«Бир кожоҥ – бӱдӱн jӱрӱм»

02.06.2023

«Кемди сен тӱженедиҥ эмди?» — мындый сӧстӧрдӧҥ «Уксаҥ мени» деп јарлу ӱлекердиҥ туружаачызы Милана Бочкинаныҥ кожоҥы башталып јат.

Бу јиит кожоҥчы Кан-Оозы аймакта чыккан. Баштамы класстарда Оҥдой аймактыҥ Кулады јуртында ӱренген. Кожоҥдоп ондо баштаган. Экинчи класстаҥ ала башка-башка кружокторго јӱрген. Ол ӧйдӧ кӱӱниҥ ӱредӱчизи «ӱниҥ сӱрекей јакшы» деп айтканы санаазына јакшы артып калган.

7-чи класстаҥ ала 11-чи класска јетире Милана Горно-Алтайск каланыҥ 7-чи таҥмалу школында ӱренген. Эмди ГАГУ-дагы алтаистиканыҥ ла тюркологияныҥ факультединде экинчи курста ӱренет.

2019 јылдаҥ ала јол алынган «Уксаҥ мени» деп ӱлекер кӧп јииттерге кожоҥдооры јанынаҥ баштапкы алтамдарын эдерге болужат. Милана ол керегинде телеберилтедеҥ, газеттердеҥ ле јондык сетьтердеҥ кӧрӱп-угуп туратан. 2023 јылда ӱлекердиҥ јаҥы сезоны ачылганын база ла интернеттеҥ кычырып, ондо туружар деп бек шӱӱген. Онойып, ол кожоҥдогонын видеого согуп, соцсетьтерде бойыныҥ аккаунтына чыгарган. Конкурстыҥ тӧзӧӧчилери Милананыҥ кожоҥын јарадып, јарым финалга кычырган.

Сакылталу финал кӱӱк айдыҥ 12-чи кӱнинде ӧтти. Белетеништӱ ӧйдӧ бастыра туружаачыларга кӱчке келишкен деп айдарга јараар. Је Милана ончо буудактарды ӧдӱп, амадузына јеткен. Кӧрӧӧчилерге бойыныҥ «Кемди?» деп кожоҥын сыйлап, кажы ла кижиниҥ јӱрегин кайылтканын кӧрӧӧчилердиҥ изӱ колчабыжузы керелеген. «Болушкан улуска јаан быйанымды айдып турум. Бу ӱлекер меге тузалу ла учурлу ченемел болды» – деп, Милана куучындаган.

Кайкамјык ӱндӱ туружаачыларды кӧдӱриҥилӱ айалгада кайралдаган. Конкурста јаҥыс та алтай кожоҥдор эмес, је орус та, английский де тилдерле кожоҥдор улусты сӱӱндирди. Бу ӱлекердиҥ быјылгы јеҥӱчили болуп Карим Манзыров чыкты.

Јердиҥ ӱстинде эҥ ле кӧп кожоҥдор сӱӱшке учурлалган. Сӱӱш јаҥыс ла ырысту болор аргазы јок. Ачу сӱӱш база бар. Шак ондый јӱрек сыстаткан сӱӱшке Милананыҥ «Кемди?» деп кожоҥы учурлалган. Бу кожоҥдо кыстыҥ каруу јок сӱӱжи керегинде айдылат. Кӧӧркийдиҥ санаазында јаҥыс ла бир сурак «Кемге сӱӱжиҥ сыйлайдыҥ?». Је бу сурагына ол каруузын бойы да билер. Сӱӱген кижизи јӱрегин ӧскӧ кыска берген.

«Шоҥкор Александрович «Кемди?» деп кожоҥды 7 јыл кайра бичиген. Је ого келишкедий ӱн узак табып болбогон. Ӱним бу кожоҥго јарап турганын билип, оны меге сыйлаган. Јаан сый учун ӱредӱчи-таскадаачыма быйан».

Милана јаҥыс ла кожоҥдоор эмес, јуранар, ӧскӧ тилдер ӱренерине јайалталу бала. Келер ӧйдӧ јӱрӱмин вокалла колбоор кӱӱндӱ. «Кажы ла кижиниҥ јӱрӱминде кожоҥ јаан учурлу ине. Темдектезе, тыҥ кунукса, кожоҥ кижиниҥ кӱӱн-санаазын кӧдӱрер аргалу. Оныҥ да учун мен кожоҥдорымла албаты-јонымныҥ кӱӱнин кӧдӱрип јӱрерге амадайдым» – деп, Милана айдат.

Анастасия КНЫЕВА

ТОП

«Баатырларыс ойгонып калды…»

(Башталганы 1-кы номерде) «Алтын-Эргек» кай чӧрчӧкти сценада «Ээлӱ кайдыҥ» турчыларыла кайлап отурыс. Ол тушта мениле саҥ башка учурал болгон. Кандый да ӧйдӧ сӱнем чыга бергендий, бойымды ӱстинеҥ тӧмӧн ајыктап турум. Топшуур согуп турганымды кӧрӧдим. Ол ло ок ӧйдӧ коштойындагы, алдыгы, ӱстиги телекейлерге јӱрӱп, олордо не болуп турганын, ондогы јӱрӱмди база кӧрӱп турум. Ончо ло бойым

Малдыҥ сӧӧк-тайагыла тудуш јаҥдар

Кыптунак Малды сойгон кийнинде эҥ ле озо этле кожо кыптунакты кайнадар учурлу. Јаак Эки јаакты айрыйла, бирӱзин тургуза ла кайнадар. Оноҥ башка эки јаак јадала, «арткан этти јип салар». Ол тушта этти јизе, курсакка бодолбос. (К. И. Санин) Кары Карыны энедеҥ јаҥыс бӱткен кижи јарбас керегинде албатыда чӱм-јаҥ бар. Оныла колбулу мындый кеп-куучын арткан: «Бир

Јаҥарыс бистиҥ Алтайга јаҥыланзын

Јаҥы Койон јылдыҥ бажында телеҥит јаҥарыс коштойындагы Алтай крайда профессионал студияда јыҥыраганын интернетле «нӧкӧрлӧжип» турган улус уккан-кӧргӧн лӧ болбой. Оны кӧргӧн кижиниҥ база ла катап «Улаган тыҥ!» деп, кӧксине чабынар кӱӱни келер. Бу узак јолды кӱчсинбей, Улаган аймактыҥ кеендикти, узанышты ла спорттыҥ албаты бӱдӱмдерин элбедер тӧс јериндиҥ башкараачызы Мерген Тельденовко, Алтай Республиканыҥ ат-нерелӱ артисттери Марина