Алтайдын Чолмоны

Россияныҥ кӱни — Горно-Алтайскта

20.06.2024

Эҥ артык јайаандык ӧмӧликтердиҥ ойын-концерти, мастер-класстар, «Најылыктыҥ каравайы» деген фестиваль, башка-башка албатылардыҥ аш-курсагы ла эҥирги байрамдык салют — шак мынайда Горно-Алтайскта Россияныҥ кӱни темдектелди.

Тергеениҥ тӧс калазында байрам алтай калыктыҥ атту-чуулу јурукчызы, јондык ла политикалык ишчизи Григорий Иванович Чорос-Гуркинниҥ кереезине чечектер саларыла башталды. Оноҥ ары байрам-јыргал «Албатылар ортодо најылыктыҥ парадыла» ачылып, культураныҥ ла чӧлӧӧ ӧйдиҥ паркында улалды.

Алтай Республиканыҥ башчызыныҥ ижин удурумга бӱдӱреечи Андрей Турчак уткуулду сӧзинде: «Россия бистиҥ кажыбыска ла јаҥыс ла чыккан-ӧскӧн, иштеп, биле тудуп, бала-барка азырап јаткан ороон эмес, Россия — ол бистиҥ улу тӱӱкибис, ада-ӧбӧкӧлӧристиҥ јеткен једимдери, байлык культурабыс ла јаҥжыгуларыс, кӧгӱс-байлыктарыс. Алтай Республика Россияныҥ тӱӱкизине ас эмес учурлу бӱктерди кошкон, бӱгӱн де текши ороонныҥ ӧзӱмине, оныҥ кыйуларын быжулаарында ла корыырында јаан камаанын јетирет» — деп айтты.

Анайда ок А. Турчак «Россия — ол турумкай санаалу ла телкем јӱректӱ, качан да болзо, Тӧрӧлин корыырга белен болгон улузыс» деп темдектеди. «Туулу Алтайдыҥ эҥ јаан байлыгы — мында јуртаган улус. Тергее башка-башка укту, башка-башка кудай јаҥду 90 албатыны бириктирет ле мында олор нак, јӧптӱ јаткылайт.

Бӱгӱн бис Горно-Алтайскта албатыныҥ најылыгыныҥ фестивалин ӧткӱрип, Россияныҥ кӱнин ончобыс кожо темдектейдис. Россияныҥ кӱниле, најылар! Бистиҥ улу ла сӱӱген орооныстыҥ кӱниле!»

Алтай Республиканыҥ Эл Курултайыныҥ председатели Артур Кохоев јуулгандарды уткуды. «Бис орооныстыҥ ӧрӧ ӧзӱмине, тыҥыырына сӱрекей јаан камаанын јетирген јерлештерисле оморкойдыс. Алтай Республиканыҥ эл-јоны јонјӱрӱмдик ончо бӧлӱктерде иштеп јат, бистиҥ јуучыл уулдарыс дезе Тӧрӧлистиҥ јилбӱлерин, келер ӧйисти корыйдылар» — деп, ол айткан.

Байрамныҥ айылчыларын јуучыл керектердиҥ ветераны, «Тӧрӧлин корыычылар» фондтыҥ тергеелик бӧлӱгиниҥ координаторы Игорь Алчагин база јылу уткуды.
Кӧдӱриҥилӱ айалгада ак-чек ижиле аҥылангандарга государстволык сыйлар, Алтай Республиканыҥ башкарузыныҥ ла Эл Курултайдыҥ кӱндӱлӱ грамоталары ла быйанду самаралары, 14 јажы јеткендерге Россияныҥ граждандары болгоныныҥ темдеги — паспорттор табыштырылды. Тергеениҥ кӧп балдар азырап чыдаткан билелерине баалу сыйлар сыйлалды.

«Бис – россияндар» деп адалган байрамдык ойын-концертте эҥ артык јайаандык ӧмӧликтердиҥ ле таҥынаҥ кожоҥчылардыҥ алтай ла орус тилдерле кожоҥдогоны кӧрӧӧчилерге ӧкпӧӧргӧн кӱӱн-санаа сыйлаган. Алтай Республиканыҥ устарыныҥ мастер-класстарында албатылык эдимдерди јазайтанын кӧрӱп, бойын ченегендер кӧп болды.

Фотојуруктардыҥ «Калыктар кӧп, орооныс јаҥыс» деп адалган кӧрӱ-выставказын кӧрӱп, Россияда ла Алтай Республикада башка-башка укту кандый кӧп калыктар јуртап јатканыла анчада ла балдарга таныжарга јилбилӱ ле керектӱ болды.

Эҥир кирерде, «Мен сӱӱйдим сени, Россия» деп ойын-концерт башталып, сценага тергеебистиҥ јиит артисттери чыккан. Олордыҥ јайалталу, экпиндӱ бијелери ле кожоҥдоры байрамныҥ айылчыларын сӱӱндирди.

Алевтина МЕРКИТОВА
Евгений БУТУШЕВТИҤ фотојуруктары