Настройки отображения

Размер шрифта:
Цвета сайта:
Ностройка изображения
Ностройка изображения

Настройки

Алтайдын Чолмоны

Тырмуушка экинчи катап баспаска…

Республиканыҥ спортчыларыныҥ кӧп јылдардыҥ туркунына амадаган кӱӱн-санаазы быјыл, карын, бӱтти. Горно-Алтайскта физкультураныҥ ла спорттыҥ колледжи ачылды.

Ӱредӱге кирген баштапкы 25 студент бӱ кӱндерде ырысту сандырашта. Олор билгирлердиҥ элкем-телкем «теҥизинде кӧмӱлип», туй ла 3 јыл 10 айдыҥ бажында колледжтеҥ спорттыҥ аҥылу ӱредӱлӱ специа-листтери болуп чыгар. Ӱредӱлӱ јылга учурлалган кӧдӱриҥилӱ линейка сыгын айдыҥ 2-чи кӱнинде «Јиит спартакчы» спортзалда ӧдӧр.

Колледжтиҥ бозогозын баштапкы ла катап алтап јаткан студенттерди республиканыҥ башкараачылары, ады-јолдоры јер-телекейге јарлу спортчылар, ӱредӱчилер ле ада-энелер уткуур.

Балдар баштапкы ӧйлӧрдӧ педколледжте ӱренер. Олор кӱнине акча тӧлӧбӧзинеҥ ӱч катап изӱ аш-курсакла, тазыктырынышка керектӱ кеп-кийимле јеткилделер. Студенттерге анайда ок тазыктыру сборлор тӧзӧлӧр.

Колледжтиҥ директорына дзюдо кӱрешле республикада јарлу тазыктыраачылардыҥ бирӱзи Россия Федерацияныҥ физкультуразыныҥ ла спортыныҥ нерелӱ ишчизи Сергей Грушин тудулган. Баштапкы болоры кӱндӱлӱ де, кӱч те керек. Бис ого јаҥы иште бийик једимдер кӱӱнзеп турубыс.

Спорттыҥ тазыктыраачыларын белетеер колледжте эмди тургуза самбоныҥ, дзюдоныҥ, грек-рим кӱрештиҥ, јеҥил атлетиканыҥ, чананыҥ (биатлонныҥ) бӧлӱктери ачылган. Јада тура олорго рафтингтиҥ бӧлӱги база кожулар деген табыш бар.

Директорго дезе абитуриенттердеҥ кӧп сурактар болгон деп айдар керек. Олор колледжте спорттыҥ алтай бӱдӱмдериле — шат-рала, ок-јаала бӧлӱктер болор бо деп сонуркагандарын билерим. Је абитуриенттерди кӧп лӧ сабазында јадар јерле — общежитиеле колбулу сурак јилбиркеткен. Олорго «андый арга эмди тургуза јок» деген каруу болгон.

Балдарын улустыҥ айылында тӧлӧп туруп јаттыргызары кезик билелерге кӱчке келижип јат. Мындый айалгаларга анчада ла јурт јерде јаткан ада-энелер учурайт. Оноҥ улам јайалталу балдардыҥ јолдоры туйукталат.

Бисте студенттердиҥ јадар јериле, олордыҥ ӱренетен айалгаларыла колбулу сурактар канча јылдардыҥ туркунына ол ло бойы курч артып јат деп айдар керек.

2003 јылда Горно-Алтайскта культураныҥ ла санаттыҥ Г. И. Чорос-Гуркинниҥ адыла адалган колледжи тӧзӧлип турарда, ого јарагадый тура да, общежитие де, кадрлар да болбогон. Ӧйинде бӱтпеген сурак эмди канча јылга улалат. Бу учуралда куучын культишчилердиҥ ӱренип турган эски туразы ла олордыҥ общежитиези керегинде ӧдӧт.
Культураныҥ колледжине, физкультураныҥ ла спорттыҥ јаҥы ачылган андый ок ӱредӱлӱ јерине таҥынаҥ башка тура да, общежитие де керек. ГПТУ-ныҥ ӱренеечилери јадып турган јебрен общежитиени чыныктап јазаар некелтелер база турат.

Сок јаҥыс классикалык университедибистиҥ учурын айтпаза да јарт. Ол качан да болзо, билгирдиҥ, билимниҥ ле кӧгӱс-санааныҥ тӧс байзыҥ-јурты болуп артар. Анда канча јылга улай культураныҥ институдын ачып болбой јадырыс.

Горно-Алтайскта физкультураныҥ ла спорттыҥ колледжи ачылганыла колбой бат, мындый санаалар эбелди. Айдарда, алдыбыста јаткан тырмуушка экинчи катап баспаска нени эдер керек деген сурак чыга конот. Колледжке ӱредӱге кирип алган јиит спортчыларга дезе једимдӱ ӱредӱ кӱӱнзеп турубыс.

Арутай АДАРОВ