Алтайдын Чолмоны

«Муниципалитеттиҥ кӱни» — Улаган аймакта

06.02.2026

АР-дыҥ башчызы Андрей Турчак ээчиде «Муниципалитеттиҥ кӱнин» Улаган аймакта ӧткӱрип тура, Акташ јурттагы јаҥы модульный котельныйдыҥ ижин кӧргӧн.

Башчыныҥ эзедип айтканыла, мындагы совет ӧйдӧ тудулган эски котельный мазут-сӱркӱштеҥ иштеген ле чек эскирген. Былтыр эмдиги ӧйдиҥ котелдорыла, кейди арутаар системаларла јеткилделген, таш кӧмӱрди кӱйдӱрип иштеер јаҥы котельный тургузар деп јӧп јарадылган болгон.

«Бис Акташты јаҥыс ла «мазутный ийнедеҥ» уштыганыс эмес, је анайда ок муниципалитетке келижип турган финансовый јӱктиҥ кемин база астатканыс. Объектке республиканыҥ бюджединеҥ 100 миллион салковой чыгарылган болгон. Јылыдар сезон аайынча кымакайлаштыҥ кеми — 40 миллион салковой. Котельный тургузарына эдилген чыгым 2,5 сезонныҥ туркунына орныктырылып калар» — деп, башчы темдектеген.

Тургуза ӧйдӧ котельный Акташтыҥ 800 кире улузын ла јонјӱрӱмдик учурлу ондор тоолу объекттерин јылула јеткилдейт. Андрей Турчактыҥ айтканыла, котельный объекттерди јылула јеткилдеери ээжи-некелтелер аайынча ӧдӧт, одырарына керектӱ таш кӧмӱр јеткилинче бар.

«Котельный јаҥы, је оныҥ ишчилериниҥ ишјалыныҥ кеми — азыйда ла кеминде. Олордыҥ ишјалыныҥ кемин кочкор айдыҥ 1-кы кӱнинеҥ ала бийиктетсин деп јакылта бергем» — деп, ол айткан.

Башчы ишмекчи јол-јоругы тушта аҥылу јуучыл операцияда турушкан јуучылдардыҥ эземине учурлай Улаганда тӧзӧлгӧн аллеяда болгон. Јуу-согуштардыҥ јалаҥдарында јеҥ јастанган јуучылдардыҥ эземин Эл Курултайдыҥ председатели Эжер Ялбаковло, Улаган аймактыҥ јааны Айдар Акчинле кожо эзеткендер.

«Кереесте бичилген «Ӧткӧн ӧйди ундыбай тура — келер ӧйди корулайдыс» деп сӧстӧр ӱйелер ортодо колбуны эзедет. Бистиҥ Ада-Тӧрӧл учун Улу јууда јеҥген адаларыс, таадаларыс ла Россияныҥ Јеҥӱзин бӱгӱн јууктадып турган јуучылдар ортодо колбуны» — деп, Андрей Турчак темдектеген.

Ол кереес албаты-јонныҥ баштаҥкайыла тӧзӧлгӧн. Оныҥ авторлоры — Владимир Кумандин, Эмиль Тадинов ло Борис Мумлеканов. Улаган аймактаҥ аҥылу јуучыл операцияда јеҥ јастанган геройлордыҥ бастыразыныҥ ады-јолдорын мында бичип салар деп темдектелет.

«Тӧрӧли учун бойыныҥ јӱрӱмин берген кажы ла јуучылдыҥ ат-нерезиниҥ алдына јабыс бажырадыс. Геройлорго ӱргӱлјик мак!» — деп, республиканыҥ башчызы айткан.
Анайда ок тергеениҥ башкараачызы Балыктујулдагы орто ӱредӱлӱ школго база барып јӱрген. Бу школдо јазашту иштер былтыр тӱгезилген.

Школдыҥ туразыныҥ тыш јаны ла јабынтызы јаҥыртылган, кӧзнӧктӧри, эжиктери, јылыдар системазы ла электриказы солылган. Анайда ок јаҥы мебель ле јазалдар алылган, школдыҥ јанында јер јарандырылган. Ол иштер Президенттиҥ «Јашӧскӱрим ле балдар» деп нацӱлекери ле «Единая Россияныҥ» программазы аайынча ӧткӱрилген.

«Республиканыҥ ӧзӱминиҥ таҥынаҥ программазыныҥ акча-манадыныҥ чодыла јаҥы котельный тудулган. Ого Культураныҥ туразын ла детсадты ӱзеери колбоп салган. Школго спортзалды ла пищеблокты јазаарына болуш эдилген» — деп, Андрей Турчак айткан.

Школдо ӱренип турган 200-теҥ кӧп балдарга јарамыкту айалгалар тӧзӧлгӧн. Башчыныҥ темдектегениле, келер јылда јурттагы детсадта јазашту иш башталар.

АР-дыҥ башкарузыныҥ пресс-службазы