Алтайдын Чолмоны

Гранттар аайынча Алтай Республиканыҥ Башчызыныҥ конкурсы башталды

13.05.2026

Ол керегинде тергеениҥ башкараачызы Андрей Турчак айтты.

Коммерциялык эмес организациялар мындый ууламјыларла бичилген ӱлекелерине јӧмӧлтӧ алар аргалу:
– бирлик ле јаҥжыгулар — тилди корыыры, албатылар ортодогы најылык, экстремизмге ле терроризмге удуралажары;
– јонјӱрӱмдик јӧмӧлтӧ — уур-кӱч айалгаларга кирген билелерге, ӧскӱс балдарга болуш јетирер ле јаан јаштуларга учурлалган ӱлекерлер;
– су-кадыгынаҥ кирелӱ улуска јӱрӱмге текши темигерине болужары;
– физкультура ла спорттыҥ ӧзӱми, ол тоодо – адаптивный спорттыҥ;
– су-кадыкты корыыры ла бектедери, су-кадык јӱрӱм јӱрерине таскадары;
– культура ууламјыны јӧмӧӧри — республиканыҥ культуралык энчизин корыыры, кеендикти эмдиги ӧйдиҥ некелтелерине келиштире ӧскӱрер эп-аргалар;
– ӱредӱлик, билим ле балдардыҥ тап-эриктерин корыыры;
– јашӧскӱрим политика — тӧрӧлчи кӱӱн-тапка таскадары, волонтерство, экологиялык ӱредӱ;
– Россияныҥ јаҥы тергеелериниҥ эл-јонын јӧмӧӧри — јонјӱрӱмдик, су-кадыкты корыыры, психологиялык, юридический ле гуманитар ӱлекерлер.

Кӧп улустыҥ сураганыла баштапкы катап бойыныҥ ӱлекерлерин ТОС-тор табыштырар аргалу. Олордыҥ ӱлекерлери јербойыныҥ баштаҥкайларына, јадар јерлердиҥ ӧзӱмине ууламјылалган болор учурлу.

Башчыныҥ айтканыла, быјыл текши фондко 40 миллион салковой акча салылган.

Конкурс эки бӧлӱктеҥ турар, баштапкызы кӱӱк айдыҥ 18-чи кӱнинде башталар. Угузулар кичӱ изӱ айдыҥ 17-чи кӱнине јетире алылар. Документтер электрон бӱдӱмле табыштырылар учурлу.

Баштапкы бӧлӱктиҥ турулталары јаан изӱ айда эдилер.