Јӱрӱмде эҥ ле учурлузы — су-кадык!

Кандык айдыҥ 1-кы кӱнинеҥ ала 7-чи кӱнине јетире ӧйдиҥ туркунына Алтай Республикада «Су-кадык бол!» деп текшироссиялык акция Су-кадыктыҥ телекейлик кӱнине учурлай ӧткӧн. Кандык айдыҥ 7-чи кӱни республиканыҥ тӧс калазыныҥ эл-јонына тӧс тепсеҥде ӧткӱрилген эрчимдӱ зарядка-тазыктырунаҥ башталган. Оныҥ туружаачыларыныҥ јаштары башка-башка болгон: балдардыҥ садтарыныҥ болчомдорынаҥ ала јаан јашту улуска јетире.
Бу јакшынак керекти АР-дыҥ су-кадыкты корыыры аайынча министерствозы, АР-дыҥ «Јондык су-кадыктыҥ ла медициналык профилактиканыҥ тӧс јери» деп БУЗ-ы, «Республикан эмчилик» БУЗ-тыҥ поликлиниказы, Горно-Алтайск каланыҥ администрациязы ла «Алтай Республиканыҥ олимпий соведи» РОО тӧзӧп ӧткӱрген.