Алтайдын Чолмоны

Эҥ артыктары маргыжат

28.02.2025

Екатерина Чандыева Зинаида Санинага «Россия Федерацияныҥ Ӱредӱ бӧлӱгиниҥ кӱндӱлӱ ишчизи» деп аттыҥ темдегин табыштырат

Алтай Республикада јылдыҥ ла јаҥжыкканы аайынча «Ӱредӱлик устарыныҥ кӱндери» деген маргаан ӧдӧт. Быјылгы да јылда јакшынак јаҥжыгу јолына чыкты.

Маргаан ӱредӱлик ишчилерине јаҥыс та профессионал кеминде ле таҥынаҥ бойына ичкери ӧзӧрине керектӱ школ эмес, је онойдо ок ӱредӱчиниҥ ижине јилбӱни тыҥыдып, јартаарыныҥ, кӧргӱзериниҥ ле ӱредӱчиниҥ тоомјызын кӧдӱрериниҥ эп-аргазы болуп јат. Текши ороонго ӱредӱ системаныҥ једимдерин ле ичкери ӧзӱминиҥ аргаларын кӧргӱзет.

Павел Кучияктыҥ адыла адалган Эл театрда Ӱредӱлик устарыныҥ маргааны кочкор айдыҥ 24-чи кӱнинде кӧдӱриҥилӱ айалгада ачылды. Алтай Республиканыҥ ӱредӱ ле билим аайынча министриниҥ баштапкы ордынчызы Екатерина Чандыеваныҥ темдектегениле, ӱредӱлик устарыныҥ маргааны — оныҥ туружаачыларына бойыныҥ ижинде јеткен једимдерин ле байлык ченемелин толо ло чындык кӧргӱзетен јарамыкту арга. Онойдо ок тергеениҥ ӱредӱ бӧлӱгиниҥ башка-башка ууламјыларында мынаҥ ары кандый јаҥы эп-аргаларга ӧзӱм болорын кӧргӱзет.

«Ӱредӱлик устарыныҥ маргааны онойдо ок бистиҥ башкараачы иште иштеп тургандарга профессионал кемин, билгирин, ченемелин ӧскӱрер јарамыкту арга болуп јат. Бис аҥылу алкыш-быйанысты јалтанбазын, јана баспазын, турумкайын кӧргӱзип, улустыҥ алдына чыгып, ченемелиле ӱлежип јаткан туружаачыларга айдадыс. Јииттерге бойыныҥ талдап алган ижинде баштапкы алтамдарды эдерге ле јеткен једимдериле ӱлежерге эптӱ арга. Јаан маргаанныҥ кажы ла туружаачызына ижинде, онойдо ок алкы бойына бастыра јанынаҥ ӧзӧргӧ, ичкери барарга керектӱ. Олор башка-башка ууламјыларда бойын ченеерге, кӧргӱзерге ӱренет» — деп, Екатерина Чандыева айтты.

Алтай Республиканыҥ Эл Курултайыныҥ национальный политика, ӱредӱ, культура, јондык биригӱлер ле СМИ-лер аайынча комитединиҥ јааны Наталья Екеева ӱредӱликтиҥ устарына олордыҥ турумкайы, балдарга сӱӱжи, ижин билери ле ижине чындыгы учун быйанын айтты.

«Слер маргаанныҥ ончо јакылталарын бийик кеминде бӱдӱреригер деп иженедим. Мында кажы ла туружаачыда бойыныҥ профессионал аргаларын кӧргӱзерге јарамыкту айалга артыгынча. Россияныҥ президенти Владимир Путин ӱредӱликтиҥ јондыкта ла јондыктыҥ ӧзӱминде билгирдиҥ јаан учурын кажы ла катап аҥылап темдектейт. Шак ла ӱредӱчилер ончо иштиҥ-профессияныҥ тӧзӧгӧзин салат» — деп, ол чокумдады.

Ӱредӱлик устарыныҥ маргаанында тергеениҥ эҥ артык 64 ӱредӱчизи туружат. Маргаан кочкор айдыҥ 28-чи кӱнине јетире ӧдӧр. Шак ла бу кӱнде мындый маргаандардыҥ јеҥӱчилдериниҥ ады-јолдоры адалар: «Алтай Республикада Јылдыҥ таскадаачызы», «Алтай Республикада Јылдыҥ ӱредӱчизи», «Алтай Республикада Јылдыҥ узы», «Ӱредӱликте баштапкы катап», «Кижини таскадары», «Удура алтам». Профессионал маргаандардыҥ јеҥӱчилдери ле призерлоры акчала кайралдадар ла Алтай Республиканыҥ адынаҥ бастырароссиялык маргаандардыҥ федерал бӧлӱктеринде туружар.

Кӧдӱриҥи ӧйинде узак јылдарга ак-чек ле једимдӱ ижи, ӱредӱ бӧлӱгине јетирген јӧмӧлтӧ-болужы учун тергеениҥ ӱредӱлигиниҥ озочылдарына бийик кайралдар табыштырылды.
«Россия Федерацияныҥ Ӱредӱ бӧлӱгиниҥ кӱндӱлӱ ишчизи» деген атла Улаган ай-мактыҥ Кара-Кујурдагы орто школынаҥ ма-тематиканыҥ ӱредӱчизи Зинаида Санина ла Балыктујулдаҥ физиканыҥ ӱредӱчизи Софья Кыныракова адаттылар.

Россия Федерацияныҥ ӱредӱлик минис-терствозыныҥ «Ӱредӱликтиҥ отличниги» деген ведомственный темдеги В. А. Сласте-нинниҥ адыла адалган педагогикалык колледжтиҥ ӱредӱчизи Людмила Жемановага табыштырылды.

«Алтай Республиканыҥ нерелӱ ӱредӱчи-зи» деген кӱндӱлӱ атла Ӱзнезиниҥ школынаҥ алтай тилдиҥ ле литератураныҥ ӱредӱчизи Эмилия Феоктистова адатты.

«Алтай Республиканыҥ ӱредӱлигиниҥ нерелӱ ишчизи» деген кӱндӱлӱ атла Оҥдойдоҥ «Веселый городок» деп балдардыҥ садыныҥ јааны Валентина Корнухова адатты.

Алтай Республиканыҥ Кӱндӱлӱ грамоталары Жана-Аулдаҥ иштиҥ, јеткер болдыртпазыныҥ ла коруланыштыҥ ӱредӱчизи Аскат Капияновко ло Чойдогы спорттыҥ школынаҥ тазыктыраачы-ӱредӱчи Георгий Елешевке табыштырылды.

Алтай Республиканыҥ Эл Курултайыныҥ Кӱндӱлӱ грамоталары Талдуныҥ школынаҥ орус тилдиҥ ле литератураныҥ ӱредӱчизи Јергелей Комдошевага, Шабалинде Л. В. Кокышевтиҥ адыла адалган школдоҥ баштамы класстардыҥ ӱредӱчизи Надежда Микшинага, Маймадагы јуртээлемдик техникумнаҥ орус тилдиҥ ле литератураныҥ ӱредӱчизи Аксана Боровыхка ла Горно-Алтайсктагы М. З. Гнездиловтыҥ адыла адалган колледжтиҥ ӱредӱчизи Ольга Аносовага табыштырылды.

Алтай Республиканыҥ ӱредӱ ле билим аайынча министерствозыныҥ «Кӱндӱлӱ таскадаачы» деген ведомственный темдегиле Майманыҥ 2-чи таҥмалу школынаҥ баштамы класстардыҥ ӱредӱчизи Татьяна Прозорова кайралдатты.

Алтай Республиканыҥ ӱредӱ ле билим аайынча министерствозыныҥ Кӱндӱлӱ грамотазы Экинурдаҥ баштамы класстардыҥ ӱредӱчизи Илона Кудачинага, Чамал аймактаҥ балдардыҥ «Улыбка» деген садыныҥ таскадаачызы Лариса Романовага ла 12-чи таҥмалу «Березка» деген детсадтыҥ јааныныҥ таскамал иш аайынча ордынчызы Татьяна Крыжнаяга табыштырылды.

2025 јылдаҥ ала ӱредӱниҥ ичкери ӧзӱми ле ӱредӱчиниҥ тоомјызын кӧдӱрери «Јашӧскӱрим ле балдар» деген национальный ӱлекердиҥ бӧлӱги болуп јат.

Клара ПИЯНТИНОВА
Евгений БУТУШЕВТИҤ фотојуругы