Алтайдын Чолмоны

«Быйанду Герой-кала Ленинград — Туулу Алтайдыҥ албаты-јонына»

13.05.2026

Горно-Алтайсктагы Јеҥӱниҥ паркында Туулу Алтайдыҥ албаты-јоныныҥ Ленинград ӧштӱниҥ курчузында болгон јылдардагы ат-нерелерине учурлалган кереес тургузылды.

Кереести Алтай Республиканыҥ башчызы Андрей Турчак ла Санкт-Петербургтыҥ вице-губернаторы Борис Пиотровский ачкандар. Андрей Турчактыҥ темдектегениле, бу кереес-монумент — Туулу Алтайды ла Нева суудагы каланы бириктирип турган тирӱ эзем. «Бисти чындап та кӧп керектер колбойт. Бистиҥ јерлештерис Ленинград учун јуулашкан, ӧштӱнеҥ јайымдаган. Чуйдыҥ јолыныҥ тискинчилери јарлу Јӱрӱмниҥ јолында иштеген. Олор ӧштӱге карамы јогынаҥ аттыртып, тыҥ соокторго алдыртып, бойыныҥ јӱрӱмине јеткерлӱ айалгаларда иштеп, Ладоганыҥ кӧлиниҥ тожыныҥ ӱстиле улусты ла кошторды тарткан, муҥдар тоолу улустыҥ јӱрӱмин аргадаган» — деп, тергеениҥ башкараачызы айткан.

Туулу Алтай курчудагы каладаҥ эвакуировать эткен 2,5 муҥнаҥ кӧп ленинградчылардыҥ јӱрӱмин аргадаган јер болуп калган. Андрей Турчактыҥ айтканыла, јаҥы кереес — бирликтиҥ, турумкайдыҥ, бой-бойын јӧмӧжип јӱргениниҥ темдеги. Тергеениҥ башкараачызы Санкт-Петербургтыҥ губернаторы Александр Бегловко ло Герой-кланыҥ бастыра эл-јонына бирлик тӱӱкини чеберлеп турганы учун быйан айткан. Борис Пиотровскийдиҥ темдектегениле, Алтай Республиканыҥ ла Санкт-Петербургтыҥ улузын эземди чеберлеп, ада-ӧбӧкӧлӧрдиҥ ат-нерелӱ керектерин ундыбай, тӱӱкиге чебер болуп билери, быйанду јӱрери бириктирет.

«Бистиҥ албаты-јон олордыҥ тӧрӧӧн-лениградчыларын Туулу Алтайда јуук улузындый јылу уткуганын бир де ундыбаган — деп, Санкт-Петербургтыҥ вице-губернаторы айткан. — 2,5 муҥнаҥ кӧп улус јууныҥ кату јылдарында мында аргаданган».

Алтай Республиканыҥ Эл Курултайыныҥ председатели Эжер Ялбаков тӱӱкилик эземди чеберлеп аларында бу кереестиҥ аҥылу учуры јаан деп темдектеген: «Бу кереес — бистиҥ текши эземистиҥ, ветерандарга, блокадниктерге ле тылдыҥ ишчилерине быйан болгоныныҥ темдеги. Олор Ленинградты корулап алган ла бойыныҥ ат-нерезиниҥ шылтузында келер ӱйелерге јайым сыйлаган».

АР-дыҥ јашӧскӱримниҥ политиказы ла спорт аайынча министри Александр Суразовтыҥ темдектегениле, кереести ачканы — јашӧскӱримниҥ тӧрӧлчи таскамалына ла албатылардыҥ бирлигин тыҥыдарына камаанын јетиргени.      

«Бу кереести ачып тура, бис јеҥӱчилдердиҥ ӱйезин, олордыҥ ат-нерезин тооп јӱргенисти керелеп, тӱӱкилик эземди бистиҥ бала-баркабыска чеберлейдис. Россияныҥ ийде-кӱчи оныҥ кӧп укту албатызыныҥ бирлигинде, бой-бойын јӧмӧжип јӱреринде, кандый ла уур-кӱч јылдарда кижилик кӱӱн-санааны чеберлеп аларында болгонын база катап керелейдис» — деп, Александр Суразов айткан.