Кой кайчылаачылардыҥ мӧрӧйи

Кой кайчылаачылардыҥ мӧрӧйи – Оҥдойдо

30.05.2023

Кой кайчылаачылардыҥ республикан мӧрӧйи кӱӱк айдыҥ 26-чы кӱнинде Оҥдой јуртта укту мал ӧскӱрген станцияныҥ јеринде ӧткӧн.

Ондо Кан-Оозы, Кӧксуу-Оозы, Оҥдой, Шабалин, Улаган аймактардаҥ келген улус турушкан. Мӧрӧйди АР-дыҥ јурт ээлем министерствозы Оҥдой аймактыҥ башкартузыныҥ јӧмӧгӧниле тӧзӧп ӧткӱрген.

«Биске, Алтай Республиканыҥ улузына, койды тудары профессия эмес, јадын-јӱрӱминиҥ айрылбас бӧлӱги болуп јат. Калганчы јылдарда койдыҥ тӱгине суру јабызап, оныҥ баазы сӱрекей тӱшкен де болзо, эмди јеҥил промышленностьты тӱкле јеткилдеер сурак ороонныҥ эҥ бийик јаҥдарында – Федерация Совединде, Государстволык Думада шӱӱжилет. Республиканыҥ јурт ээлем министерствозы кой туткандарды јӧмӧп, тӱк табыштыргандарга былтыр текши чотло 13 млн салковой јӧмӧлтӧ акча тӧлӧгӧн. Койчыларды јӧмӧӧр ишти оноҥ ары улалтарыс» – деп, АР-дыҥ јурт ээлеминиҥ министри Андрей Цыгулев мӧрӧйдиҥ туружаачыларына уткуулду сӧзинде айткан.

Мӧрӧйгӧ келгендерди анайда ок Оҥдойдыҥ јааныныҥ ордынчылары Анатолий Атаров ло Суркура Сарбашева уткуп, омок кӱӱн-санаа ла једимдӱ иш кӱӱнзеген.
Кой кайчылаачылардыҥ республикан мӧрӧйи Оҥдойдыҥ јеринде ӱчинчи јыл улай ӧткӧн. Былтыр ондо 12 кижи турушкан болзо, быјыл 20 кижи келген. Мӧрӧйдиҥ турулталарыла машинкала кой кайчылашта 1-кы ла 2-чи јеҥӱчил јерди Илья Николаев ле Мерген Шатин (Кан-Оозы аймак) алган, 3-чи јерге Олег Тайтаков чыккан (Шабалин аймак). Колло кой качылашта јеҥӱчилдер ончозы эпшилер болгон, јеҥӱчилдер –1-кы јерде Сырга Тайтакова (Шабалин аймак), 2-чи јерде Нина Ерелина (Кӧксуу-Оозы аймак) ла 3-чи јерде Светлана Бедушева (Улаган аймак).

Мӧрӧйдиҥ јажыла эҥ јиит туружаачылары Владимир Абаков ло Чейнеш Шкакова (экӱлези Кӧксуу-Оозы аймактаҥ) ла эҥ јаан јаштулары Григорий Ороев (Оҥдой аймак) ле Светлана Ядомыкова (Улаган аймак) база ајару јок артпаган.

Мӧрӧйдиҥ ончо туружаачылары кӱндӱлӱ грамоталарла, акчала сыйлаткан.

Светлана Кыдыева
Галина Миронованыҥ фотојуруктары

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина