоштогы ла эмдиги фотојуруктары, кожоҥ-бије ле выпускниктердиҥ ачык айдыныжы, кӧстиҥ јажы ла эрикчелдӱ сӱӱнчи…

Бу байрамныҥ кӧрӧӧчизи болуп, республикан гимназия чындап та Алтай Республикабыстыҥ аҥылу ла эҥ јаркынду школы болгонын база катап билдим. Оныҥ тӧс байлыгы — слер, ӱренчиктер. Кандый да уур-кӱчтерди ӧмӧ-јӧмӧ ӧдӱп, нак јӱргенерле бис, ада-энелер, оморкойдыс. Гимназияныҥ мындый ла ойгор санаалу, чечен тилдӱ, аҥылу кӧрӱм-шӱӱлтелӱ, ӧктӧм, кичӱ тӧрӧлигерди кӧдӱрер чындык балдары болугар! Слердеҥ Алтайыстыҥ келер ӧйи камаанду.

Тергеебистиҥ быјылгы ончо выпускниктерине школдо шыҥыраган калганчы кӱзӱҥи јолдорын арутазын, бу јииттердиҥ јӱрӱми ырысту ла узун болзын деп кӱӱнзейли.

Санаа-кÿÿнигер ачык болзын,
Jÿрегер сÿÿнчиге алдыртып ойнозын,
Jайылган чаҥкыр теҥери алдында
Jаантайын Слерде ырыс болзын,
Амадаган амадулар бÿдÿп турзын!

Айару ЧЕКОНОВА
Автордыҥ фотојуруктары

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина