Алтайдын Чолмоны

Сенатор Кош-Агаш аймакта

06.05.2026

РФ-тыҥ Алтай Республикадаҥ сенаторы, Россияныҥ Геройы Амыр Аргамаков Кош-Агаш јурттыҥ Л. И. Тюкованыҥ адыла адалган орто ӱредӱлӱ школыныҥ туразы канайда јазалып турганын шиҥдеп кӧргӧн.

Оныҥ бу јол-јоругы «Единая Россияныҥ» Албаты программазыныҥ ла Кош-Агаш аймактыҥ јонјӱрӱмдик объекттерин јазап турганына партийный шиҥжӱ эдери кеминде ӧткӧн.

Сенаторло кожо бу объектте Кош-Агаш аймактыҥ јааны, партияныҥ јербойындагы бӧлӱгиниҥ качызы Серикжан Кыдырбаев, аймактыҥ депутаттарыныҥ Совединиҥ председатели Санаш Дидунов, «Единая Россия» партияныҥ турчылары болгон.

Аймактыҥ тӧс ӱредӱлик учреждениелериниҥ бирӱзи болуп турган ол школдыҥ туразын партияныҥ Албаты программазы ла «Ӱредӱликтиҥ школдордогы системазыныҥ модернизациязы» деп эл ӱлекер аайынча текшилей јазап јаткан. Бу школдо јазашту иштер ӧткӱрери аайынча муниципал јӧптӧжӱ Кош-Агаш аймактыҥ ӱредӱ аайынча башкартузы ла «Спецстрой» ООО ортодо 2025 јылдыҥ куран айыныҥ 15-чи кӱнинде тургузылган. Подрядчик бастыра ишти 2026 јылдыҥ куран айыныҥ 15-чи кӱнине јетире ӧйдиҥ туркунына бӱдӱрип салар учурлу.

Сенаторго аймактыҥ јааны куучындаганыла, иш эки бӧлӱкле ӧдӧт. Тургуза ӧйдӧ школдыҥ бир кат туразындагы јазашту иштер тӱгезилген — мында иш 2026 јылдыҥ кандык айыныҥ 10-чы кӱнинде бӱткен. Эмди экинчи бӧлӱктийи башталган — школдыҥ эки кат туразында јазашту иштер ӧдӧт.

Ончо иш канайда ӧдӱп турганы элбеде шӱӱжилген: подрядчик ле јербойындагы јаҥныҥ чыгартулу улузы сенаторго школдыҥ тӧс туразында јазашту иштерди баштаган соҥында илезине чыгып келген курч сурактар, ӱзеери иштер ӧткӱрери керектӱзи керегинде куучындаган. Андый да болзо, јазашту иштер график аайынча ӧдӧт, јазап салган блокты кӧргӱскен.

Сенатор ло оныҥ адыла адалган кадет класстыҥ балдары ортодо туштажу јылу айалгада ӧткӧн. Ӱренчиктер бойыныҥ ӱредӱзи аайынча једимдерин кӧргӱскен, тӧрӧлчи иш керегинде куучындаган.

База бир јаан учурлу объект ајару јок артпаган — сенатор Кош-Агаш аймактыҥ военкомадында болгон. Черӱчил комиссардыҥ молјуларын бӱдӱреечи Эльмира Алпысова военкоматтыҥ ижи-тожы, јербойындагы текши айалга керегинде куучындаган. Сенатордыҥ темдектегениле, аҥылу јуучыл операцияныҥ туружаачылары военкоматта иштеп турганы оны анчада ла тыҥ сӱӱндирген. Бу улус Тӧрӧлин корыыры дегенин јакшы билер — улустыҥ куучынынаҥ эмес.

«Туштажу кыска да болзо, је ныкта, учурлу болгон. Бис сенаторго једимдеристи де, федерал кеминде ајару некеп турган уур-кӱч сурактарысты да кӧргӱстис.
Л. И. Тюкованыҥ адыла адалган школ «Единая Россияныҥ» Албаты программазы аайынча јазалып јатканы, кадеттер Геройдыҥ ады-јолын алып јӱргени — ӱйелердиҥ колбузыныҥ, аймактыҥ келер ӧйи учун бастырабыс каруулу болгоныстыҥ темдеги. Амыр Сергеевич бистиҥ јерге база келерине иженедим» — деп, Серикжан Кыдырбаев айткан.

Школдорды јазаары аайынча «Единая Россияныҥ» баштаҥкайыла тургузылган ла президент јӧмӧгӧн программа тергееде бир канча јылдардыҥ туркунына иштейт. Ол программада темдектелгениле, јаҥыс ла школдордыҥ тыш ла ич јандары јарандырылар эмес, је анайда ок олор эмдиги ӧйдиҥ јазалдарыла база текшилей јеткилделер.