Алтайдын Чолмоны

Аjаруда ветерандардыҥ сурактары

23.10.2018

Алтай Республиканыҥ башчызы Александр Бердников тергеебистиҥ ветерандарыныҥ јондык организацияларыныҥ чыгартулу улузыла туштажу ӧткӱрген.

Туштажуда ВМФ-тыҥ, јууныҥ, иштиҥ, черӱниҥ ле тап-эриктерди корыырыныҥ ветерандарыныҥ Горно-Алтайсктагы јондык организацияларыныҥ, Россияныҥ пенсионерлериниҥ Алтай Республика аайынча биригӱзиниҥ, Росгвардияныҥ ветерандарыныҥ Алтай Республика аайынча бӧлӱгиниҥ ле ӧскӧ дӧ биригӱлердиҥ чыгартулу улузы турушкан.

Туштажу ӧйинде келер ӧйдӧ ӧмӧ-јӧмӧ иштеериниҥ ууламјылары темдектелген. Республиканыҥ башкараачызыныҥ темдектегениле, јербойында јаан ајару ветерандардыҥ организацияларыныҥ ижин јӧмӧӧрине, јаш ӱйени тӧрӧлчи кӱӱн-санаага таскадарына, јаан ӱйениҥ курч сурактарыныҥ аайына чыгарына эдилет. Ол туштажуныҥ туружаачыларына тергеениҥ јондык јӱрӱминде, јаш ӱйени таскадарында эрчимдӱ туружып турганы учун быйан айткан.

«Слердиҥ ижигер јаҥыс ла Сибирьдеги федерал округ кеминде эмес, је анайда ок бӱткӱл Россия Федерация кеминде бийик баалалат. Слер Алтай Республикада албатылар ортодо бирлик ле тергееде турумкай айалга болорыныҥ бек тӧзӧлгӧзин тӧзӧгӧнигер. Јаш ӱйеге слер чындык, јалтанбас болорыныҥ јозогы болуп јадыгар. Слердиҥ канча јылдардыҥ туркунына јуулган ченемелигер бистиҥ јашӧскӱримге кыйалта јогынаҥ керектӱ болор» — деп, тергеениҥ башчызы темдектеген.

Тергеедеги ветерандардыҥ јондык организацияларыныҥ ижи, олордыҥ керек-јарактарыныҥ келер ӧйдӧги ууламјылары ла курч сурактары керегинде јууныҥ, иштиҥ, черӱчил ийде-кӱчтердиҥ ле тап-эриктерди корыырыныҥ ветерандарыныҥ республикан јондык организациязыныҥ председатели Борис Алушкин куучындаган.

Оныҥ айтканыла, тургуза ӧйдӧ тергееде јаан јашту улустыҥ айлыгы ӧдӧт. Бу ӧйдиҥ туркунына јаан јашту улус кандый айалгада јадып турганы јанынаҥ мониторинг ӧткӱрилген. Анайда ок ол ветерандардыҥ организациялары ла тергеениҥ башкартузы ортодо координационный туштажуларды јаантайын ӧткӱрери керектӱзине ајару эткен.

Александр Бердниковтыҥ темдектегениле, ӧмӧ-јӧмӧ иш-колбу јакшы уч-турулталу болзын деп, АР-дыҥ башчызында ветерандардыҥ керектери аайынча совет тӧзӧлӧр. Кандый бир сурактар јанынаҥ экијандай шӱӱжӱ бу советте ӧткӱрилер аргалу. Анайда ок Ветерандардыҥ туразыныҥ кыптарын ветерандардыҥ јондык организацияларына иштеер јер эдип берери јанынаҥ јӧп јарадылган.

Россия Федерацияныҥ Черӱчил Ийде-кӱчтериниҥ ветерандарыныҥ текшироссиялык јондык организациязыныҥ Алтай Республикадагы тергеелик бӧлӱгиниҥ председатели Сергей Гончаров ветерандардыҥ јондык организацияларына арга-кӱчтерди јажы черӱге барарына јетпеген јашӧскӱрим ортодо черӱчил-тӧрӧлчи таскамал ишти тыҥыдарга бириктирери јанынаҥ баштану эткен. Темдектезе, јииттерди черӱге кӧдӱриҥилӱ айалгада аткарарында, јылдыҥ сайын ӧткӱрилип турган «Андый профессия бар – Тӧрӧлин корыыры» деген акцияда.  Јашӧскӱримди черӱдеҥ озо белетеер тӧс јердиҥ ле «Юнармияныҥ» тергеелик бӧлӱгиниҥ керек-јарактарында эрчимдӱ туружарына кычырган.

Ветерандардыҥ российский биригӱзиниҥ Алтай Республикадагы тергеелик бӧлӱгиниҥ председатели Сергей Денчик бойыныҥ куучынында Советский Союзтыҥ Геройлоры Темирей Казаковтыҥ ла Федор Стренинниҥ каладагы мӧҥкӱлерин аайлу-башту эдип јазап саларына, керектӱ болзо, олордыҥ мӧҥкӱлерин ӧскӧ јерге кӧчӱрери јанынаҥ суракка ајару эткен. Тергеениҥ башчызы бу сурактыҥ юридический јанын быжулай шиҥдеп кӧрзин ле јууныҥ туружаачыларыныҥ мӧҥкӱлерин ӧскӧ јерге кӧчӱрери-кӧчӱрбези јанынаҥ суракты олордыҥ тӧрӧӧн-туугандарыла шӱӱжип кӧрзин деген јакылта берген.

Анайда ок туштажу ӧйинде тергеениҥ бир канча школдорын Советский Союзтыҥ Геройлорыныҥ ады-јолдорыла адаары керегинде сурак база шӱӱжилип кӧрӱлген. Чой аймакта Кара-Кӧпши јурттыҥ школына Семен Тартыковтыҥ ады адалып калган. Тургуза ӧйдӧ Паспаулдыҥ школын летчик, бу јуртта чыккан Евгений Трофимовтыҥ адыла адаары керегинде куучын ӧдӧт.  Бу сурак јанынаҥ тӧзӧмӧлдӱ иш ӧткӱрери јанынаҥ јакылталар муниципал тӧзӧлмӧлӧрдиҥ чыгартулу улузына берилген.

Јондык биригӱлердиҥ турчылары Советский Союзтыҥ Геройы А. Н. Ленкинниҥ адыла адалган 8-чи таҥмалу школдо јазашту иштер ӧткӱрери керектӱзине  ајару эткен. Тергеениҥ башчызыныҥ айтканыла, школдо капремонт ӧткӱрери ле бу ишти бӱдӱрерине керектӱ акча-манат темдектелип калган.

Совет черӱлерди Афганистаннаҥ чыгарганыныҥ 30 јылдыгына учурлай Алтай Республикада кандый иштер ӧткӱрилери темдектелгени керегинде «Афганистанныҥ ветерандарыныҥ Российский биригӱзи» деген јондык организацияныҥ Алтай республикан организациязыныҥ председатели Сергей Адлыков ло ветерандардыҥ «Боевое братство» деп текшироссиялык јондык организациязыныҥ Алтай республикан бӧлӱгиниҥ председатели Александр Вилисов куучындаган.

Тургуза ӧйдӧ бистиҥ тергееде Афганистандагы јуу-чактыҥ 226 туружаачызы јадып јат. Сергей Адлыков бу јуу-чактыҥ ветерандарыныҥ, анчада ла ыраак аймактарда јадып тургандарыныҥ диспансеризациязы керегинде суракты кӧдӱрген. Тергеениҥ башчызы АР-дыҥ су-кадыкты корыыры аайынча министерствозына бу суракты аҥылу шиҥжӱге алзын деп јакылта берген.

Александр Вилисовтыҥ айтканыла, јуук ӧйдӧ Јеҥӱниҥ паркында Афганистанда, Тӱндӱк Кавказта ла ӧскӧ дӧ «кызу точкаларда» јеҥ јастангандарга учурлалган кереести тургузары аайынча иш башталар.

Туштажуныҥ учында кайралдаш ӧткӱрилген. «Ветерандардыҥ российский биригӱзи» деп тергеелик јондык организацияныҥ кӱндӱлӱ председатели» деген орденле Сергей Денчик кайралдаткан. «100 лет Вооруженным Силам России» деген кереес медальла РФ-тыҥ Черӱчил Ийде-кӱчтериниҥ ветерандары Каир Тандыбаев, Игорь Бабкин, Александр Афанасьев, Геннадий Вольхин, Николай Дьяченко, Светлана Белканова кайралдатты.

АР-дыҥ башкарузыныҥ пресс-службазы