Алтайдын Чолмоны

Јайалталарга јолду «Амаду»

02.11.2023

Ӧткӧн ӱлӱрген айдыҥ 27-чи кӱнинде Шабалин аймактыҥ культуразыныҥ тӧс јеринде јиит поэттердиҥ ле бичиичилердиҥ «Амаду» деп адалган республикан следы ӱчинчи катап ӧтти. Бу солун керек-јаракты Алтай тилдиҥ кӱнине учурлай Горно-Алтайсктагы ӱредӱчилер белетеер колледж ӧткӱрген.

Ӱлекер кӧп амадуларлу. Ол тоодо јашӧскӱрим ортодо јиит јайалталар таап алары, олорды таскадып, оноҥ ары ӱредери, ӧрӧ кӧдӱрилерге јӧмӧжӧри, алтай тилин билерине, сӧстиҥ учурын оҥдоп јӱрерине таскадары.

Слетто башка-башка аймактардыҥ ӱренеечилери, орто ӱредӱлӱ профессионал организациялардыҥ, Горно-Алтайсктагы эл университеттиҥ студенттери турушкандар.
Конкурс ӱч номинацияла ӧткӧн. «Ӱлгер ле прозаныҥ авторлорыныҥ конкурсында» баштапкы јерди Шабалинниҥ Л. В. Кокышевтиҥ адыла адалган орто ӱредӱлӱ школынаҥ Амелия Могульчина алды. Экинчи јерди Сугаш јурттаҥ Ксения Телесова алган болзо, ӱчинчи јерге Улаганнаҥ Дарина Мамыева чыкты. Бу ла конкурста Саратаннаҥ Арина Чулунова «Албатылык энчини корыыры» деген номинацияныҥ сыйын алды. Арина ар-бӱткен керегинде чӧрчӧк куучындаган.

Бу номинацияныҥ жюризиниҥ турчылары Горно-Алтайсктагы ӱредӱчилер белетеер колледжтиҥ алтай бӧлӱгиниҥ јааны М. Ю. Анышева ла «Алтайдыҥ Чолмоны» эл газеттиҥ баш редакторы С. В. Триянова болгон. Кайралдаш ӧйинде С. В. Триянова балдарды уткуп: «Слет јиит поэттердиҥ ле бичиичилердиҥ деп адалган да болзо, авторлордыҥ номинациязында тӧрт лӧ бала турушты. Је бу тӧрт кызычактыҥ чӱмдеген јолдыктарын угуп, бисте келер ӧй бар эмтир деп санаа келет.

Ксения Телесова Алтайы керегинде ӱлгерин кожоҥ кептӱ сӱрекей јараш кычырды. Амелия Могулчина топшуурла ойноп, кожоҥдоп турган эмтир. Ол ӱлгерин байлу топшуурына учурлаган. Эҥ кичинек туружаачы Дарина Мамыева аҥылу јуучыл операцияда јеҥ јастанган акаларына учурлай эземниҥ ӱлгерин кычырарда, отурган улус кӧстӧриниҥ јажын канайып тӧкпӧс…

Бу балдарды чӱмдеерин бир де чачпай, узын тыҥытсын, бичимелдерин кемзинбей, газетке аткарзын деп кычырадым» – деп айтты.

«Алтай бичиичилердиҥ чӱмдемелдерин кычыраачы-ларыныҥ конкурсында» жюриде АР-дыҥ ӱредӱ ле билим министерствозыныҥ баш специалисти А. Б. Чендекова (председатель), «Эл Алтай» телерадиокомпанияныҥ корреспонденти, Алтай Республиканыҥ нерелÿ журналисти З. М. Торбокова, Алтаистиканыҥ С. С. Суразаковтыҥ адыла адалган билим-шинжÿлик институттыҥ ишчизи, филология билимдердиҥ кандидады М. С. Дедина, Шабалин jурттагы балдардыҥ «Алтынсай» деп турачагыныҥ алтай тилдиҥ ÿредÿчизи О. С. Азанова, Мыйту jурттыҥ толо эмес школыныҥ алтай тилдиҥ ле литератураныҥ ÿредÿчизи В. С. Кужакова, Камлак jурттыҥ толо эмес школыныҥ директорыныҥ ÿредÿ аайынча ордынчызы А. В. Мехова болдылар.

Мында 5-7 класстар ортодо Каспа јурттаҥ Аурика Иркитова эҥ артык болды, экинчи јерде Экинурдаҥ Виктория Мешкина, ӱчинчи јерде Горно-Алтайсктагы 7-чи таҥмалу школдыҥ ӱренеечизи Арунай Кульдина болды.

8-11 класстар ортодо баштапкы јерди Горно-Алтайсктагы 7-чи таҥмалу школдыҥ ӱренеечизи Даяна Мамаева, экинчи јерди педколледжтеҥ Александр Токтомысов, Айас Куркаев, Дмитрий Батишев, Аткыр Токтошев алдылар. Ӱчинчи јерге Каспаныҥ школыныҥ ӱренеечизи Байсана Кергилова чыкты.

Онойдо ок башка-башка номинациялардыҥ дипломдорыла јирме эки бала кайралдатты. Бастыра туружаачылар Алтай Республиканыҥ ӱредӱ ле билим министерствозыныҥ дипломдорыла, быйанду самараларыла, сертификаттарла, кайралдаткан. Јеҥӱчилдерге кийнинде Москвада А. М. Горькийдиҥ адыла адалган Литературный институтка ӱредӱге кирерге јӧмӧлтӧ-болуш эдилер деп, конкурстыҥ тӧзӧӧчилери айдат.

Тӧзӧӧчилер Шабалин аймактыҥ администрациязыныҥ ӱредӱ башкартузыныҥ јааны Т. Н. Алматовага, жюриниҥ турчыларына, Л. В. Кокышевтиҥ адыла адалган орто ӱредӱлӱ школдыҥ ӧмӧлигине слетты бийик кеминде ӧткӱрерине болушканы учун быйанын айттылар.

Светлана Купюшева