Алтайдын Чолмоны

Тӱӱкизи бай, бӱгӱнги кӱни оморкодулу, келер ӧйи ижемјилӱ

30.07.2026

Кӧдӱриҥилӱ байрам Россияда албатылар бирлигиниҥ јылына, Алтай Республиканыҥ 35 јылдыгына, алтай албатыныҥ Россияга киргенинеҥ 270 јылдыкка, Камайдыҥ 200 јылдыгына, Акјолдыҥ 175 јылдыгына учурлалган. Јурттардыҥ эл-јонын уткуп, Алтай Республиканыҥ Эл Курултайыныҥ эл политика, ӱредӱлик, культура, јондык биригӱлер ле СМИ-лер аайынча комитединиҥ председатели Н. М. Екеева, депутады С. А. Мазалов, Шабалин аймактыҥ јааны Л. В. Андреева келдилер.

Айылчыларды байрамныҥ ээлери алтай аш-курсакла ажуда уткуп, кӱндӱлеп, оноҥ ары М. В. Карамаевтиҥ адыла адалган краевед музейде экскурсияга апардылар.
Кӧдӱриҥи Россия Федерацияныҥ ла Алтай Республиканыҥ мааныларын кийдиргениле башталган. Бу тоомјылу молју Акјолдогы М. В. Карамаевтиҥ адыла адалган школдыҥ ӱренеечилери Максим Будаевке ле Герман Наурчаковко берилген.

Бастыра јуулган јерлештерин, тоомјылу айылчыларын «Акјол јурт јеезе» муниципал тӧзӧлмӧниҥ јааны Л. П. Матушкина уткуп, байрамды ачты.

Шабалин аймактыҥ јааны Л. В. Андреева Л. П. Матушкинага јуртты јарандырарына тузаланып койзын деп 200 муҥга сертификат табыштырды. Узак јылдардыҥ туркунына ак-чек иштеп, јурттыҥ јӱрӱминде эрчимдӱ туружып турганы учун «За заслуги перед Шебалинским районом» деп 3-чи степеньдӱ тӧшкӧ тагар темдекле фельдшер, Акјолдогы ФАП-тыҥ заведующийи М. Н. Айманованы, Алтай Республиканыҥ иштиҥ ветераны Я. И. Рыспаевти кайралдады.

Республикан парламенттиҥ эл политика, ӱредӱлик, культура, јондык биригӱлер ле СМИ-лер аайынча комитединиҥ председатели Н. М. Екеева Алтай Республиканыҥ Эл Курултайыныҥ Быйанду самаразын аҥылу јуучыл операцияныҥ туружаачыларыныҥ ада-энезине уулдарын чындык ла тӧрӧлчи кӱӱн-тапка таскатканы учун Н. В. Какышевага, В. М. Тадинага, Р. И. Ченчаевага, Л. Н. Тюнтешевага, Л. Н. Тобошевага, А. В. Константиновага, А. Л. Рыспаевке табыштырды.

Депутат Сергей Мазалов јурт јеезеге 100 муҥга сертификат сыйлады.

Алтай Республикада «Аҥылу јуучыл операцияныҥ ветерандарыныҥ Ассоциациязы» јондык коммерциялык эмес организация-ныҥ председатели В. В. Кукасов СВО-ныҥ ветерандарын А. Г. Кокшиновты ла Э. А. Тойлошевти «За ратную доблесть» деп медальдарла кайралдады. Кайралдарды Альберт Георгиевичтиҥ эјези Наталья Викторовна ла Эркин Александровичтиҥ энези Маргарита Петровна алдылар.

Л. П. Матушкина узак јылдарга ижи-тожын тоомјылу бӱдӱрип јаткан јерлештерине «Акјол јурт јеезениҥ» Быйанду самаразын А. Н. Чедоевке, А. Г. Тодошевке, С. С. Тодошевага,
Г. Я. Калачевага табыштырды.

Онойдо ок 50 јылдаҥ ажыра нак јуртап койгон билелерге сыйлар табыштырылды. Ол тоомјылу эжерлерди адап ийели: Леонид Ильич ле Тамара Григорьевна Мекишкиндер, Юрий Парынович ле Надежда Михайловна Тазовтор, Анатолий Иванович ле Клавдия Николаевна Тюнтешевтер, Анатолий Николаевич ле Нэля Ивановна Егузековтор.

Кожоҥ-каткы, спорт маргаандар јок кандый байрам. Кӧдӱриҥиге аҥылу ийде берип, јайалталу јииттер кӱӱлик ле јайаандык сыйлар сыйладылар, ол «Энчи» ӧмӧлик, Ксения Казанцева, Ольга Плотникова, Артем Омин, Андрей Чадин, Виктор Анохин, Анастасия Попошева. «Аймактыҥ культура тӧс јериниҥ директоры В. С. Казагашев база бистиҥ јерлежис, кичӱ тӧрӧлин јӧмӧжип, артисттерин экелген, ойын-концертле болушкан. Спорт маргаандарды физкультураныҥ ӱредӱчизи В. А. Матушкин ӧткӱрген, эл-јон јилбиркеп, спорттыҥ алтай бӱдӱмдериле ойноп, тартыжып, узак ла маргыштылар – деп, Любовь Павловна Матушкина айдат. – Кичӱ тӧрӧлистиҥ тӧзӧлгӧнинеҥ ала учурлу јылдыктарын бийик кеминде ӧткӱрип салдыс. Шабалин аймактыҥ администрациязынаҥ берилген 200 муҥла клубтыҥ ичин чыныктап аларыс деп сананадым. Байрамды ӧткӱрген, ондо турушкан, јӧмӧшкӧн бастыра эл-јонго быйаным айдадым.

Јурттыс оноҥ ары ӧҥжӱп ӧссин, албатыбыс мынайып ла макка чыгып турзын, јашӧскӱримис бийик једимдерге једип, кичӱ јуртыныҥ, аймагыныҥ, тергеезиниҥ адын ӧрӧ кӧдӱрип јӱрзин!»